អត្ថបទ សូរ្យសែង៖
សម្រាប់សត្វកណ្តូប ប្រជាជនកម្ពុជាបានបរិភោគមុនគេ ដោយសារវាសម្បូរនៅតាមវាលស្រែចម្ការ គេយកវាទៅលីងដូចសត្វចង្រិតដែរ តែអ្នកធ្លាប់បរិភោគបានប្រាប់ថា សត្វកណ្តូបឈ្ងុយឆ្ងាញ់ជាងសត្វចង្រិត ។
កាលពីថ្ងៃទី ១២ ខែវិច្ឆិកា ឆ្នាំ ២០២១ ទីភ្នាក់ងារព័តមាន REUTERS រាយការណ៍ថា សហភាពអឺរ៉ុប (EU = European Union) បានអនុម័តយល់ព្រមឲ្យសត្វកណ្តូបធ្វើជាអាហារជាផ្លូវការ ព្រោះជាផ្នែកមួយនៃវិធីសាស្រ្តក្នុងការអភិវឌ្ឍន៍ប្រព័ន្ធកសិកម្ម និងការផ្តល់នូវប្រភពអាហារប្រកបដោយនិរន្តរភាពសម្រាប់មនុស្ស ។
សត្វកណ្តូបដែលទទួលទានបាន គឺ migratory locust ជាដែលមានចំនួនច្រើននៅទ្វីបអាស៊ី អាហ្រ្វិក អូស្ត្រាលី និង ញូវហ្សឺលែន ។
EU ផ្សព្វផ្សាយថា កណ្តូបដែលយកមកទទួលទានជាអាហារ ត្រូវយកស្លាប និងជើងចេញ អាចត្រូវបានធ្វើជាសម្ងួត ឬកិន ជាអាហារសម្រន់ ឬជាគ្រឿងផ្សំអាហារ ។ សត្វកណ្តូបវាមានប្រូតេអ៊ីនខ្ពស់ណាស់ មិនមានអ្វីដែលបង្កឲ្យកង្វល់ គួរតែប្រុងប្រយ័ត្នចំពោះអ្នកដែលប្រតិកម្មអាលែហ្សី ។
យោងតាមអង្គការស្បៀងអាហារ និងកសិកម្មនៃអង្គការសហប្រជាជាតិ សត្វល្អិតគឺជាប្រភពអាហារដែលមានជីវជាតិខ្ពស់ និងមានសុខភាពល្អ ដោយសារតែវាសម្បូរទៅដោយសារធាតុចិញ្ចឹមជាច្រើនដូចជា ខ្លាញ់ ប្រូតេអ៊ីន វីតាមីន ជាតិសរសៃ ក៏ដូចជាសារធាតុរ៉ែផ្សេងៗ ហើយមនុស្សរាប់លាននាក់នៅជុំវិញពិភពលោកបានទទួលទានសត្វល្អិតជាអាហារជារៀងរាល់ថ្ងៃអស់រយៈពេលជាយូរ ៕