ដោយ សូរ្យរិទ្ធ៖
ទោះជារឿងនេះ វាបានកន្លងផុតទៅ ៥ ឆ្នាំហើយក៏ដោយ ប៉ុន្តែក្រៅពីរឿងតូចតាច ប្រធានបទមួយដែលពិភពលោក និងប្រមុខរាជរដ្ឋាភិបាលកម្ពុជា ទាំងពីរសម្តេចតេជោ និងសម្តេចធិបតី ហ៊ុន ម៉ាណែត កំពុងយកចិត្តទុកដាក់មកទល់បច្ចុប្បន្ន ឲ្យប្រយុទ្ធប្រឆាំងនឹង «ព័ត៌មានក្លែងក្លាយ (Fake News)» ។
រឿងមួយបានបង្កសោកនាដកម្ម បណ្តាលឲ្យលោក Su Qicheng (蘇啟誠) ប្រធានការិយាល័យសេដ្ឋកិច្ច និងវប្បធម៌តៃប៉ិ នៅទីក្រុងអូសាកា ប្រទេសជប៉ុន ដែលបំពេញតួនាទីជាអគ្គកុងស៊ុលតៃវ៉ាន់ប្រចាំនៅអូសាកា សម្រេចចិត្តផ្តា.ច់ជី.វិតផ្ទាល់ខ្លួន ។
នាយ ស៊ូ អាយុ ៦១ឆ្នាំ បានធ្វើអ.ត្ត.ឃា.តដោយច.ង.កស.ម្លា.ប់ខ្លួននៅនឹងផ្ទះ ដោយសារ ពាក្យចចាមអារ៉ាម និងព័ត៌មានក្លែងក្លាយ ដែលបានសាយភាយអំឡុងពេលព្យុះទីហ្វុង Jebi បានវាយប្រហារក្នុងតំបន់កាន់សៃ (Kansai) នៃប្រទេសជប៉ុន ហើយបានវាយប្រហារគាត់ និងបុគ្គលិកការិយាល័យសេដ្ឋកិច្ច និងវប្បធម៌តៃប៉ិ ។ នៅទីក្រុងអូសាកា (Osaka) មានគេណែនាំថា ឲ្យពួកគេរក្សាភាពស្ងៀមស្ងាត់ ហើយនឹងមិនផ្តល់ជំនួយណាមួយដល់ភ្ញៀវទេសចរតៃវ៉ាន់នៅក្នុងប្រទេសជប៉ុនឡើយ នេះគឺផ្ទុយពីសាធារណរដ្ឋប្រជាមានិតចិន ដែលបានបញ្ជាឱ្យស្ថានកុងស៊ុលនៅទីក្រុងអូសាកា បញ្ជូនរថយន្តក្រុងចំនួន ១៥គ្រឿង ដើម្បីជួយជម្លៀសអ្នកទេសចរចិនដីគោកចេញពីអាកាសយានដ្ឋានកាន់សៃ ។
ពាក្យចចាមអារ៉ាម និងព័ត៌មានមិនពិតបែបនេះ អះអាងដូច្នេះថា មានប្រជាជនតៃវ៉ាន់ជាងមួយពាន់នាក់ ជាប់គាំងនៅអាកាសយានដ្ឋានកាន់សៃ ដោយគ្មានការយកចិត្តទុកដាក់ពីអាជ្ញាធរតៃវ៉ាន់ និងត្រូវបានគេចុះផ្សាយតាមរយៈគេហទំព័រមួយក្នុងប្រទេសតៃវ៉ាន់ ហើយត្រូវបានសារព័ត៌មានសំខាន់ៗជាច្រើនទៀត លើកយកមកពន្លាតពង្រីករឿងនេះបន្ថែមទៀត ប៉ុន្តែតាមពិតទៅ ស្ថានទូតចិនដីគោកមិនបានបញ្ជាឱ្យរថយន្តក្រុងណាមួយជួយក្នុងការជម្លៀសនោះទេ ខណៈដែលរថយន្តក្រុងដែលជួយជម្លៀសមនុស្សចេញពីអាកាសយានដ្ឋាន នៃជើងហោះហើរកាន់សៃ គឺបានរៀបចំឡើងដោយអាជ្ញាធរជប៉ុន និងអាកាសយានដ្ឋានកាន់សៃផ្ទាល់ដើម្បីជួយភ្ញៀវទេសចរទាំងអស់ដោយមិនរើសអើងពូជសាសន៍។
មនុស្សជិតស្និទ្ធរបស់លោក ស៊ូ បានលាតត្រដាងក្រោយមរណភាពរបស់គាត់ថា ពីរបីថ្ងៃមុននោះ លោក ស៊ូ បានទូរស័ព្ទបញ្ចេញការខកចិត្តរបស់គាត់ ហើយបានសុំជំនួយក្នុងការស៊ើបអង្កេតប្រភពដើមនៃពាក្យចចាមអារ៉ាម-ព័ត៌មានក្លែងក្លាយនោះ ប៉ុន្តែគ្មាននរណាម្នាក់រំពឹងថា គាត់នឹងឈានដល់ចំណុចគិតខ្លីនោះទេ ។
ព្រឹត្តិការណ៍សោកនាដកម្មបែបនេះ វាដូចជាការព្រមានដល់រដ្ឋាភិបាលតៃវ៉ាន់ឲ្យចាត់វិធានការគំរាមកំហែងព័ត៌មានក្លែងក្លាយយ៉ាងធ្ងន់ធ្ងរបែបនេះ ។ ទន្ទឹមនឹងនេះ គណៈកម្មាធិការទំនាក់ទំនង និងទូរគមនាគមន៍ជាតិតៃវ៉ាន់ (國家通在傳播委員會; NCC) បានចេញសេចក្តីថ្លែងការណ៍មួយ ហើយបានហៅប្រព័ន្ធផ្សព្វផ្សាយទូរទស្សន៍មកប្រជុំដោយបញ្ជាក់យ៉ាងរហ័ស រាយការណ៍ព័ត៌មានដែលអាចប៉ះពាល់ដល់ផលប្រយោជន៍សាធារណៈ ឬប៉ះពាល់ដល់ការថែរក្សាសណ្តាប់ធ្នាប់សាធារណៈ។ ការខកខានក្នុងការត្រួតពិនិត្យការពិតជាមុន អាចនឹងត្រូវពិន័យជាប្រាក់រហូតដល់ 2 លានដុល្លារតៃវ៉ាន់ នេះបើតាមច្បាប់វិទ្យុ និងទូរទស្សន៍ ។
«ក្រោយកើតហេតុ រដ្ឋាភិបាលតៃវ៉ាន់បានស៊ើបអង្កេតលើចំនួនរឿងមិនពិតទាក់ទងនឹងរដ្ឋាភិបាល និងទីភ្នាក់ងាររដ្ឋាភិបាលរបស់តៃវ៉ាន់ ហើយបានរកឃើញមានជាង 700 ករណី នេះជាបញ្ហាធំណាស់» អ្នកការទូតតៃវ៉ាន់ម្នាក់នោះបាននិយាយ ។
ករណីមួយទៀតដែលមានប្រភពចេញពីពាក្យចចាមអារ៉ាមនៅក្នុងពិភពអនឡាញ - ប្រព័ន្ធផ្សព្វផ្សាយសង្គម បានបង្កើតផលប៉ះពាល់ បណ្តាលឱ្យក្រុមហ៊ុន ឬអង្គភាពអាជីវកម្មមួយ ទទួលរងផលប៉ះពាល់យ៉ាងខ្លាំង ជាច្រើនឆ្នាំបានកន្លងផុតទៅហើយ មុនពេលដែលរឿងត្រូវបានបកស្រាយ គឺករណីរបស់ CP All និង Lepin Banana។ នៅខែមេសា ឆ្នាំ 2015 ក្រុមហ៊ុន CP All ដែលជាអ្នកគ្រប់គ្រងហាង 7-Eleven នៅប្រទេសថៃ ត្រូវបានចោទប្រកាន់ដោយអ្នកសរសេរប្លុកម្នាក់ និងបានជេរប្រមាថម្ចាស់អាជីវកម្មតូចតាចដែលផ្តល់ផលិតផលទៅលក់ក្នុងហាង 7-Eleven ដោយចម្លងរូបមន្តធ្វើនំប៉័ងគ្រីមរបស់ម្ចាស់អាជីវកម្ម ដើម្បីផលិត និងលក់ដោយខ្លួនឯង ដែលថាធ្វើបាបសហគ្រិនតូចតាចទាំងនោះ ។
រឿងបែបនេះ មនុស្សជាច្រើនបានភ្លេច ព្រោះមកដល់ថ្ងៃនេះ ជាង ៣ឆ្នាំបានកន្លងផុតទៅហើយ ប៉ុន្តែមនុស្សជាច្រើននៅតែដក់ក្នុងចិត្តថា CP All មានទម្លាប់កេងចំណេញ-សម្លុត។ សហគ្រិនខ្នាតតូចពិតប្រាកដ ពួកគេតែងតែលើកយកឧទាហរណ៍ពីករណីបែបនេះមកធ្វើជាឯកសារយោង ។
ទោះជាយ៉ាងណាក៏ដោយ ពីសាលក្រមរបស់តុលាការរដ្ឋប្បវេណីបាងកកខាងត្បូង កាលពីថ្ងៃទី 28 ខែមិថុនា ឆ្នាំ 2018 ក្នុងសំណុំរឿងរដ្ឋប្បវេណីខ្មៅលេខ ព.860/2017 បានប្រាកដច្បាស់ណាស់ពីភស្តុតាងដែលថា ការគ្រប់គ្រងហាង 7-Eleven មិនបានធ្វើអ្វីដើម្បីទាញយកប្រយោជន៍ពីប្រតិបត្តិករអាជីវកម្មខ្នាតតូច ដូចដែលបានចោទប្រកាន់នៅក្នុងអត្ថបទ blog នោះទេ លើសពីនេះ នៅពេលក្រោយមក ទោះបីបានឈានដល់ការសម្របសម្រួលក៏ដោយ អ្នកនិពន្ធអត្ថបទនោះក៏បំពានលើកិច្ចសន្យាដែរ បដិសេធមិនគោរពតាមកិច្ចព្រមព្រៀងសម្របសម្រួល ។
ដើម្បីសម្លាប់ព័ត៌មានក្លែងក្លាយ «ក្រុមហ៊ុនត្រូវពន្យល់ដល់សាធារណជន និងដៃគូពាណិជ្ជកម្ម និងត្រូវជូនដំណឹងអំពីការពិត ដើម្បីដោះស្រាយការខូចខាតរបស់ក្រុមហ៊ុន និងធ្វើឱ្យសង្គមយល់ដឹង អំពីការប្រើប្រាស់ការវិនិច្ឆ័យ សូមពិនិត្យមើលការពិតមុនពេលបោះពុម្ព ឬបញ្ជូនបន្តព័ត៌មានណាមួយនៅលើប្រព័ន្ធផ្សព្វផ្សាយសង្គម រួមទាំងការពារជនណាម្នាក់ពីការស្វែងរកផលប្រយោជន៍ដោយខុសច្បាប់ដោយបង្កាច់បង្ខូចអ្នកដទៃ ឬទីផ្សារដោយមធ្យោបាយខុសច្បាប់ ដូចដែលបានកើតឡើងជាមួយក្រុមហ៊ុន CP All នេះ ជាដើម ។
ព័ត៌មានក្លែងក្លាយ ឬ Fake News តាមរយៈប្រព័ន្ធផ្សព្វផ្សាយប្រពៃណី ប្រព័ន្ធផ្សព្វផ្សាយអនឡាញ និងប្រព័ន្ធផ្សព្វផ្សាយសង្គម គឺជាការគំរាមកំហែងដល់សង្គម សុវត្ថិភាពផ្ទាល់ខ្លួន និងសន្តិសុខសាធារណៈ ទាំងជាតិ និងសកល គេអាចមើលឃើញថា ព័ត៌មានក្លែងក្លាយមិនត្រឹមតែពាក់ព័ន្ធនឹងរឿងនយោបាយទេ កិច្ចការបរទេស ឥស្សរជនសាធារណៈ ប៉ុន្តែក៏ប៉ះពាល់ដល់វិស័យធុរកិច្ច សង្គម វប្បធម៌ និងមនុស្សសាមញ្ញដូចយើងដែរ ។
យើងនៅចាំប្រសាសន៍របស់សម្តេចតេជោ ហ៊ុន សែន (អតីតនាយកនាយករដ្ឋមន្ត្រី ក្នុងឱកាសជួបអ្នកកាសែតប្រចាំឆ្នាំនាឆ្នាំ ២០១៨) ដ៏មានអត្ថន័យអំពី ព័ត៌មានក្លែងក្លាយ ថា «ព័ត៌មានក្លែងបន្លំ ពិភពលោកទាំងមូលគេកំពុងប្រយុទ្ធប្រឆាំងជាមួយវា។ ដូច្នេះ មិនត្រូវទុកឲ្យវារស់ នៅលើទឹកដីកម្ពុជាទេ ព្រោះអានេះវាអាក្រក់ វាសាហាវ វាមិនមែនជាដំណើរការប្រជាធិបតេយ្យ និងសិទ្ធិបញ្ចេញមតិទេ។ បរទេសមួយចំនួន បានជួបខ្ញុំ ខ្ញុំបានចោទសួរថា តើអាហ្នឹងជាសិទ្ធិបញ្ចេញមតិ ឬជាព័ត៌មានក្លែងក្លាយ ដែលពិភពលោកកំពុងតែស្អប់ខ្ពើម និងលុបបំបាត់?ឆ្លើយជាមួយខ្ញុំ អត់រួចទេ» ៕