ពីវេបសយាថៃ mgronline
ប្រែសម្រួលដោយ សូរ្យសែង៖
ពលករខ្មែរចំនួន ៤៨ នាក់ ប្រុស ១៨ នាក់ ស្រី ២៣ នាក់ និងកុមារ ៧ នាក់ ត្រូវបានចាប់ខ្លួន ខណៈកំពុងធ្វើដំណើរឆ្លង ដែនទៅស៊ីឈ្នួលប្រមូលផ្លែឈើនៅខេត្តចន្ទបុរី ។ អ្នកទាំងអស់នោះសុទ្ធតែបានចាក់វ៉ាក់សាំងរួចរាល់ ខ្លះចាក់វ៉ាក់សាំង ស៊ីណូហ្វាម ខ្លះ ស៊ីណូវ៉ាក់ និងខ្លះទៀត Johnson & Johnson ប៉ុន្តែទីបំផុតត្រូវឱ្យត្រលប់មកប្រទេសវិញ ។
ថ្ងៃនេះ (៤ កញ្ញា) អាជ្ញាធរថៃផ្សាយថា បានចាប់ពលករខ្មែរ ៤៨ នាក់នៅឃុំក្លងយ៉ៃ ស្រុកប៉ូងណាំរ៉ន ។ អាជ្ញាធរថៃសាកសួរថា ពួកគេចូលទៅស៊ីឈ្នួលបេះផ្លែឈើនៅស្រុកប៉ូងណាំរ៉ន និងស្រុកសយដាវ ដោយមានអ្នកនាំផ្លូវ លួចចូលតាមច្រករបៀង វេលាម៉ោង ៤ ភ្លឺ ដោយឲ្យប្រាក់អ្នកនាំ ក្នុងម្នាក់ ៤.០០០-៥.០០០ បាត ហើយពេលចេញដំណើរត្រូវឲ្យប្រាក់ ១.០០០ បាត ជាមុន ។
ខាងថៃនិយាយថា ការលួចចូលតាមច្រករបៀងខាងលើ មិនមែនតែមួយលើកនេះទេ គឺមានច្រើនលើកណាស់មកហើយ តែមានចំនួនត្រឹម ៤-៥ នាក់ប៉ុនណោះ ប៉ុន្តែលើកនេះមានចំនួនច្រើន ត្រូវឲ្យត្រឡប់មកប្រទេសខ្មែរវិញទាំងអស់ ៕