អត្ថបទ សូរ្យរិទ្ធ៖
អ្នកនាំពាក្យក្រសួងការបរទេសមីយ៉ាន់ម៉ាថា នាយឧត្តមសេនីយ៍ មិន អងឡាយ អគ្គបញ្ជាការយោធាជាន់ខ្ពស់របស់ មីយ៉ាន់ម៉ានឹងចូលរួមប្រជុំមេដឹកនាំកំពូលអាស៊ាន នៅថ្ងៃទី ២៤ មេសា នៅទីក្រុងហ្សាការតា ប្រទេសឥណ្ឌូនេស៊ី តាមសំណើរបស់ប្រទេសប៊្រុយណេក្នុងឋានៈជាប្រធានអាស៊ាន ហើយនេះជាការចេញមុខដំបូងរបស់ មិន អង ឡាយ ក្រោយមានរដ្ឋប្រហារថ្ងៃទី ១ កុម្ភៈ ២០២១ មក ។
បណ្តាមេដឹកនាំប្រទេសអាស៊ានមួយចំនួន នៅមិនទាន់បញ្ជាក់ច្បាស់ថានឹងចូលរួមកិច្ចប្រជុំនេះនៅឡើយ ប៉ុន្តែសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាជាណាចក្រកម្ពុជា កាលពីថ្ងៃទី ១៦ ខែមេសាសប្តាហ៍មុន បានសរសេរនៅលើហ្វេសប៊ុកសម្តេចថា «ដោយភារកិច្ចខានមិនបានក្នុងការចូលរួមប្រជុំអាស៊ាននាថ្ងៃទី ២៤ មេសា ២០២១ ខាងមុខនៅរដ្ឋធានីហ្សាកាតា ប្រទេសឥណ្ឌូណេស៊ី។ កិច្ចការដែលខ្ញុំត្រូវធ្វើដើម្បីការពារការឆ្លងកូវីដ-១៩ ស្របតាមវិធានការសុខាភិបាល ដំបូងខ្ញុំត្រូវចាក់វ៉ាក់សាំងដូសទី២ នៅថ្ងៃទី២០ មេសា ២០២១ ដែលមុននោះគ្រោងចាក់នៅថ្ងៃទី២៩ មេសា ២០២១។ ថ្ងៃទី២៣ មេសា ២០២១ ត្រូវយកសំណាកពិនិត្យដើម្បីទទួលលិខិតបញ្ជាក់សម្រាប់ឲ្យអាជ្ញាធរសុខាភិបាលឥណ្ឌូណេស៊ី» ។
«ព្រឹកថ្ងៃទី២៤ មេសា ២០២១ ចេញដំណើរទៅហ្សាកាតា។ ពេលទៅដល់ត្រូវយកសំណាកពិនិត្យម្តងទៀត។ ពេលរសៀលការប្រជុំចាប់ផ្តើម ពេលចប់មិនថាថ្ងៃឬយប់ខ្ញុំត្រូវត្រឡប់មកវិញ។ ពេលមកដល់ព្រលានយន្តហោះអន្តរជាតិភ្នំពេញ ខ្ញុំត្រូវយកសំណាកពិនិត្យម្តងទៀត។ មកដល់ផ្ទះខ្ញុំត្រូវធ្វើចត្តាឡីស័ក១៤ថ្ងៃជាមួយនឹងការពិនិត្យសំណាក២ទៅ៣ដងទៀត» ។
ចំណែកសារព័ត៌មានក្នុងស្រុកថៃលើកឡើងថា លោក ប្រាយុទ្ធ ច័ន្ទអូឆា នាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ នៅមិនទាន់ឆ្លើយតបពីការចូលរួមកិច្ចប្រជុំនេះនៅឡើយ ហើយគេជឿថា មានរបៀបវារៈនៃការប្រជុំកំពូលមេដឹកនាំអាសា៊ននេះ ចៀសមិនផុតពីវិបត្តិនៅប្រទេសមីយ៉ាន់ម៉ាឡើយ ៕