ធ្វើដូចម្តេច ដើម្បីជាអ្នកនាំពាក្យដែលល្អ?

ចំណេះដឹងទូទៅថ្ងៃអង្គារ៍ ទី17 ខែសីហា ឆ្នាំ2021 ម៉ោង 12:42 នាទី ល្ងាច

ស្រាវជ្រាវពីឯកសារបរទេស

ដោយ សូរ្យរិទ្ធ

វីគីភីឌា បានឲ្យអត្ថន័យនៃពាក្យ «អ្នកនាំពាក្យ (spokesman) មានន័យថា អ្នកប្រកាស អ្នកផ្សព្វផ្សាយ អ្នកថ្លែងព័ត៌មាន ជាអ្នកផ្តល់ព័ត៌មាន និងបកស្រាយ ដល់សាធារណជន ឬ ប្រជាជន មហាជនបានដឹង ។

មនុស្ស ២នាក់ដែលត្រូវការពឹងពាក់គ្នាទៅវិញទៅមក គឺ«អ្នកនាំពាក្យ និងអ្នកសារព័ត៌មាន» ដើម្បីទំនាក់ទំនងរវាងប្រព័ន្ធផ្សព្វផ្សាយ និងស្ថាប័នសាធារណៈ ។ ដើម្បីទទួលបានព័ត៌មានច្បាស់លាស់ គ្រប់ជ្រុងជ្រោយ ចាំបាច់ត្រូវមានអ្នកនាំពាក្យដែលពាក់ព័ន្ធនឹងប្រធានបទនៃការផ្សព្វផ្សាយរបស់ស្ថាប័ន អង្គភាពសាម៉ី ដែលជាការជួយបំពេញបន្ថែម ។

លក្ខណសម្បត្តិរបស់អ្នកនាំពាក្យដែលល្អ គឺ៖

១. មានចំណេះដឹង មានទិន្ន័យស្រាប់ មានព័ត៌មាន និងការយល់ដឹងអំពីអ្វីដែលខ្លួននិយាយ

២. មានភាពជឿជាក់ និង ជំនឿទុកចិត្ត

៣. ជាអ្នកដែលមានសម្ព័ន្ធភាពល្អ (ទំនាក់ទំនង) ការចូលចិត្តដោយសាធារណជន ឬ អ្នកសារព័ត៌មាន

៤. មានទេពកោសល្យខាងនិយាយទំនាក់ទំនង

អ្នកនាំពាក្យគួរមានជំនាញក្នុងការទំនាក់ទំនងល្អដូចខាងក្រោម ៖

១. ការប្រើពាក្យដ៏ត្រឹមត្រូវ សមរម្យ

២. ការប្រើទឹកដមសំលេង ពាក្យពេចន៍ឲ្យត្រូវជាមួយស្ថានការណ៍នោះ

៣. ការប្រើភាសា ប្រើឥរិយាបថក្នុងការនិយាយយ៉ាងសមស្រប

៤. រក្សាលំនឹងចិត្ត កុំឆេវឆា

បច្ចុប្បន្ន មានក្រសួង ស្ថាប័នរបស់រដ្ឋមួយចំនួន បានបង្ហាញពីការចាត់តាំងឲ្យមានអ្នកនាំពាក្យដែរ ដោយក្រសួងស្ថាប័នខ្លះ មានអ្នកនាំពាក្យម្នាក់ ឬ ២នាក់ និងអាចផ្តល់ព័ត៌មាន បានគ្រប់រឿង ដែលបានកើតឡើងនៅក្នុងអង្គភាពរបស់ខ្លួន។ រីឯស្ថាប័នមួយចំនួនទៀត មានអ្នកនំាពាក្យដូចគ្នាដែរ តែមិនមានភាពសកម្ម ឬក៏មានការរារែកក្នុងការផ្តល់ព័ត៌មានដល់អ្នកកាសែត ឬក៏មានការគេចវេសដោយប្រការផ្សេងៗ យោងទៅតាមប្រធានបទរឿងដែលបានកើតឡើង រសើប ស្រពិចស្រពិល មិនមានការអនុញ្ញាតពីថ្នាក់លើ ។ល។

ការដែលមានអ្នកនាំពាក្យច្បាស់លាស់នៅតាមក្រសួងស្ថាប័ននីមួយៗ មិនថារដ្ឋ ឬឯកជន ពិតជាបានផ្តល់ផលប្រយោជន៍ដល់វិស័យសារព័ត៌មានយ៉ាងខ្លាំង ។ នៅប្រទេសណាក៏មានអ្នកនាំពាក្យ ព្រោះជាការចាំបាច់ ។ ន័យមួយ បញ្ជាក់ពីព័ត៌មានផ្លូវការទៅកាន់សាធារណជន, ការថ្លែង ឬសរសេររបស់អ្នកនាំពាក្យទៅកាន់ប្រព័ន្ធផ្សព្វផ្សាយ ធ្វើឲ្យព័ត៌មានមួយមានរសជាតិ ។

ន័យមួយទៀត អ្នកនាំពាក្យជួយឲ្យព័ត៌មានមួយរបស់អ្នកកាសែត ប្រកបទៅដោយការថ្លឹងថ្លែង និងមានវិជ្ជាជីវៈ។ ការពោលចេញទៅក្រៅរបស់អ្នកនាំពាក្យ មានផលប្រយោជន៍ដែលធ្វើឲ្យអស់មន្ទិល លើប្រធានបទណាមួយ និងមានសារសំខាន់ក្នុងការបង្ហាញដល់សង្គមពីកិច្ចខិតខំប្រឹងប្រែងភារកិច្ចរបស់ស្ថាប័ន អង្គភាពខ្លួន ការពាររាល់ការរិះគន់ដែលមិនមានហេតុផលពីខាងក្រៅ ។

ការក្រឡេកមើលនៅក្នុងរបៀបធ្វើការងាររបស់ក្រសួង ឬស្ថាប័ន អង្គភាពនីមួយៗ អាស្រ័យទៅលើការដឹកនាំចាត់ចែងរបស់អ្នកដឹកនាំស្ថាប័ននោះ ។ ជាលទ្ធផល អង្គភាព ស្ថាប័ន ដែលបានរៀបចំអ្នក«នាំពាក្យ»ត្រឹមត្រូវ ត្រូវបានគេកត់សម្គាល់ថា មានភាពរលូនផ្នែកទំនាក់ទំនង មានប្រសិទ្ធភាព និងតម្លាភាពខ្ពស់ក្នុងការងារ ដែលជាការលើកមុខមាត់ដល់ស្ថាប័ន អង្គភាពនោះ ៕

ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល