ដោយ សាវុឌ្ឍ៖
មជ្ឈមណ្ឌលជាតិកម្ចាត់មីនកម្ពុជា (CMAC) បានបណ្តុះបណ្តាលសុនខ ម៉ាលីណយ ពូជបែលហ្ស៊ិកចំនួន ១២ក្បាល ដើម្បីហិតក្លិនរកមេរោគកូវីដ១៩។ ក្នុងរយៈពេលវែងមជ្ឈមណ្ឌលសង្ឃឹមថានឹងប្រើប្រាស់សុនខទាំងនេះក្នុងព្រឹត្តិការណសំខាន់ៗ ផ្សេងៗ រួមទាំងព្រឹត្តិការណ៍កីឡាផងដែរ (លោក ហេង រតនា ប្រធានមជ្ឈមណ្ឌលស៊ីម៉ាក់ បានប្រាប់ AFP) ។
«សុនខមានប្រសិទ្ធភាពច្រើនជាងឧបករណ៍ផ្សេងទៀត», «កន្លងទៅពីរខែកន្លះ សុនខរបស់យើងស្ថិតនៅក្នុងដំណាក់កាលដំបូងនៃភាពជោគជ័យ ពួកវាអាចហិតក្លិនកូវីដ១៩ បាន» ខុម សុខលី អ្នកបង្ហាត់សុនខប្រាប់ AFP ។
លោក សុខលី ប្រាប់ថា ក្នុងពេលនេះមានសុនខ ៤ ក្បាលដែលអាចត្រួតចាប់ក្លិនកូវីដ១៩ ដែលគេដាក់ក្នុងបំពង់ចម្ងាយប្រវែង ១ ម៉ែត្រ ក្នុងរយៈពេលមិនដល់មួយនាទី ខណៈដែលសុនខ 8 ក្បាលទៀតត្រូវបានហ្វឹកហាត់ស្វែងរកក្លិននៅកន្លែងបើកចំហ «គ្រប់ទីកន្លែង» ។ ការបង្ហាត់វាមិនច្រើនខែប៉ុន្មានទេ ។
«ក្នុងអនាគត ខ្ញុំសង្ឃឹមសុនខទាំងនេះអាចមានចំណែកចូលរួមការពារ ឬ បន្ថយកូវីដ១៩ ព្រោះពួកវារហ័សរហួន រវាសរវៃណាស» លោក សុខលី និយាយ ។
កម្ពុជាបានសន្យាថានឹងលុបបំបាត់គ្រាប់មីន និងគ្រឿងផ្ទុះមិនទាន់ផ្ទុះទាំងអស់នៅឆ្នាំ២០២៥ ដោយមានអង្គការជាច្រើនធ្វើការជាមួយក្រុមដោះគ្រាប់មីន សុនខហិតក្លិន និងកណ្តុរហិតក្លិន ដើម្បីសម្រេចបានគោលដៅ ។
ក្រៅពីប្រទេសកម្ពុជា នៅមានប្រទេសដទៃទៀតដែលប្រើសុនខប្រឆាំងជាមួយកូវីដ១៩ ដូចជា ប្រទេសអេក្វាឌ័រ និង អ៊ីតាលី ជាដើម ៕