អត្ថបទ សូរ្យសែងៈ
នារសៀលថ្ងៃច័ន្ទ ទី៨ ខែវិច្ឆិកា ឆ្នាំ២០២១នេះ ឯកឧត្តម តុប សំ ប្រធានក្រុមប្រឹក្សាជាតិប្រឆាំងអំពើពុករលួយ បានអញ្ជើញដឹកនាំគណៈប្រតិភូស្ថាប័នប្រឆាំងអំពើពុករលួយនៃព្រះរាជាណាចក្រកម្ពុជា ដើម្បីចូលរួមដាក់កម្រងផ្កាគោរពវិញ្ញាណក្ខន្ធ យុទ្ធជន យុទ្ធនារី វីរបុរស អ្នកស្នេហាជាតិ ដែលបានពលីជីវិត ដើម្បីបុព្វហេតុជាតិមាតុភូមិ និងប្រជាជនកម្ពុជា នៅវិមានឯករាជ្យ និង ព្រះបរមរូបព្រះករុណា ព្រះបរមរតនកោដ្ឋ នៅមណ្ឌលសួនខាងកើតវិមានឯករាជ្យ មួយថ្ងៃមុនការប្រារព្ធខួបលើកទី ៦៨ឆ្នាំ នៃបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣-៩ វិច្ឆិកា ២០២១)។
គួរបញ្ជាក់ថា បុណ្យឯករាជ្យជាតិ ៩ វិច្ឆិកា ឆ្នាំ២០២១ នេះ ត្រូវបានប្រារព្ធឡើងស្របគ្នាទៅនឹងថ្ងៃកំណើតលើកទី៦៨ នៃកងយោពលខេមរភូមិន្ទផងដែរ ។
បុណ្យឯករាជ្យជាតិ ៩ វិច្ឆិកា គឺជាការរំឭកឲ្យឃើញអំពីព្រះរាជបេសកកម្ម ដើម្បីជាតិមាតុភូមិ និងប្រជារាស្ត្រខ្មែរ របស់ព្រះករុណាព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ធ្វើការតស៊ូក្នុងក្របខ័ណ្ឌនៃព្រះរាជបូជនីយកិច្ច ក្នុងការទាមទារឯករាជ្យឲ្យប្រទេសកម្ពុជា រួចចាកផុតពីអាណានិគមនិយមបារាំង ៕