ប្រជាជនថៃរាប់ពាន់នាក់ នៅស្រុកកាន់តាំង ខេត្តតាំង បានសម្រុកមកចាក់វ៉ាក់សាំងស៊ីណូវ៉ាក់ម្ជុលទី ១ ដោយប្រជ្រៀតគ្នាដោយគ្មានរៀបចំសណ្តាប់ធ្នាប់ រហូតដល់មានការប្រើកម្លាំងរបស់ប៉ុស្តិ៍នគរបាលកន្ទោកដើម្បីថែរក្សារបៀបរៀបរយ ។

ថ្ងៃទី ២៤ កញ្ញានេះ អ្នកកាសែតរាយការណ៍ថា នៅមន្ទីរពេទ្យកាន់តាំង ស្រុកកាន់តាំង ប្រជាជនមកពី ១១ ឃុំ ដែលមានសិទ្ធិទទួលវ៉ាក់សាំងស៊ីណូវ៉ាក់ម្ជុលទី ១ ប្រមាណ ១.០០០ នាក់ បានទៅរង់ចាំតាំងពីម៉ោង ៤ ភ្លឺ ដោយសម្រុកចូលប្រជ្រៀតគ្នា មិនបានតម្រង់ជួរឲ្យមានរបៀបរៀបរយ បណ្តាលឲ្យមន្ត្រីសុខាភិបាលមានលំបាកក្នុងការបំពេញការងារ រហូតប្រើមេក្រូបំពងសំលេងឲ្យធ្វើចិត្តត្រជាក់ តែគ្មាននរណាស្តាប់ ពេលនោះអ្នកខ្លះក៏ត្រឡប់ទៅវិញ ដោយមើលឃើញសភាពណែនណាន់តាន់តាប់ដូច្នេះ នឹងអាចឆ្លងកាន់តែច្រើន ៕