ទីភ្នាក់ងារ Reuters និង AFP រាយការណ៍នៅថ្ងៃទី ៦ តុលាថា ប្រទេស ៤ នៅអឺរ៉ុប ស៊ុយអ៊ែដ ដាណឺម៉ាក ហ្វាំងឡង់ និងប្រទេសន័រវេស បានប្រកាសផ្អាកប្រើវ៉ាក់សាំងការពារកូវីដ-១៩ ម៉ូដឺណា (Moderna) ចំពោះក្រុមមនុស្សអាយុតិច ក្រោយមានការកើតឡើងនូវជំងឺសរសៃឈាមបេះដូង បន្ទាប់ពីចាក់វ៉ាក់សាំងហើយ ។
មន្ត្រីសុខាភិបាលប្រទេសស៊ុយអ៊ែដនិយាយថា នឹងផ្អាកប្រើវ៉ាក់សាំងចំពោះមនុស្សកើតក្រោយឆ្នាំ ១៩៩១ ដោយបង្ហាញថា វាបានបង្កើនអាការជំងឺសាច់ដុំបេះដូង និងជំងឺរលាកស្រោមបេះដូង ក្នុងក្រុមមានអាយុតិចដែលបានចាក់វ៉ាក់សាំងម៉ូដេណារួច ២ ដូស ប៉ុន្តែហានិភ័យនៃផលប៉ះពាល់បែបនេះគឺតិចតួចណាស់ ។ ចំណែកប្រទេសហ្វាំងឡង់បានហាមឃាត់ការប្រើប្រាស់វ៉ាក់សាំង Moderna លើបុរសដែលកើតពីឆ្នាំ ១៩៩១ ។
អ្នកនាំពាក្យរបស់ក្រុមហ៊ុនម៉ូដេណាបាននិយាយថា អ្នកជំងឺមានអាការមិនធ្ងន់ធ្ងរទេ ហើយមាននិន្នាការជាសះស្បើយក្នុងរយៈពេលខ្លី ជាមួយនឹងការព្យាបាល និងបានសម្រាក ។ ចំណែកហានិភ័យនៃជំងឺគាំងបេះដូងកើនឡើងយ៉ាងខ្លាំងក្នុងចំណោមមនុស្សដែលបានឆ្លងមេរោគកូវីដ-១៩ ហើយការចាក់វ៉ាក់សាំងប្រឆាំងនឹងជំងឺកូវីដ-១៩ គឺជាវិធីល្អបំផុតដើម្បីការពារវា ។
យោងតាមការសិក្សារបស់អាមេរិកបានបង្ហាញថា បុរសអាយុក្រោម ២០ ឆ្នាំដែលមានផ្ទុកមេរោគកូវីដ-១៩ មានលទ្ធភាពកើតជំងឺគាំងបេះដូង ៦ ដង ច្រើនជាងអ្នកដែលបានចាក់វ៉ាក់សាំង ។
ន័រវែស ហ្វាំងឡង់ ស៊ុយអែត និងដាណឺម៉ាក សុទ្ធតែផ្តល់អនុសាសន៍ថា បុរសអាយុក្រោម ៣០ ឆ្នាំត្រូវចាក់វ៉ាក់សាំង Pfizer ជំនួសវិញ ៕
ប្រភព matichon
ដោយ សូរ្យសែង