កងទ័ពកូរ៉េខាងត្បូងបានថ្លែងថា មានជនជាតិកូរ៉េខាងត្បូងម្នាក់ បានលួចឆ្លងព្រំដែនដែលមានការការពារយ៉ាងរឹងមាំ ភៀសខ្លួនចុះចូលជាមួយប្រទេសកូរ៉េខាងជើង ដែលជារឿងមិនដែលកើតឡើងពីមុនទាល់តែសោះ ។
ក្រុមសេនាធិការចម្រុះកូរ៉េខាងត្បូងនិយាយទៀតថា ពួកគេបានស្រាវជ្រាវ ក្រោយឃើញបុគ្គលនោះបានស្ថិតនៅខាងតំបន់គ្មានកងទ័ពនៃកូរ៉េខាងជើង ហើយក៏បានជូនដំណឹងទៅខាងកូរ៉េខាងជើងតាមផ្នែកទាហាន ដើម្បីឲ្យឃុំគ្រងបុគ្គលនោះផង ។
ការឆ្លងព្រំដែនទៅដែនដីកូរ៉េខាងជើង គឺជាការខុសច្បាប់របស់កូរ៉េខាងត្បូង ។ កាលពីខែកញ្ញា ឆ្នាំ ២០២០ ប្រជានេសាទកូរ៉េខាងត្បូងធ្លាប់បាត់នៅកណ្តាលសមុទ្រ ហើយត្រូវកូរ៉េខាងជើងបាញ់ស្លាប់ ។ មេដឹកនាំកូរ៉េខាងជើង គីម ជុង-អ៊ុន បានប្រកាសអាសន្នបន្ទាន់ បិទព្រំដែនជាមួយកូរ៉េខាងត្បូងតាំងពីខែកក្កដា ដោយសារជនជាតិកូរ៉េខាងជើងម្នាក់បានលួចឆ្លងមកកូរ៉េខាងត្បូង ៕
ដោយ សាវុឌ្ឍ