ប្រភព springnews
ដោយ សូរ្យសែង៖
ជនភៀសខ្លួនរ៉ូហ៊ីងយ៉ា មកពីប្រទេសមីយ៉ាន់ម៉ា បានប្រើឈ្មោះក្រុមហ៊ុន Edelson PC និង ក្រុមហ៊ុន Fields PLLC ដាក់ពាក្យប្ដឹងទាមទារប្រាក់ដ៏មហាសាលចំនួន ១៥០ ពាន់លានដុល្លារប្រឆាំងនឹង Meta Platforms ដែលជាម្ចាស់ប្រព័ន្ធផ្សព្វផ្សាយបណ្តាញសង្គម Facebook ដោយចោទថា ក្រុមហ៊ុន Faebook មិនមានចំណាត់ការអ្វីឡើយ ចំពោះភាពស្អប់ខ្ពើមប្រឆាំងនឹងជនជាតិរ៉ូហ៊ីងយ៉ា និងបានរួមចំណែកដល់អំពើហិង្សា ។
បណ្ដឹងនោះបញ្ជាក់ថា អសមត្ថភាពរបស់ Facebook ក្នុងការគ្រប់គ្រងមាតិកា និងការរចនាកន្លែងប្រព័ន្ធផ្សព្វផ្សាយ វាក៏បានរួមចំណែកដល់ការលាតត្រដាងនៃសហគមន៍រ៉ូហ៊ីងយ៉ាទៅនឹងអំពើហិង្សាក្នុងពិភពពិតផងដែរ ។
ពេលនេះ Facebook មិនមានយោបល់អ្វីភ្លាមទេ ប៉ុន្តែមុននេះមន្ត្រីក្រុមហ៊ុនបានទទួលស្គាល់ថា មានភាពយឺតយ៉ាវចំពោះការការពារទិន្នន័យ និងភាពស្អប់ខ្ពើមក្នុងប្រទេសមីយ៉ាន់ម៉ា ប៉ុន្តែចាប់តាំងពីពេលនោះមក ក្រុមហ៊ុនបាននិយាយថា ខ្លួនកំពុងធ្វើការដើម្បីបង្រ្កាបលើការប្រើប្រាស់ប្រព័ន្ធផ្សព្វផ្សាយសង្គមរបស់ខ្លួនខុស រួមទាំងការហាមឃាត់យោធាមីយ៉ាន់ម៉ាពី Facebook និង IG បន្ទាប់ពីរដ្ឋប្រហារថ្ងៃទី ១ ខែកុម្ភៈ ឆ្នាំ ២០២១ ។
Facebook និយាយថា ខ្លួនមិនទទួលខុសត្រូវចំពោះខ្លឹមសារដែលបានផ្សេះផ្សាយទេ ដោយអ្នកប្រើប្រាស់ យោងទៅតាមច្បាប់អ៊ីនធឺណែតរបស់សហរដ្ឋអាមេរិក ផ្នែកទី 230 ដែលចែងថា ចន្លោះអនឡាញមិនទទួលខុសត្រូវចំពោះខ្លឹមសារដែលបានផ្សព្វផ្សាយដោយភាគីទីបីនោះទេ ។
រ៉ូហ៊ីងយ៉ាជានរណា?
រ៉ូហ៊ីងយ៉ា គឺជាក្រុមជនជាតិភាគតិច កាន់សាសនាអីស្លាម ភាគច្រើនអាស្រ័យនៅក្នុងរដ្ឋយៈខៃ ភាគខាងលិចប្រទេសមីយ៉ាន់ម៉ា ជាប់ជាមួយប្រទេសបង់ក្លាដែស ។
ក្នុងខណៈដែលរ៉ូហ៊ីងយ៉ាអះអាងថា ពួកគេអាស្រ័យនៅក្នុងប្រទេសមីយ៉ាន់ម៉ាជាច្រើនតំណមនុស្សទៅហើយ ប៉ុន្តែរដ្ឋាភិបាលមីយ៉ាន់ម៉ាអះអាងថា ជនជាតិរ៉ូហ៊ីងយ៉ាជាមនុស្សចូលស្រុកខុសច្បាប់ ហើយមិនទទួលស្គាល់ថាជាពលរដ្ឋ នោះទើបធ្វើឲ្យជនជាតិរ៉ូហ៊ីងយ៉ា មិនទទួលបានសុខុមាលភាពពីរដ្ឋ ទាំងការថែទាំវេជ្ជសាស្រ្ត និងការអប់រំរួម បណ្តាលឲ្យគុណភាពជីវិតរបស់ប្រជាជនរ៉ូហ៊ីងយ៉ាបន្តធ្លាក់ចុះទាបទៅៗ ដោយជនជាតិរ៉ូហ៊ីងយ៉ាមានជម្លោះជាមួយរដ្ឋាភិបាលមីយ៉ាន់ម៉ាជានិច្ច ដោយសារតែពួកគេមានអារម្មណ៍ថាជនជាតិរបស់ពួកគេត្រូវបានរដ្ឋាភិបាលសង្កត់សង្កិន ។ បច្ចុប្បន្នជនជាតិរ៉ូហ៊ីងយ៉ាគឺជាអ្នកស្វែងរកសិទ្ធិជ្រកកោនដោយហិង្សានៅក្នុងប្រទេសជាង ១៧ ។
សោកនាដកម្មដ៏ធំបំផុត និងជាដំណឹងដ៏ក្រៀមក្រំបំផុតគឺជៀសមិនផុតកាលពីខែសីហា ឆ្នាំ 20១៧ ខណៈដែលជនជាតិមូស្លីមរ៉ូហ៊ីងយ៉ាជាង 730,000 នាក់បានភៀសខ្លួនចេញពីរដ្ឋយៈខៃក្នុងប្រទេសមីយ៉ាន់ម៉ា បន្ទាប់ពីកងទ័ពបានបង្ក្រាបពួកគេ ។ ជនភៀសខ្លួនទាំងនេះបានបញ្ជាក់ថាមានការសម្លាប់រង្គាល និងការរំលោភ ។ ក្រុមសិទ្ធិមនុស្សក៏បានកត់ត្រាការសម្លាប់ជនស៊ីវិល និងការដុតភូមិផងដែរ ខណៈអាជ្ញាធរមីយ៉ាន់ម៉ានិយាយ ពួកគេបានដោះស្រាយជាមួយកុបកម្ម និងបដិសេធថាពួកគេមិនបានប្រព្រឹត្តអំពើហឹង្សាជាប្រព័ន្ធទេ ។
ក្នុងឆ្នាំ ២០១៨ មន្ត្រីសិទ្ធិមនុស្សរបស់អង្គការសហប្រជាជាតិបាននិយាយថា ការប្រើប្រាស់ Facebook បានដើរតួនាទីយ៉ាងសំខាន់ក្នុងការផ្សព្វផ្សាយសារស្អប់ និងបញ្ឆេះអំពើហិង្សា ដោយមានការស៊ើបអង្កេតរបស់ កាសែត Reuters នៅឆ្នាំនោះ ដែលត្រូវបានយោងផងដែរនៅក្នុងបណ្តឹងនេះ បានកំណត់ឧទាហរណ៍ជាង 1.000 នៃការបង្ហោះ មតិយោបល់ និងរូបភាពដែលបានវាយប្រហារជនជាតិរ៉ូហ៊ីងយ៉ា និងជនមូស្លីមផ្សេងទៀតនៅលើ Facebook ហើយនៅពេលនោះ Facebook បានសារភាពថាខ្លួនបានចាត់វិធានការ «មិនគ្រប់គ្រាន់»ដើម្បីការពារអំពើហិង្សាជាមួយជនជាតិរ៉ូហ៊ីងយ៉ា ។
តុលាការឧក្រិដ្ឋកម្មអន្តរជាតិពិនិត្យមើលការចោទប្រកាន់ឧក្រិដ្ឋកម្មក្នុងតំបន់ និងក្នុងខែកញ្ញា ចៅក្រមសហព័ន្ធអាមេរិកបញ្ជាឱ្យ Facebook បង្ហាញគណនី (អាខោន)បិទដែលទាក់ទងនឹងអំពើហិង្សាលើជនជាតិរ៉ូហ៊ីងយ៉ានៅក្នុងប្រទេសមីយ៉ាន់ម៉ា ៕