កងទ័ពរបស់នីហ្សើ (Niger) បានធ្វើរដ្ឋប្រហារកាលពីថ្ងៃព្រហស្បតិ៍ ២៧ កក្កដានេះ ហើយបានប្រកាសតាមកញ្ចក់ទូរទស្សន៍ថា ខ្លួនបានបណ្តេញប្រធានាធិបតី ម៉ូហាម៉េដ បាហ្ស៊ូម (Mohamed Bazoom) បន្ទាប់ពីត្រូវបានឃុំខ្លួននៅឯគេហដ្ឋាន ។
ឧត្តមសេនីយ៍ឯក អាមូឌូ អាប់ដ្រាម៉ាណេ (Amadou Abdramane) បានបង្ហាញខ្លួនជាមួយសមាជិកកងទ័ព៩ នាក់ ដោយប្រកាសតាមទូរទស្សន៍ថា យោធាបានសម្រេចបញ្ចប់របបបច្ចុប្បន្នដែលបំផ្លាញសន្តិសុខ និងគ្រប់គ្រងប្រទេសដោយគ្មានប្រសិទ្ធភាព។
ប្រធានាធិបតី
លើសពីនេះ លោកឧត្តមសេនីយ៍ឯកអាប់ដ្រាម៉ាណេ បានប្រកាសថា នីហ្សើបានបិទព្រំដែនរបស់ខ្លួន និងអនុវត្តវិធានការហាមឃាត់ប្រជាពលរដ្ឋមិនឲ្យចាកចេញពីផ្ទះសម្បែង (បម្រាមគោចរ) និងសកម្មភាពផ្សេងៗ នៃស្ថាប័នរដ្ឋាភិបាល និងគ្រប់ស្ថាប័នទាំងអស់ ។
នេះជារដ្ឋប្រហារលើកទី ៧ នៅអាហ្វ្រិកកណ្តាល និងខាងលិច ក្នុងរយៈពេលតែបីឆ្នាំកន្លះប៉ុណ្ណោះ ។ ណៃហ្សើ គឺជាប្រទេសមួយដែលស្ថិតនៅក្រោមអាណានិគមរបស់បារាំងរហូតដល់ឆ្នាំ 1960 រដ្ឋធានី គឺ នីអាមីយ (Niamey ) ហើយប្រើភាសា បារាំងជាភាសាផ្លូវការ ។
ប្រទេសនេះមិនមានផ្លូវចេញទៅសមុទ្រទេ នៅខាងកើតជាប់នឹងប្រទេសឆាដ ភាគខាងត្បូងភ្ជាប់ជាមួយប្រទេស នីហ្សេរីយ៉ា និងបេនីន ខាងលិចជាប់ប្រទេសម៉ាលី ខាងជើងជាប់ព្រំដែនជាមួយអាល់ហ្សេរី និងលីប៊ី។ ឈ្មោះ នីហ្សើ ត្រូវបានដាក់ឈ្មោះតាមទន្លេនីហ្សេ ដែលហូរកាត់រដ្ឋធានី នីអាមីយ ជាទន្លេដ៏សំខាន់មួយនៅក្នុងតំបន់ផងដែរ ។
ទង់ជាតិប្រទេសនីហ្សើ
លោក ម៉ូហាម៉េដ បាហ្ស៊ូម គឺជាប្រធានាធិបតីទី 10 របស់នីហ្សើ ដែលចូលកាន់តំណែងនៅថ្ងៃទី 2 ខែមេសា ឆ្នាំ 2021 បន្ទាប់ពីឈ្នះការបោះឆ្នោត ហើយក៏ជាសម្ព័ន្ធមិត្តជិតស្និទ្ធជាមួយប្រទេសបារាំងផងដែរ ។
យ៉ាងណាមិញ មុនពេលស្បថចូលកាន់តំណែង មានព័ត៌មានថាមានការប៉ុនប៉ងធ្វើរដ្ឋប្រហារម្តងមកហើយម្តងទៀតនៅក្នុងខែមីនាឆ្នាំនេះ ដែលបានកើតឡើងក្នុងអំឡុងពេលដំណើរទស្សនកិច្ចរបស់លោក បាហ្ស៊ូម ទៅកាន់ប្រទេសទួរគី ៕
ប្រភព sanook
ដោយ ចាន់ធឿន