នៅថ្ងៃទី១៧ ខែកញ្ញា ឆ្នាំ២០២១ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញប្រកាសបើកយុទ្ធនាការថ្មីសន្លាង សឹងថានៅលើពិភពមិនទាន់មាន គឺការចាក់វ៉ាក់សាំងបង្ការជំងឺ កូវីដ-១៩ ជូនដល់កុមារអាយុចាប់ពី ៦ឆ្នាំ ដល់ ១២ឆ្នាំ ដែលធ្វើឡើងនៅវិមានសន្តិភាព រាជធានីភ្នំពេញ ។

ជាមួយគ្នានេះ ចៅៗរបស់សម្តេចតេជោ និងចៅៗរបស់ឥស្សរជនជាន់ខ្ពស់ រាជរដ្ឋាភិបាលកម្ពុជាមួយចំនួនទៀត ក៏បានមកទទួលវ៉ាក់សាំងផងដែរ។ ការចាក់វ៉ាក់សាំងលើកនេះ គឺក្នុងបំណងឱ្យកុមារតូចៗអាចចូលរៀននៅសាលាបឋមសិក្សាឡើងវិញបាន និងដើម្បីបង្កើតភាពសាំក្នុងសង្គមឱ្យកាន់តែធំដែលអាចឈានទៅបើកលំហសកម្មភាពក្នុងសង្គម ឱ្យកាន់តែទូលាយ ។

ថ្លែងនៅក្នុងសន្និសីទសារព័ត៌មាន សម្តេចតេជោបានមានប្រសាសន៍ថា ពេលនេះកម្ពុជាស្ថិតនៅក្នុងប្រទេសដែលបានចាក់វ៉ាក់សាំងច្រើនជាងគេ ស្របពេលដែលស្ថានភាពកូវីដ-១៩ នៅលើពិភពលោកមិនទាន់មានការថយចុះនៅឡើយ។ សម្តេចថា សម្តេចមិនចាក់វ៉ាក់សាំងនៅកន្លែងនេះបន្តិច កន្លែងនោះបន្តិចទេ គឺត្រូវចាក់ស្រោចវ៉ាក់សាំងតែម្តង ទើបមានភាពស៊ាំក្នុងសហគមន៍ ដែលមានន័យថា ស្រោចកន្លែងណាគឺត្រូវស្រោចឱ្យជោគតែម្តង។ សម្តេចតេជោសង្កត់ធ្ងន់ ថា យើងមានវិធានការ ៣សំខាន់ៗ ដែលកម្ពុជាដាក់ចេញជាប្រចាំថ្ងៃ នោះគឺ«ទី១ ការធ្វើចត្តាឡីស័ក និងការធ្វើតេស្តរហ័ស ទី២ ការចាក់វ៉ាក់សាំង និងទី៣ ការព្យាបាលដោយថ្នាំ និងវិធីថ្មីៗ» ។

សម្តេចតេជោមានប្រសាសន៍បន្តទៀតថា គោលការណ៍បើកសាលាឡើងវិញ រួមមានទី១ នៅតាមជនបទដែលមាន ហានិ ភ័យទាប ទី២ នៅតំបន់មានហានិភ័យមធ្យម ដែលផ្តល់លទ្ធភាពឱ្យថ្នាក់ទី៩ ដល់១២,ទី៣ នៅតំបន់ដែលមាន ហានិភ័យ ខ្ពស់ គឺត្រូវរៀនតាមអនឡាញ, ទី៤ ត្រូវបង្កើតគណៈកម្មការតាមដាន ទី៥ បន្តត្រួតពិនិត្យអ្នកជំងឺថ្មី កុំឱ្យឆ្លងចូលសាលារៀន។ សម្តេចថា ការបើកអ្វីៗឡើងវិញក្រោយថមថយកូវីដ ត្រូវចាប់ផ្តើមពីដំបូងវិស័យអប់រំ បន្ទាប់មកគឺវិស័យសេវា ដែលវិស័យសេវាត្រូវធ្វើ ២ជំហាន ដោយជំហានទី១ បើកទេសចរណ៍ក្នុងស្រុក ជំហានទី២ គឺទេសចរណ៍វ៉ាក់សាំង។ នៅពេលខាងមុខ អ្នកចាក់វ៉ាក់សាំងគ្រប់ដូសអាចមកកម្ពុជាបាន ប៉ុន្តែអាចធ្វើចត្តាឡីស័កនៅក្របខណ្ឌមូលដ្ឋានខេត្តនោះ៧ថ្ងៃ ដោយមិនឱ្យឆ្លងទៅខេត្តដទៃ ។​ កម្ពុជាសុខចិត្តចំណាយរាប់រយលានដុល្លារដើម្បីរកវ៉ាក់សាំង ដើម្បីទាញចំណូលរាប់ពាន់ដុល្លារត្រឡប់មកវិញ។

នៅថ្ងៃនេះ សម្តេចតេជោ ហ៊ុន សែន បានណែនាំឱ្យគណៈកម្មការចាក់វ៉ាក់សាំង សិក្សាអំពីការចាក់វ៉ាក់សាំងដល់កុមារអាយុ៣ ទៅ ៦ឆ្នាំ ដែលមានប្រមាណជាង ៩១ម៉ឺននាក់នៅកម្ពុជា ខណៈដែលពួកគេត្រូវចូលរៀនថ្នាក់មត្តេយ្យផងដែរ។ នៅថ្ងៃនេះផងដែរ សម្តេចតេជោនាយករដ្ឋមន្ត្រីក៏បានប្រកាសរួមគ្នាតែម្ដងជាមួយនឹងការចាក់វ៉ាក់សាំងដល់កុមារដែលមានអាយុចាប់ពី៦ ឆ្នាំដល់១២ ឆ្នាំ និងប្រកាសបើកយុទ្ធនាការចាក់វ៉ាក់សាំងដូសទី៣ ជូនដល់ប្រជាពលរដ្ឋកម្ពុជាចាប់ពីពេលនេះតទៅផងដែរ ៕