ប្រភព dailynews
ដោយ សូរ្យសែង៖
ស្ថានការណ៍អន្តរជាតិនៅក្នុងតំបន់អាស៊ី-ប៉ាស៊ីហ្វិក ឆ្នាំ ២០២២ របាយការណ៍មួយនៅក្នុងទស្សនាវដ្តី The Diplomat ប្រាប់យើងឱ្យបើកភ្នែកតាមដានការផ្លាស់ប្តូរនយោបាយ ដែលនឹងកើតឡើងក្នុងប្រទេសជាច្រើន មានដូចជា ប្រទេស ហ្វីលីពីន កូរ៉េខាងត្បូង និងទីម័រខាងកើត នឹងមានការបោះឆ្នោតប្រធានាធិបតីតាមរបៀបវារៈ ចំណែកប្រទេសអូស្ត្រាលីនឹងមានការបោះឆ្នោតជាតិផងដែរ ។
ប្រទេសឥណ្ឌា និងជប៉ុននឹងមានការបោះឆ្នោតមូលដ្ឋាន ដែលទោះបីជាមិនមានផលប៉ះពាល់ដល់ការផ្លាស់ប្តូរការដឹកនាំប្រទេសក៏ដោយ ប៉ុន្តែនឹងប៉ះពាល់ដល់តុល្យភាពនៃអំណាចនយោបាយក្នុងប្រទេស ខណៈដែលចិននឹងត្រូវតែងតាំងឥស្សរជនច្រើនរូប នៃក្រុមថ្នាក់ដឹកនាំកណ្តាលក្នុងអំឡុងពេលសមាជបក្សកុម្មុយនិស្តចិនរៀងរាល់ប្រាំឆ្នាំម្តង ប៉ុន្តែមេដឹកនាំកំពូលរបស់ប្រទេសចិន ត្រូវបានប្រកាសជាមុនរួចហើយ គឺលោក ហ្ស៊ី ជិនពីង (Xi Jinping) ប្រធានាធិបតីបច្ចុប្បន្ន ។
ឆ្នាំ ២០២២ នឹងឆ្លុះបញ្ចាំងបញ្ហាធំនៅក្នុងតំបន់ និងនៅដំណើរការបន្ត ហើយទំនងជាមិនអាចបញ្ចប់ដោយល្អទេក្នុងឆ្នាំនេះ រួមទាំងវិបត្តិនយោបាយក្នុងប្រទេសមីយ៉ាន់ម៉ាផងដែរ និងក្រុមតាលីបង់ដែលបានវិលមកគ្រប់គ្រងអំណាចនៅអាហ្វហ្គានីស្ថានវិញ ។
នៅក្នុងឆ្នាំនេះផងដែរ ការរាតត្បាតនៃមេរោគកូវីដ១៩ នៅតែជាបញ្ហាធំ នៅជាការគំរាមកំហែងចំពោះប្រជាជនពិភព លោកបន្តភ្ជាប់ទៅឆ្នាំទី ៣ ។ គ្រប់ប្រទេសនៅក្នុងអាស៊ី-ប៉ាស៊ីហ្វិកនៅតស៊ូយ៉ាងលំបាក ជាមួយការនាំសេដ្ឋកិច្ចឲ្យរួចផុត និងស្តារឡើងវិញបន្ទាប់ពីការផ្ទុះឡើងនៃមេរោគកូវីដ១៩ ។
ការព្យាករណ៍ពីនិន្នាការសេដ្ឋកិច្ចនៅអាស៊ី-ប៉ាស៊ីហ្វិក របាយការណ៍ថ្មីបំផុតរបស់ធនាគារអភិវឌ្ឍន៍អាស៊ី (ADB) បានកាត់បន្ថយកំណើនសម្រាប់ប្រទេសកំពុងអភិវឌ្ឍន៍នៅក្នុងតំបន់ ចុះមកនៅត្រឹម ៥,៣ ភាគរយនៅឆ្នាំនេះ ពីការព្យាករណ៍ ៥,៤ ភាគរយនៅក្នុងខែកញ្ញាឆ្នាំមុន ដោយសារតែការផ្ទុះរលកថ្មី បណ្តាលឱ្យមានកំណើនយឺតនៅក្នុងត្រីមាសទីបីនៃឆ្នាំ ២០២១ និន្នាការអត្រាកំណើន ត្រូវបានកាត់បន្ថយស្ទើរតែគ្រប់អនុតំបន់ លើកលែងតែអាស៊ីកណ្តាល ។ អត្រាកំណើនកាលពីឆ្នាំមុន វាត្រូវបានគេរំពឹងថានឹងស្ថិតនៅ ៧,០% ពី ៧.១% ដែលបានប្រកាសនៅក្នុងខែកញ្ញា ។
ប្រធានសេដ្ឋវិទូស្តីទីរបស់ ADB លោក ចូសេប ហ្ស៊ីសលីស (Joseph Ziglish Jr.) បាននិយាយនៅក្នុងសេចក្តីថ្លែងការណ៍មួយថា ប្រទេសកំពុងអភិវឌ្ឍន៍នៅអាស៊ី-ប៉ាស៊ីហ្វិក មានវឌ្ឍនភាពជាបន្តបន្ទាប់ ក្នុងការដោះស្រាយជំងឺកូវីដ១៩ តាមរយៈការចាក់វ៉ាក់សាំង និងវិធានការទប់ស្កាត់ការរាតត្បាត ជំរុញនិន្នាការកំណើន នៅដើមឆ្នាំមុន ប៉ុន្តែការផ្ទុះឡើងថ្មីនៅក្នុងត្រីមាសទី ៣ បានរារាំងកំណើន GDP ហើយធ្វើឱ្យកាន់តែធ្ងន់ធ្ងរឡើងដោយវិបត្តិនៃមេរោគបំប្លែងថ្មីអូមីក្រុង (Omicron) ។
ហានិភ័យធំចំពោះនិន្នាការកំណើនសេដ្ឋកិច្ចនៅអាស៊ី-ប៉ាស៊ីហ្វិក នៅតែស្ថិតក្នុងការរីករាលដាលនៃកូវីដ១៩ ដែលកំពុងបន្ត អត្រាការចាក់វ៉ាក់សាំងពេញលេញ នៃប្រទេសកំពុងអភិវឌ្ឍន៍ក្នុងតំបន់គិតត្រឹមថ្ងៃទី ៣០ ខែវិច្ឆិកា ឆ្នាំមុន ខ្ពស់ជាងគួរឱ្យកត់សម្គាល់គឺ ៤៨,៧% ប៉ុន្តែតាមពីក្រោយសហរដ្ឋអាមេរិក ៥៨,១% និងអឺរ៉ុបនៅ ៦៧,២% ។ ប៉ុន្តែការចាក់វ៉ាក់សាំងឲ្យប្រជាជននៅតែមានភាពខុសគ្នារាល់ប្រទេសនីមួយៗក្នុងភូមិភាគ ពីខ្ពស់បំផុត ៩១,៩% នៃប្រទេសទាំងអស់ក្នុងសិង្ហបុរី រហូតមកដល់ទាបបំផុត ២,២% នៃប្រទេសប៉ាពួញូវហ្គីណេ ។
ADB កាត់បន្ថយការព្យាករណ៍អត្រាកំណើនសេដ្ឋកិច្ច នៃអនុតំបន់អាស៊ីបូព៌ាបានធ្លាក់ចុះ ០,១% ក្នុងឆ្នាំ ២០២១ និង ២០២២ មកនៅត្រឹម ៧,៥% និង ៥,០% តាមលំដាប់ ។ ចំណែកចិនដែលជាប្រទេសមហាសេដ្ឋីក្នុងអាស៊ី-ប៉ាស៊ីហ្វិក និងជាមហាអំណាចសេដ្ឋកិច្ចទីពីររបស់ពិភពលោក មានអត្រាកំណើននៅឆ្នាំ ២០២១ ចំនួន ៨,០% និង ៥,៣% នៅក្នុងឆ្នាំនេះ ។
សម្រាប់អនុភូមិភាគអាស៊ីអាគ្នេយ៍ ឆ្នាំ ២០២១ ADB បានបន្ថយអត្រាកំណើនរបស់ខ្លួនពី០,១% ទៅ ៣,០% ដោយសារការផ្ទុះឡើងនៃមេរោគ «ដែលតា (Delta)» ប៉ុន្តែនៅឆ្នាំនេះ អត្រានេះត្រូវបានគេរំពឹងថានឹងកើនឡើងដល់ ៥,១% ខណៈដែលប្រទេសជាច្រើនត្រូវបានគេរំពឹងថានឹងបន្ធូរបន្ថយវិធានការគ្រប់គ្រងជំងឺរាតត្បាត និងបន្តសកម្មភាពសេដ្ឋកិច្ចឡើងវិញ ។
អតិផរណាដែលរំពឹងទុកនៅអាស៊ី-ប៉ាស៊ីហ្វិក វានឹងនៅតែស្ថិតក្នុងកម្រិតគ្រប់គ្រង ២,១% ក្នុងឆ្នាំ ២០២១ និង ២,៧% នៅឆ្នាំនេះ ដែលនឹងធ្វើឱ្យវាកាន់តែងាយស្រួល ដើម្បីបង្កើតគោលនយោបាយហិរញ្ញវត្ថុ និងគាំទ្រកិច្ចខិតខំប្រឹងប្រែងស្តារឡើងវិញ ពីផលប៉ះពាល់នៃកូវីដ១៩ ៕