អត្ថបទ សូរ្យសែង៖

ក្រសួងការងារថៃនឹងចាត់វិធានការទៅលើពលករបរទេសដែលចូលធ្វើការខុសច្បាប់ និងចុះត្រួតពិនិត្យតាមការដ្ឋានសំណង់ រោងចក្រ និងស្ថានទីធ្វើការផ្សេងៗ ដែលមានពលករមកពីប្រទេសមីយ៉ាន់ម៉ា កម្ពុជា និង លាវ ហើយក៏បានចុះទៅជួបថៅកែទាំងឡាយ ព្រមានឲ្យរៀបចំដំណើរការតាមប្រព័ន្ធច្បាប់ប្រទេសថៃ ។

ថៃនឹងបង្កើតក្រុមការងារ មានក្រសួងការងារ ផ្នែកអន្តោប្រវេសន៍ និងផ្នែកសន្តិសុខ មានប៉ូលិស កងទ័ព ដើម្បីបង្ក្រាប និងចាប់ឃាត់ខ្លួនពលករបរទេសណាដែលមកខុសច្បាប់បញ្ជូនទៅតុលាការ ។

ច្បាប់បានចែងថា «ប្រសិនរកឃើញពលករបរទេសខុសច្បាប់ក្នុងការដ្ឋានធ្វើការគ្មានលិខិតអនុញ្ញាត ថៅកែនោះនឹងត្រូវពិន័យពី ១០.០០០-១០០.០០០ បាតចំពោះមនុស្សម្នាក់ ។ បើមានបទល្មើសដដែលៗ ត្រូវផ្តន្ទាទោសដាក់ពន្ធនាគារ និងហាមជួលជនបរទេសឱ្យធ្វើការរយៈពេល ៣ ឆ្នាំទៀត ។ ចំណែកជនបរទេសដែលចូលមកធ្វើការដោយគ្មានលិខិតអនុញ្ញាត ត្រូវផ្តន្ទាទោសពិន័យជាប្រាក់ពី ៥.០០០-៥០.០០០បាត និងត្រូវនិរទេសចេញពីប្រទេសថៃ ហើយ​មិន​អាច​ទទួល​បាន​ប័ណ្ណ​ការងារ​រហូត​ដល់​ការ​កាត់​ទោស​ត្រូវ​បាន​បញ្ចប់​ក្នុង​រយៈ​ពេល​ពីរ​ឆ្នាំ»។

ដើម្បី​ឲ្យ​កម្មករ​អាច​ទទួល​បាន​អត្ថប្រយោជន៍​ផ្សេងៗ​តាម​សិទ្ធិ ​ពួកគេ​មិន​ចាំបាច់​រស់នៅ​ដោយ​លាក់លៀម ដូច្នេះ​ក្រសួង​ការងារ​បាន​ស្នើគណៈរដ្ឋមន្ត្រីអនុម័តកាលពីថ្ងៃទី ២៩ ខែធ្នូ ឆ្នាំ ២០២០ អនុញ្ញាតឱ្យជនបរទេសមកពីមីយ៉ាន់ម៉ា កម្ពុជា និងលាវ អាចស្នាក់នៅក្នុងប្រទេសថៃបានជាករណីពិសេស ក្រោមស្ថានការណ៍កូវីដរលកថ្មី  ដោយអនុញ្ញាតឱ្យនិយោជកដែលជួលកម្មករចំណាកស្រុកដោយខុសច្បាប់ ដាក់ស្នើបញ្ជីឈ្មោះដើម្បីរាយការណ៍ពីបំណងចង់ជួលជនបរទេសតាមរយៈប្រព័ន្ធអនឡាញ ដែល​ធ្វើ​ឱ្យ​កម្មករ​ជាង ​៤ ​សែន​នាក់​មាន ​៣​សញ្ជាតិ​ទទួល​បាន​ការ​អនុញ្ញាត​ឱ្យ​ធ្វើ​ការ ។

ក្រៅពីនោះក៏​បាន​ស្នើ​ឡើង​គណៈរដ្ឋមន្ត្រី​​អនុម័តកាលពី​ថ្ងៃ​ទី​១៣ ខែ​កក្កដា ឆ្នាំ​២០២១ ដើម្បី​អនុញ្ញាត​ឲ្យ​ពលករ​ចំណាក​ស្រុក​ដែល​មាន​ប័ណ្ណ​ការងារ​រួច​ហើយ ឬត្រូវបានអនុញ្ញាតឱ្យធ្វើការ ប៉ុន្តែមិនអាចសុំប័ណ្ណការងារតាមដំណាក់កាលបាន ដោយសារវិធានការត្រួតពិនិត្យ និងទប់ស្កាត់ការរីករាលដាលនៃជំងឺកូវីដ-១៩ អាចស្នាក់នៅក្នុងប្រទេសថៃ ដើម្បីបន្តធ្វើការរហូតដល់ថ្ងៃទី ១៣ ខែកុម្ភៈ ឆ្នាំ ២០២៣ ឬរយៈពេល ២ ឆ្នាំ គិតចាប់ពីថ្ងៃដែលការអនុញ្ញាត និងផុតកំណត់ រួមទាំងការពន្យារពេលស្វែងរកនិយោជកពី ៣០ថ្ងៃ ទៅ ៦០ថ្ងៃ ដែលអនុញ្ញាតឱ្យពលករបរទេសជាង ១០ម៉ឺននាក់ចូលធ្វើការ ជួយដោះស្រាយបញ្ហាជូននិយោជកដែលខ្វះខាតកម្លាំងពលកម្ម និងកាត់បន្ថយបន្ទុកចំណាយយ៉ាងច្រើន៕