ឯកឧត្តម កិត្តិបរិរក្សបណ្ឌិត គាត់ ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ
ឯកឧត្តម កិត្តិបរិរក្សបណ្ឌិត គាត់ ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ បានអញ្ជើញមកប្រកាសទ្រព្យសម្បត្តិ និងបំណុលដោយផ្ទាល់ នៅអង្គភាពប្រឆាំងអំពើពុករលួយ នាព្រឹកថ្ងៃទី ១៥ ខែមករា ឆ្នាំ ២០២១ ទទួលគោរពស្វាគមន៍ដោយ ឯកឧត្តម ទូច ស៊ុនណារី អនុប្រធានអង្គភាពប្រឆាំងអំពើពុករលួយ តំណាងជូនឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ ។
ឯកឧត្តម កិត្តិបរិរក្សបណ្ឌិត គាត ឈន់ គឺជាឥស្សរជនមួយរូប ដែលតែងមានវត្តមានអញ្ជើញមកបំពេញកាតព្វកិច្ចផ្ទាល់ជារៀងរាល់ការប្រកាសទ្រព្យសម្បត្តិ និងបំណុល តាមរបប ២ ឆ្នាំម្តង នៅអង្គភាពប្រឆាំងអំពើពុករលួយ ។
ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ
កាលពីថ្ងៃទី ១៣ ខែមករាកន្លងទៅនេះដែរ ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ក៏បានអញ្ជើញមកកាន់អង្គភាពប្រឆាំងអំពើពុករលួយ ដើម្បីប្រកាសទ្រព្យសម្បត្តិ និងបំណុល តាមរបប ២ ឆ្នាំដូចគ្នាដែរ ។ ដូច្នេះរយៈពេល ១៥ ថ្ងៃ ការមកប្រកាសទ្រព្យសម្បត្តិ និងបំណុល មានឥស្សរជនក្នុងជួររាជរដ្ឋាភិបាលចំនួន ២ រូបបានអញ្ជើញមកផ្ទាល់អង្គភាពតែម្តង ។
ការការទទួលឯកសារនៅឆ្នាំនេះ ក៏មានអ្នកជាប់កាតព្វកិច្ចប្រកាសមួយចំនួន បានដាក់ពាក្យតាំងពីខែធ្នូ ឆ្នាំ ២០២០ មកម្ល៉េះ ព្រោះគាត់បានជ្រាបតាមរយៈសេចក្តីជូនដំណឹង ២ ខែមុន របស់អង្គភាពប្រឆាំងអំពើពុករលួយ ហើយបានមកបំពេញ និងអនុវត្តយ៉ាងត្រឹមត្រូវមុនថ្ងៃកំណត់ទៅទៀត ។
តាមទិន្ន័យដែលទទួលបានពីលោក ចេង ប៊ុនឃាង ប្រធាននាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយឲ្យដឹងថា រយៈពេល ១៥ ថ្ងៃដំបូងនៃការទទួលឯកសារប្រកាសទ្រព្យសម្បត្តិ និងបំណុល តាមរបប ២ ឆ្នាំម្តង អង្គភាពបានទទួលពីគ្រប់ក្រសួង-ស្ថាប័ន និងខេត្តមួយចំនួន ២២.០៧១ ស្មើ ៨៧,៥% នៃចំនួនដែលត្រូវប្រកាសសរុប ។ ក្នុងនេះក្រសួង-ស្ថាប័នចំនួន 1 និងខេត្តចំនួន 10 បានបញ្ចប់ការប្រកាសរបស់ខ្លួន 100% រួមមាន ១. គណៈកម្មាជាតិរៀបចំការបោះឆ្នោះ (គ.ជ.ប. ) ២. ខេត្តមឧត្តរមានជ័យ ៣.ខេត្ត សៀមរាប ៤.ខេត្តត្បូងឃ្មុំ និង៥.ខេត្តកំពង់ឆ្នាំង ៦.ខេត្តក្រចេះ ៧ . ខេត្ត កំពង់ចាម ៨.ខេត្តកែប ៩.ខេត្តតាកែវ ១០.ខេត្តស្វាយរៀង និង១១. ខេត្តកំពង់ធំ។
លោក ចេង ប៊ុនឃៀង ប្រធាននាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ
ចំនួនឯកសារប្រកាសទ្រព្យសម្បត្តិ និងបំណុល ភាគច្រើនទទួលពីជនបង្គោល ចំណែកបុគ្គលជាប់កាតព្វកិច្ចប្រកាសអញ្ចើញញមកប្រកាសផ្ទាល់នៅនឹង អ.ប.ព. មានចំនួន 1,531 រូប ៕