អត្ថបទលោក សូរ្យរិទ្ធ៖
រឿងនយោបាយដ៏ល្បីកក្រើកនៅស្រុកថៃថ្មីៗនេះ គឺត្រកូល «ឈិនវ៉ាត់» ហក់ចូលនយោបាយគឺកូនស្រីរបស់លោក «ថាក់ស៊ីន ឈិនវ៉ាត់» ដែលខ្ចាត់ព្រាត់ពីស្រុកកំណើតនិរទេសនៅក្រៅប្រទេស ។
សន្និបាតប្រចាំឆ្នាំរបស់គណបក្សភឿថៃ (ក្រុមអាវក្រហម) នៅពេលថ្មីៗនេះ រឿងសំខាន់គឺលេចមុខតួអង្គថ្មីគឺលោកស្រី ភេត ថងថាន ឈិនវ៉ាត់ ឬ «អ៊ុងអ៊ីង» ជាកូនស្រីរបស់លោក ថាក់ស៊ីន ឈិនវ៉ាត់ អតីតនាយករដ្ឋមន្ត្រីថៃ មានរូបសម្រស់ឆើតដូចម្តាងមីង យីងឡាក់ ធ្វើជាប្រធានក្រុមទីប្រឹក្សាគណបក្សភឿថៃ ហក់ចូលធ្វើនយោបាយ ក្នុងនាមមនុស្សជំនាន់ថ្មី អមដោយសហការីជំនាន់ចាស់ដែលមានបទពិសោធ ។
អ៊ុងអ៊ីង ពោលថា «នាងខ្ញុំសូមអរគុណ នាងខ្ញុំសូមតាំងចិត្តធ្វើការ ក្នុងឋានៈជាទីប្រឹក្សា ឋានៈជាពលរដ្ឋថៃ និងក្នុងឋានៈជាកូនរបស់ឪពុកដែលមិនធ្លាប់ភ្លេចគុណផែនដីថៃ ហើយលោកបានប៉ងប្រាថ្នាត្រឡប់មកស្រុកកំណើតជាថ្មីឡើងវិញ ត្រឡប់មកក្រាបបង្គំអ្នកមានគុណ» ។
ក្នុងឱកាសនោះ ស៊ុមភុង អាម៉នវិវ៉ាត់ ប្រធានគណបក្សភឿថៃ បានថ្លែងលាចេញពីតំណែង ជំនួសដោយលោកស្រី ឈុន ណាន ស្រ៊ីកែវ ជាប្រធានគណបក្សភឿថៃវិញ នេះជានិន្នាការបម្រែបម្រួលក្នុងយុគសម័យថ្មី ដែលត្រូវមានក្រុមឈុតថ្មី មនុស្សជំនាន់ថ្មីដឹកនាំ ។
នាង ភេតថងថាន ឬ អ៊ុងអ៊ីង និង ស្វាមី
នាង ភេតថងថាន ឬ អ៊ុងអ៊ីង តាំងចិត្តជាមួយនឹងការកែទម្រង់បច្ចេកវិទ្យា ហើយមិនហៅខ្លួនឯងថាជាអ្នកនយោបាយទេ ប៉ុន្តែឈានចូលមកជាទីប្រឹក្សាគណបក្ស ដើម្បីជំរុញបង្កើតឱកាសសម្រាប់មនុស្សជំនាន់ថ្មី ។
នៅពេលអ្នកកាសែតសួរថា នៅពេលអនាគតតើបន្ត«ឧត្តមគតិ បែប ថាក់ស៊ីន ឈិនវ៉ាត់» ឬទេ? អ៊ុងអ៊ីង ឆ្លើយថា «យើងទៅដល់ទីណា ក៏ជាកូនរបស់លោកឪពុក នាងខ្ញុំនឹងធ្វើជាទីប្រឹក្សាដ៏ល្អបំផុត» ។
ថ្មីៗនេះ លោកកូនលោកប្រធានាធិបតីហ្វីលីពីន រ៉ូដរីហ្គោ ឌូរតេតេ ក៏ចង់ឲ្យកូនស្រីឈរឈ្មោះជាប្រធានាធិបតីអាណត្តិក្រោយដើម្បីស្នងតំណែងពីឪពុកផងដែរ ។ នេះហើយជាយុគសម័យ «រលកថ្មី» លើដែនដីចាស់ ៕