ប្រភពពី prachachat
ដោយ សូរ្យសែង៖
៩ ខែក្រោយកងទ័ពមីយ៉ាន់ម៉ា ធ្វើរដ្ឋប្រហារកាលពីថ្ងៃទី ១ ខែកុម្ភៈ ឆ្នាំ ២០២១ បានធ្វើឱ្យជីវភាពរស់នៅរបស់មីយ៉ាន់ម៉ាកាន់តែយ៉ាប់យ៉ឺនទៅៗ ទាំងនឹងសិទ្ធិសេរីភាព រហូតដល់សេដ្ឋកិច្ច ព្រោះក្រោយយោធាដណ្តើមអំណាចពីរដ្ឋាភិបាលស៊ីវិល ក្រុមមូលធននៃក្រុមហ៊ុនពហុជាតិបានដកខ្លួនពីការវិនិយោគ គេចពីភាពចលាចលនយោបាយ រួមជាមួយនឹងស្ថានភាពជំងឺកូវីដ-១៩ ការរីករាលដាលធ្ងន់ធ្ងរទៀត ។
មុននេះ ធនាគារពិភពលោកបានប៉ាន់ប្រមាណថា សេដ្ឋកិច្ចរបស់មីយ៉ាន់ម៉ាឆ្នាំ ២០២១ នឹងធ្លាក់ចុះ ១៨% ហើយប្រសិនបើស្ថានការណ៍ក្នុងប្រទេសនៅតែមានភាពវឹកវរ វានឹងធ្វើឱ្យវិបត្តិសេដ្ឋកិច្ចអូសបន្លាយពីឆ្នាំ ២០២២ ដល់ឆ្នាំបន្តៗរហូត ។
គម្រោងការអភិវឌ្ឍន៍សហប្រជាជាតិ (UNDP) បានផ្សព្វផ្សាយក្នុងរបាយការណ៍សប្តាហ៍កន្លងមកថា ការស្ទង់មតិអំពីជីវភាពរបស់ប្រជាជនមីយ៉ាន់ម៉ា ១.២០០ គ្រួសារ ចាប់តាំងពីក្រោយរដ្ឋប្រហារ ១ កុម្ភៈ ឃើញថា ភាពក្រីក្រនៃគ្រួសារមីយ៉ាន់ម៉ាមានទំនោរទៅរក «ការធាក់ថយ» ក្នុងកម្រិតដែលមិនធ្លាប់មានពីមុនមក តាំងពីឆ្នាំ២០០៥ ឬមុនពេលប្រទេសនេះធ្វើកំណែទម្រង់នយោបាយ និងសេដ្ឋកិច្ចក្នុងឆ្នាំ ២០១១ ។
UNDP ដែលបានស្ទង់មតិទិន្នន័យសុខុមាលភាពគ្រួសារសម្រាប់ខែឧសភាដល់ខែមិថុនាឆ្នាំ ២០២១ បាននិយាយថា ផលវិបាកនៃវិបត្តិធ្ងន់ធ្ងរពីរដ្ឋប្រហារ បូកនឹងការរាតត្បាតជំងឺកូវីដ-១៩នេះនាំឱ្យអ្នករស់នៅក្នងទីប្រជុំជនមានចំណូលទាប ជាង ១,៩០ ដុល្លារ (ប្រមាណ ៧.៦០០រៀល)ក្នុងមួយថ្ងៃ សូម្បីតែវណ្ណៈកណ្តាលក្នុងប្រទេសមីយ៉ាន់ម៉ា ជាពិសេសដូចជាទីក្រុងយ៉ាំងហ្គោន ឬ ទីក្រុងម៉ាន់ថៈលឺយ នឹងរលាយរូប ដែលនឹងប៉ះពាល់ដល់សេដ្ឋកិច្ចយ៉ាងធ្ងន់ធ្ងរ ។
រស់នៅលើផ្លូវដែក៖ ភាពក្រីក្រនៅទីក្រុងយ៉ាំងហ្គោន ប្រទេសមីយ៉ាន់ម៉ា
UNDP បានព្យាករណ៍ថា នៅឆ្នាំក្រោយនឹងមានប្រជាជនមីយ៉ាន់ម៉ាដែលមានប្រាក់ចំណូលទាបជាងបន្ទាត់ភាពក្រីក្រ នឹងកើនឡើងទ្វេដងពី ២៤,៨% ទៅ ៤៦,៣% នៃចំនួនប្រជាជន ខណៈដែលសមាមាត្រនៃភាពក្រីក្ររបស់ប្រជាជននៅទីក្រុងនឹងកើនឡើងពី ១១,៣% ក្នុងឆ្នាំ ២០១៩ ដល់ ៣៧,២% នៅឆ្នាំ ២០២២ ។
មានន័យថា បច្ច័យពីមេរោគកូវីដ១៩ និងរដ្ឋប្រហារ អាចធ្វើឲ្យមនុស្សមីយ៉ាន់ម៉ាធ្លាក់ទៅក្នុងភាពក្រីក្រកើនឡើងយ៉ាងតិច ១២ លាននាក់ បើបូកទាំងអ្នកក្រីក្រពីមុនមានចំនួន ២៥ លាននាក់ ឬស្មើពាក់កណ្តាលនៃប្រជាជនទូទាំងប្រទេស ៥៥ លាននាក់ ក្លាយជាអ្នកក្រនៅដើមឆ្នាំ ២០២២ ដែលជាកម្រិតនៃភាពក្រីក្រមិនធ្លាប់មានតាំងពីឆ្នាំ ២០០៥ មក ៕