ប្រភពពី New York Post
រូបភាព South African Medical Association
បកប្រែដោយ សូរ្យសែង៖
លោកស្រីវេជ្ជបណ្ឌិត អេងជេលិក គូតសៀ ប្រធានសមាគមគ្រូពេទ្យអាហ្វ្រិកខាងត្បូង ដែលបានរកឃើញមេរោគកូវីដ១៩ បំប្លែងថ្មី Omicron ឲ្យដឹងថា អាការអ្នកឆ្លងមិនមានសភាពធ្ងន់ធ្ងរទេ តែមានអាការប្លែកច្រើនយ៉ាង ។
លោកស្រីឲ្យដឹងទៀតថា កាលពីថ្ងៃទី ១៨ វិច្ឆិកា មានអ្នកជំងឺបានចូលមកព្យាបាលនៅគ្លីនិករបស់លោកស្រីនៅក្នុងទីក្រុងព្រីតូរៀ (Pretoria) ត្រួតឃើញវិជ្ជមាន តែមានអាការប្លែកពីអ្នកជំងឺកូវីដ១៩ ដែលលោកស្រីធ្លាប់ព្យាបាល គឺមិនមានអាការបាត់ក្លិន បាត់រសជាតិ មានក្អកបន្តិចបន្តួច ។
លោកស្រីបញ្ជាក់ដូច្នេះ «វាមិនធ្ងន់ធ្ងរទេ ប៉ុន្តែមានរោគសញ្ញាជាច្រើនដូចជា ឈឺសាច់ដុំ អស់កម្លាំងថ្ងៃទីពីរ និងញ័រខ្លួន ហើយឡូវនេះកំពុងព្យាបាលនៅផ្ទះ» វេជ្ជបណ្ឌិត គូតសៀ មានប្រសាសន៍ បើតាមសារព័ត៌មាន The Telegraph របស់ចក្រភពអង់គ្លេសផ្សាយ ។
លោកស្តី្របានប្រទះកុមារអាយុ ៦ ឆ្នាំ មានកម្តៅសីតុណ្ហភាពខ្ពស់ ជីពចរលោតលឿន នៅពេលព្យាបាលបាន ២ ថ្ងៃក៏មានអាការល្អឡើងវិញ ។ លោកស្រីណែនាំថា អ្នកជំងឺដែលមកព្យាបាលសុទ្ធតែមានសុខភាពល្អ ប៉ុន្តែគួរបារម្ភចំពោះមនុស្សអាយុខ្ពស់ ដែលមិនបានទទួលការចាក់វ៉ាក់សាំង ព្រោះមេរោគប្រភេទ Omicron មានផលប៉ះពាល់ចំពោះប្រភេទមនុស្សជំពូកនេះ ពិសេសអ្នកដែលមានជំងឺរ៉ាំរ៉ៃ ដូចជា ជំងឺទឹកនោមផ្អែម និង រោគបេះដូង ។
ឮដូច្នេះសូមកុំធ្វេសប្រហែស នៅតែអនុវត្ត ៣ ការពារ ៣កុំ របស់សម្តេចតេជោ ៕