ប្រភព AP
ដោយ សូរ្យសែង៖
ព័ត៌មានពីទីក្រុងម៉ាណាម៉ា ប្រទេសបារ៉ែន នៅថ្ងៃទី ៩ ឧសភានេះថា កងនាវាទី ៥ របស់សហរដ្ឋអាមេរិកដែលប្រតិបត្តិការនៅក្នុងប្រទេសបារ៉ែនផ្តល់សេចក្តីរាយការណ៍ថា នាវាផ្ទុកយន្តហោះភ្ជាប់ប្រព័ន្ធប្រឆាំងមីស៊ីល «USS Monterrey» ប្រតិបត្តិការរឹបអូសយក «អាវុធខុសច្បាប់» ពីនាវាគ្មានដាក់អត្តសញ្ញាណប្រទេស ដែលបើកនៅក្នុងដែនទឹកអន្តរជាតិ ភាគខាងជើងសមុទ្រអារ៉ាប់ ដោយប្រតិបត្តិការនេះធ្វើឡើងរវាងនៅចន្លោះថ្ងៃទី ៦-៧ ឧសភាកន្លងទៅនេះ ។
សព្វាវុធទាំងនោះមានចំនួនច្រើនមហិមា រួមទាំងមីស៊ីលប្រឆាំងរថក្រោះ កាំភ្លើងរ៉ាហ្វាលផលិតនៅប្រទេសចិន ជាច្រើនពាន់គ្រឿង កាំភ្លើងខ្លី កាំភ្លើងយន្ត គ្រាប់បែកដៃ និងឧបករណ៍យុទ្ធសាស្ត្រជាច្រើនប្រភេទ។
បច្ចុប្បន្នសព្វាវុធទាំងអស់កំពុងរង់ចាំបំផ្លាញដោយយោងទៅតាមច្បាប់អន្តរជាតិ ទោះយ៉ាងណាមិនមានព័ត៌មានបន្ថែមថា នាវាធ្វើដំណើរពីណាទៅណា ហើយតើមានមនុស្សប៉ុន្មាននាក់នៅលើនាវា ជាពលរដ្ឋប្រទេសណា ។ ប៉ុន្តែប្រភពសន្តិសុខអាមេរិក ក្រោយមកបានផ្តល់ព័ត៌មានថា ទាហានអាមេរិកបានផ្តល់ជំនួយមនុស្សធម៌ជាមូលដ្ឋានដល់នាវិកនោះ ហើយបានដោះលែងជាមួយនាវាទទេ ។
បើតាមព័ត៌មានមិនផ្លូវការថា ទិសដៅរបស់នាវានោះគឺកំពង់ផែមួយនៅយេម៉ែន ដែលកងកម្លាំងអារ៉ាប់ដឹកនាំដោយអារ៉ាប៊ីសាអូឌីត ដែលតស៊ូប្រយុទ្ធដ៏វែងជាមួយនឹងកងកម្លាំហ Houthi ចាប់តាំងពីឆ្នាំ ២០១៥ មក ។
ខណៈពេលដែលប្រទេសរុស្ស៊ី ចិន អារ៉ាប៊ីសាអូឌីត រដ្ឋាភិបាលនិរទេសយេម៉ែន និងកម្លាំងហូទី មិនទាន់មានយោបល់ជាផ្លូវការណាមួយទាក់ទងនឹងហេតុការណ៍នេះនៅឡើយទេ ៕