ដោយ សាវុឌ្ឍ៖
ប្រធានាធិបតីហ្វីលីពីន លោក រ៉ូដរីហ្គោ ឌូតេរតេ (Rodrigo Duterte) បានព្រមានដល់ប្រជាជនណាដែលមិនបានទទួលការវ៉ាក់សាំងការពារកូវីដ១៩ ថា គាត់នឹងត្រូវចាប់ខ្លួនប្រសិនបើមិនចេញពីផ្ទះដោយចចេស បន្ទាប់ពីមានអ្នកឆ្លងមេរោគអូកីក្រុងខ្ពស់ឡើង ត្រឹមរយៈពេល ៣ ខែសម្រាប់ការឆ្លងថ្មីប្រចាំថ្ងៃដែលមានច្រើនជាង ១៧.០០០ នាក់ ។
របាយការណ៍ពី Reuters និង AFP បាននិយាយថា ក្នុងសុន្ទរកថាតាមទូរទស្សន៍កាលពីយប់ថ្ងៃព្រហស្បតិ៍ ប្រធានាធិបតីហ្វីលីពីនបាននិយាយថា លោកបានជំរុញមេភូមិ និងមេសហគមន៍ តាមដានសមាជិកសហគមន៍ដែលមិនបានចាក់វ៉ាក់សាំង ហើយត្រូវប្រាកដថាមនុស្សទាំងនេះត្រូវបានបង្ខាំងនៅក្នុងផ្ទះរបស់ពួកគេ ព្រោះនេះជាគ្រោះអាសន្នជាតិ ប្រសិនបើបុគ្គលនោះបដិសេធ ហើយនៅតែចេញពីផ្ទះ ដើរលេងក្នុងសហគមន៍ ឬទៅកន្លែងផ្សេងៗ នឹងត្រូវចាប់ បើគាត់មិនព្រម អាជ្ញាធរអាចលេងធម៌ក្តៅ ។
នៅថ្ងៃព្រហស្បតិ៍ នេះបើតាមក្រសួងសុខាភិបាលហ្វីលីពីន ករណីថ្មីចំនួន ១៧.២២០ នៃមេរោគឆ្លងត្រូវបានរកឃើញ រួមទាំងឆ្លងមេរោគអូមីក្រុងផងដែរ សរុបទៅអ្នកឆ្លងក្នុងហ្វីលីពីនទាំងអស់មានចំនួន ២,៨៨ លាននាក់ ។
លោក ឌូតឺរតេ បាននិយាយថា «គាត់ទទួលខុសត្រូវចំពោះសុវត្ថិភាព និងសុខុមាលភាពរបស់ប្រជាជនហ្វីលីពីនទាំងអស់ ហើយអ្នកណាដែលមិនយល់ស្របនឹងបញ្ជារបស់គាត់អាចប្តឹងទៅតុលាការ» ។
ព័ត៌មាននៅចុងឆ្នាំកន្លង ប្រជាជនហ្វីលីពីនចំនួន ៤៩,៨ លាននាក់ត្រូវបានចាក់វ៉ាក់សាំងពេញលេញ ឬ ៤៥% ក្នុងចំនួនប្រជាជន ១១០ លាននាក់ អ្នកដែលមិនបានចាក់វ៉ាក់សាំងអាចចេញក្រៅផ្ទះបានតែក្នុងការធ្វើដំណើរចាំបាច់ ។
លោក ឌូតឺរតេ មានកេរ្តិ៍ឈ្មោះជាមេដឹកនាំមាត់ដាច កាលពីឆ្នាំមុនគាត់បានគំរាមអ៊ីចឹង អ្នកដែលបដិសេធការចាក់វ៉ាក់សាំងនឹងត្រូវជាប់គុក ឬចាក់ថ្នាំប៉ារ៉ាស៊ីត ថ្នាំ Ivermectin ៕