រដ្ឋមន្ត្រីក្រសួងការបរទេសរបស់សមាជិកសមាគមប្រជាជាតិអាស៊ី អាគ្នេយ៍ហៅកាត់ថា អាស៊ាន សម្តែងគារវកិច្ចចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាស៊ាន ។
កិច្ចប្រជុំរដ្ឋមន្ត្រីក្រសួងការបរទេសអាស៊ានលើកទី ៥៥ នៅសណ្ឋាគារសុខាភ្នំពេញ រាជធានីភ្នំពេញ ព្រះរាជាណាចក្រកម្ពុជា នាថ្ងៃតី ៣ សីហា បានចេញសេចក្តីថ្លែងការណ៍ អំពាវនាវឲ្យគ្រប់ភាគីអត់ធ្មត់ដល់ទីបំផុត និងបញ្ឈប់ការញុះញង់គ្នាទៅវិញទៅមក ក្នុងខណៈពេលដែលជម្លោះនៅកោះតៃវ៉ាន់កាន់តែតានតឹងឡើងៗ ហើយក៏បានអំពាវនាវឱ្យរដ្ឋសមាជិកអាស៊ាន ត្រៀមខ្លួនដើម្បីដើរតួនាទីសំខាន់ក្នុងការសម្របសម្រួលកិច្ចសន្ទនាដោយសន្តិវិធីរវាងគ្រប់ភាគីពាក់ព័ន្ធ តាមរយៈយន្តការផ្សេងៗ ដែលអាស៊ានជាអ្នកដឹកនាំ កាត់បន្ថយភាពតានតឹង និងការពារសន្តិភាព សន្តិសុខ និងការអភិវឌ្ឍន៍លើវិស័យផ្សេងៗ នៅអាស៊ីអាគ្នេយ៍។
កិច្ចប្រជុំនេះ ក្រៅពីរដ្ឋមន្ត្រីការបរទេសអាស៊ាន នៅមានវត្តមានលោក វ៉ាង យី រដ្ឋមន្ត្រីការបរទេសចិនចូលរួមផងដែរ ៕