អត្ថបទ សូរ្យសែង៖
ដោយយល់ឃើញពីភាពចាំបាច់ និងមានសារសំខាន់យូរអង្វែងទៅលើផ្នែកទីផ្សារឌីជីថល ផ្សារភ្ជាប់ជាមួយវិស័យព័ត៌មានដែលយើងហៅថា «មាតិកា (Contents)» សម្រាប់ប្រើប្រាស់ទាំងការងារ ទាំងអាជីវកម្មសេដ្ឋកិច្ច ដូច្នោះហើយទើបឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ មានចក្ខុវិស័យខ្ពស់ អនុញ្ញាតឲ្យវាគ្មិនជំនាញលើផ្នែកសរសេរព័ត៌មាន, បណ្តាញសង្គម និងទីផ្សារឌីជីថល (Media &Digital Marketing) មកចែករំលែកបំប៉ននូវចំណេះដឹងបន្ថែមដល់មន្ត្រីអង្គភាពប្រឆាំងអំពើពុករលួយ ថ្ងៃសុក្រទី ១ ខែតុលា ឆ្នាំ២០២១ បន្ត បើកវគ្គបណ្តុះបណ្តាលលើកទី ៣ របស់ខ្លួនតាមរយៈកម្មវិធី Zoom ដែលមានមន្ត្រីចូលរួម ១០៥ រូប ។
វាគ្មិន ៣ រូប ដែលមកពីស្ថាប័ន ២ ផ្សេងគ្នា មានឯកឧត្តម លៀង សូរ្យរិទ្ធ ជំនួយការឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ, ឯកឧត្តម ង៉ូវ បូរីណា ទីប្រឹក្សា និងជាអគ្គនាយករងរដ្ឋបាល ស្ថានិកសារព័ត៌មានគេហទំព័រ «អាណាចក្រខ្មែរ (Khempire) និងលោក ង៉ូវ តារារក្សាស័ក្តិ មន្ត្រីក្រសួងទំនាក់ទំនងជាមួយរដ្ឋសភា ព្រឺទ្ធសភា និងអធិការកិច្ច ជាអ្នកជំនាញខាងបណ្តាញសង្គម និងទីផ្សារឌីជីថល និងជាស្ថានិកគ្រុប «MOHA GROUP» ដែលមាន ៤១ គ្រុប ជាចមង្កោមគ្រុបធំជាងគេនៅប្រទេសកម្ពុជា ។
បណ្តាញសង្គម និងទីផ្សារបែបឌីជីថល គឺជាវិធីសាស្ត្រទីផ្សារដែលពឹងផ្អែកជាចម្បងលើប្រព័ន្ធអ៊ីនធើរណេត ដើម្បីទាញភ្ជាប់ជាមួយប្រភពខាងក្រៅ តាមរយៈការប្រើប្រាស់បណ្តាញសង្គម និងប្រព័ន្ធផ្សព្វផ្សាយ ។
នៅក្នុងបរិបទនៃយុគសម័យឌីជីថលនេះ ការធ្វើទីផ្សារតាមបែបឌីជីថលកំពុងតែមានប្រជាប្រិយភាព និងការចាប់អារម្មណ៍យ៉ាងខ្លាំងពីសំណាក់ប្រជាជនកម្ពុជា ដោយសារតែការមើលឃើញពីសារសំខាន់ខ្លាំង ទើបគេទាញផលប្រយោជន៍យ៉ាងច្រើនពីការធ្វើទីផ្សារតាមបែបឌីជីថលនេះ ។
ការទទួលបាននូវចំណេះខាងលើ យើងសង្ឃឹមថា សិក្ខាកាមនឹងនាំមកអនុវត្តក្នុងភារកិច្ចការងាររបស់ខ្លួនដោយប្រសិទ្ធភាព និងដើរទាន់ពិភពលោក ៕