អត្ថបទ សូរ្យរិទ្ធ៖
«អ្នកផ្លាស់ប្តូរហ្គេមសេដ្ឋកិច្ច» គឺជាអ្វីដែលមន្ត្រីស្រីលង្កាហៅថា ទីក្រុងកំពង់ផែកូឡុំបូ (Colombo Port City) ដែលជាទីក្រុងថ្មីត្រូវបានសាងសង់នៅឆ្នេរសមុទ្រនៃរដ្ឋធានីស្រីលង្កា ។
ទីក្រុងមាត់សមុទ្រថ្មីនេះនៅជាប់សង្កាត់ពាណិជ្ជកម្មនៃទីក្រុងកូឡុំបូ ។ ការសាងសង់ទីក្រុងនេះប្រកបដោយបច្ចេកវិទ្យាខ្ពស់កំពុងដំណើរការចាក់បំពេញខ្សាច់ដ៏ធំចូលទៅក្នុងសមុទ្រ ជាទីតាំងនៃមជ្ឈមណ្ឌលហិរញ្ញវត្ថុអន្តរជាតិ ជាកន្លែងស្នាក់នៅ និងជាច្រក ដូចជាឌូបៃ ម៉ូណាកូ ឬ ហុងកុង។
លោក សាលីយ៉ា វីក្រាម៉ាស៊ូរីយ៉ា (Saliya Vikramasuriya) សមាជិកម្នាក់នៃគណៈកម្មការសេដ្ឋកិច្ចទីក្រុងកំពង់ផែកូឡុំបូបានប្រាប់កាសែត BBC ថា គម្រោងកែច្នៃសមុទ្រនេះនឹងផ្តល់ឱកាសដល់ស្រីលង្កាក្នុងការគូសផែនទីឡើងវិញ និងកសាងទីក្រុងលំដាប់ពិភពលោកសម្រាប់ប្រកួតប្រជែងជាមួយទីក្រុងឌូបៃ និងសិង្ហបុរី ។
ប៉ុន្តែអ្នកប្រឆាំងចោទសួរថា តើទីក្រុងនេះពិតជាអាចក្លាយការផ្លាស់ប្តូរហ្គេមសេដ្ឋកិច្ចរបស់ប្រទេសស្រីលង្កាបានប៉ុនណា?
ការចាប់ផ្តើមគម្រោងការកែឆ្នៃសមុទ្រដើម្បីទទួលបានដីថ្មីទំហំ ២,៦ គីឡូម៉ែត្រការ៉េ ប្រទេសស្រីលង្កានឹងត្រូវការវិនិយោគពីក្រុមហ៊ុន China Harbor Engineering Company-CHEC ចំនួន ១,៤ ពាន់លានដុល្លារអាមេរិក ដែលខាងក្រុមហ៊ុនចិនទទួលបានសិទ្ធិលើកំពង់ផែនេះចំនួន ៤៣% សម្រាប់រយៈពេល ៩៩ ឆ្នាំ ។
ក្រោយការកសាងជាច្រើនឆ្នាំ សំណង់បានដំណើរការទៅដោយរលូន ហើយបានប្រែរូបរាងឡើងមកហើយ ។
មន្ត្រីស្រីលង្កានិយាយថា គម្រោងការសាងសង់នេះមានជាលើកដំបូងក្នុងប្រទេសអាស៊ីខាងត្បូងមួយនេះ ហើយត្រូវប្រើពេល ២៥ ឆ្នាំទើបបញ្ចប់ ។
ស្រីលង្កា និយាយថា ទឹកដីស្ថិតក្រោមការគ្រប់គ្រងរបស់ស្រីលង្កា និងតំបន់ដែលប្រគល់ឱ្យចិន វានឹងត្រូវបានជួលទៅឱ្យសាជីវកម្មពហុជាតិ ធនាគារ និងសាជីវកម្មផ្សេងៗទៀត ហើយរដ្ឋាភិបាលក៏អាចយកពន្ធលើប្រាក់ចំណូលរបស់ក្រុមហ៊ុនទាំងនេះផងដែរ។
ប្រជាជនប្រហែល ៨០.០០០ នាក់ត្រូវបានគេរំពឹងថានឹងរស់នៅក្នុងទីក្រុងថ្មីនេះ ហើយការលើកលែងពន្ធនឹងត្រូវបានផ្តល់ដល់អ្នកវិនិយោគ និងធ្វើអាជីវកម្មនៅក្នុងទីក្រុងនេះ រាល់ប្រតិបត្តិការនៅក្នុងតំបន់សេដ្ឋកិច្ចពិសេសនេះ គិតជាដុល្លារអាមេរិក។
គម្រោងទីក្រុងកំពង់ផែនេះត្រូវបានសម្ពោធធ្វើជាផ្លូវការ ក្នុងអំឡុងពេលដំណើរទស្សនកិច្ចរបស់ប្រធានាធិបតីចិនលោក ហ្ស៊ី ជិនពីង (Xi Jinping) ទៅកាន់ទីក្រុងកូឡុំបូក្នុងឆ្នាំ ២០១៤ គឺមួយឆ្នាំបន្ទាប់ពីលោកបានចាប់ផ្តើមគំនិតផ្តួចផ្តើមខ្សែក្រវ៉ាត់ និងផ្លូវ ដែលជាការប្រកួតប្រជែងក្នុងការកសាងផ្លូវថ្នល់ ផ្លូវដែក និងហេដ្ឋារចនាសម្ព័ន្ធផ្លូវសមុទ្រនៅទូទាំងអាស៊ី និងអឺរ៉ុប ដើម្បីជំរុញពាណិជ្ជកម្ម ។
ស្រីលង្កាបានស្នើការឧបត្ថម្ភថវិកាពីចិនដើម្បីស្តារប្រទេស ក្រោយពីសង្គ្រាមដ៏អូសបន្លាយពីភាគីបែងចែកទឹកដីទមិឡក្នុងឆ្នាំ ២០០៩ ស្របពេលដែលប្រទេសលោកខាងលិចមានកង្វល់ទ្វេឡើងអំពីការល្មើសសិទ្ធិមនុស្ស ។
ក្នុងពេលលោក ហ្ស៊ី ធ្វើទស្សនកិច្ចនៅស្រីលង្កា លោក ហិន្ទ្រា រ៉ាចប៉ាក់សា ជាប្រធានាធិបតី ប៉ុន្តែគាត់បានចាញ់ឆ្នោតក្នុងឆ្នាំដដែល ដោយសារពាក់ព័ន្ធនឹងកម្ចីថវិការបស់ចិន ពិសេសរឿងសាងសង់កំពង់ផែខ្នាតធំនៅភាគខាងត្បូងហេមបាន់តូតា ។
៨ ឆ្នាំបន្ទាប់មក លោក រ៉ាចប៉ាក់សា បានត្រឡប់មកគ្រងអំណាចជាថ្មី ក្នុងតំណែងនាយករដ្ឋមន្ត្រី ដោយមានលោក កូតាបាយ៉ា ប្អូនប្រុសរបស់គាត់កាន់តំណែងជាប្រធានាធិបតី ប៉ុន្តែកំពង់ផែហេមបាន់តូតា មិនបានស្ថិតក្នុងដៃស្រីលង្កាទៀតទេ ។ ក្រោមរដ្ឋាភិបាលឈុតថ្មីក្នុងឆ្នាំ ២០១៧ ស្រីលង្កាបានប្រគល់កំពង់ផែនេះឲ្យចិនគ្រប់គ្រង ក្រោយពីប្រឈមនឹងបញ្ហាបំណុលពីក្រុមហ៊ុនផ្សេងៗរបស់ចិន ។ មានរបាយការណ៍ថា ប្រាក់ដែលស្រីលង្កាទទួលមក សុទ្ធតែយកទៅសងបំណុលផ្សេងៗ ។
វាមិនមែនជារឿងប្លែកចិត្តទេ ហើយក៏មិនមែនមនុស្សស្រីលង្កាគ្រប់គ្នាយល់ស្របជាមួយអាជ្ញាធរដែរ គឺនិយាយដល់នយោបាយនៃគម្រោងការនេះផងដែរ ។ ការព្រួយបារម្ភអំពីគម្រោងនេះមានច្រើនណាស់ រួមទាំងផលប៉ះពាល់បរិស្ថានផង ។ មនុស្សជាច្រើនភ័យខ្លាចរឿងនោះ ផលប្រយោជន៍ពីការអភិវឌ្ឍនេះនឹងមិនផ្តល់ច្រើនដល់ប្រទេសដូចការអះអាងរបស់អ្នកគាំទ្រគម្រោងនោះទេ ។
«គុណវិបត្តិមួយដែលអាចកើតមានអំពីទីក្រុងកំពង់ផែនេះគឺ ការលើកលែង ឬការកាត់បន្ថយពន្ធយ៉ាងច្រើនមហាសាលនៅក្នុងច្បាប់របស់ទីក្រុង វាមានភាពចាំបាច់មួយ ។ លោក ដេឆាល ដឺ មេល (Dechal de Mel) សេដ្ឋវិទូនៅស្ថាប័ន Verite Research បាននិយាយថា ការលើកទឹកចិត្តផ្នែកពន្ធត្រូវបានផ្តល់ឱ្យអ្នកវិនិយោគមួយចំនួនរហូតដល់ ៤០ ឆ្នាំ។ «ការលើកលែងពន្ធ និងការកាត់បន្ថយជាច្រើនមិនបង្កើនប្រាក់ចំណូលសរុបរបស់ប្រទេសស្រីលង្កានោះទេ» ។ កម្មវិធីពន្ធនេះក៏បានលើកឡើងពីកង្វល់ផ្សេងទៀតផងដែរ ដោយសហរដ្ឋអាមេរិកបានព្រមានពីបរិយាកាសធុរកិច្ចខ្សោយ វាអាចក្លាយជាឋានសួគ៌របស់អ្នកលាងលុយ ។
រដ្ឋមន្ត្រីក្រសួងយុត្តិធម៌ស្រីលង្កា មហាម៉េដ អាលី សាប៊្រី (Mohamed Ali Sabri) មិនយល់ស្របនឹងការបារម្ភនេះទេ ។ «គ្មានផ្លូវដែលអាចកើតឡើងទេ ព្រោះនៅទីនេះយើងមានច្បាប់ព្រហ្មទណ្ឌធម្មតា ច្បាប់លាងលុយកខ្វក់ ហើយយើងមានភាពឆ្លាតវៃផ្នែកហិរញ្ញវត្ថុរបស់យើង ដូច្នេះជាមួយនឹងរឿងទាំងអស់នេះ វាគ្មានផ្លូវដែលនរណាម្នាក់អាចគេចផុតបាន»។
តួនាទីកាន់តែធំរបស់ចិននៅលើឆាកពិភពលោកនេះ បានបង្កើនក្តីបារម្ភជាច្រើនអំពីគោលដៅមហិច្ឆតាយុទ្ធសាស្ត្ររយៈពេលវែង ។ លំហូររបស់ចិនចូលទៅកាន់ស្រីលង្កា ធ្វើឱ្យឥណ្ឌាព្រួយបារម្ភ ដោយសារតែស្រីលង្កាត្រូវបានគេមើលឃើញថា គាត់តែងតែជាអ្នកជិតខាងជិតស្និទ្ធរបស់ឥណ្ឌា។
គម្រោងទីក្រុងកំពង់ផែមានគោលបំណងទាក់ទាញសាជីវកម្មចម្រុះជាតិសាសន៍ និងអ្នកវិនិយោគមួយចំនួនធំដែលមានមូលដ្ឋានរួចហើយនៅក្នុងប្រទេសឥណ្ឌា ដែលជាលទ្ធផល ឥណ្ឌាអាចនឹងបាត់បង់ការវិនិយោគ និងឱកាសការងារ ។
ប៉ុន្តែអ្នកខ្លះនិយាយថា ស្រីលង្កាមានរឿងដែលត្រូវភ័យខ្លាចពីគម្រោងទីក្រុងកំពង់ផែ កូឡុំបូ (Colombo) ដែរ ។
ទីក្រុងកំពង់ផែ កូឡុំបូ ទំនងជានឹងក្លាយទៅជាកន្លែងឈរជើងរយៈពេលវែងរបស់ចិន ដូចកំពង់ផែហេមបាន់តូតាមែនទេ?
«នាពេលបច្ចុប្បន្ននេះ ការដែលរដ្ឋាភិបាលយល់ព្រមឲ្យចិន អ្វីគ្រប់យ៉ាងចិនបានដណ្តើមនៅក្នុងទីក្រុងហើយ» ។ នេះសម្តីរបស់សមាជិកសភាបក្សប្រឆាំងរបស់ប្រទេសស្រីលង្កា រ៉ាស៊ីតា សេណារ៉ាត់ណេ (Rashita Senaratne) បានប្រាប់ BBC ។
អ្នកជំនាញចិន Zhou Bo មិនយល់ស្របទេ ដោយនិយាយថា គោលដៅគឺជាផលប្រយោជន៍របស់ប្រទេសទាំងពីរ ។ «គម្រោងខ្សែក្រវ៉ាត់ និងផ្លូវរបស់ប្រទេសចិន មិនមែនជាគម្រោងសប្បុរសធម៌ទេ យើងទាំងអស់គ្នាចង់បានផលប្រយោជន៍ទៅវិញទៅមក នោះមានន័យថា យើងទាំងអស់គ្នាចង់ឱ្យការវិនិយោគរបស់យើងទទួលបានផលចំណេញផ្នែកសេដ្ឋកិច្ច» ។ លោក Zhou អតីតវរសេនីយ៍ឯកជាន់ខ្ពស់នៅក្នុងកងទ័ពរំដោះប្រជាជនចិន បច្ចុប្បន្នធ្វើការនៅសាកលវិទ្យាល័យ Tsinghua ក្នុងទីក្រុងប៉េកាំង បានប្រាប់ BBC ថា «ចិនគ្មានចេតនាដាក់ប្រទេសណាមួយក្នុងអន្ទាក់បំណុលនោះទេ»។
ខាងស្រីលង្កានិយាយថា «តំបន់ទាំងមូលស្ថិតនៅក្នុងការគ្រប់គ្រងអធិបតេយ្យភាពរបស់ប្រទេសស្រីលង្កា សិទ្ធិក្នុងការល្បាត, ប៉ូលីស, អន្តោប្រវេសន៍ និងភារកិច្ចសន្តិសុខជាតិផ្សេងទៀត ជាតួនាទីរបស់រដ្ឋាភិបាលស្រីលង្កា ។
ប៉ុន្តែប្រទេសស្រីលង្កា ដែលកំពុងឆ្លងកាត់វិបត្តិសេដ្ឋកិច្ចមិនធ្លាប់មាន គឺមេរោគរាតត្បាតបានបំផ្លិចបំផ្លាញដល់វិស័យទេសចរណ៍ និងធ្វើឱ្យការងារនៅបរទេសធ្លាក់ចុះ ជាលទ្ធផល ទុនបម្រុងរូបិយប័ណ្ណបរទេសបានធ្លាក់ចុះ ។
បំណុលបរទេសរបស់ប្រទេសស្រីលង្កាបានកើនឡើងដល់ជាង ៤៥.០០០ លានដុល្លារ ជាមួយនឹងបំណុលចិនប្រមាណ ៨.០០០ លានដុល្លារអាមេរិក ។
នៅពេលដែលស្រីលង្កាត្រូវការជំនួយផ្នែកហិរញ្ញវត្ថុ សប្ដាហ៍មុនបានស្នើលោក ហ្វាង អ៊ី (Wang Yi) រដ្ឋមន្ត្រីក្រសួងការបរទេសចិន ដែលទៅបំពេញទស្សនកិច្ចនៅប្រទេសស្រីលង្កា ដើម្បីជួយរៀបចំរចនាសម្ព័ន្ធការសងបំណុលឡើងវិញ ។
ប៉ុន្តែទីភ្នាក់ងារវាយតម្លៃឥណទានអន្តរជាតិមួយចំនួន បានទម្លាក់ចំណាត់ថ្នាក់ឥណទានរបស់ប្រទេសស្រីលង្កាជាច្រើនដង ដូច្នេះ ឱកាសរបស់រដ្ឋាភិបាលស្រីលង្កាអាចខ្ចីប្រាក់ពីអ្នកវិនិយោគអន្តរជាតិមានកម្រិតតិចតួច ។ មានតែប្រទេសចិនទេដែលមានគោលដៅរយៈពេលវែង ប៉ុន្តែអាចមានលក្ខខណ្ឌជាច្រើន អ្នកខ្លះជឿ ទីក្រុងដូចហុងកុងនៅស្រីលង្កានេះនឹងជួយចិនត្រួតត្រាផ្នែកអាស៊ីនេះសម្រាប់ឆ្នាំខាងមុខៗ ។
និន្នាការក្នុងសកលលោកនាពេលបច្ចុប្បន្ន អ្វីដែលចិនលូកដៃទៅជួយប្រទេសណា គឺហាក់ដូចមានដុំថ្មដ៏ធំទៅសង្កត់ដើមទ្រូងលោកខាងលិច ពិសេសសហរដ្ឋអាមេរិក ដែលចោលភ្នែកក្នុងផ្លូវអាក្រក់ ។ វាមិនខុខសពីកំពង់ផែរាមរបស់កម្ពុជា ដែលនាំគ្នាដុកដាន់ចោទម្តងហើយម្តងទៀតថា គឺជារឿងយុទ្ធសាស្រ្តរបស់យោធាចិន ដែលច្បាមថាមពលអំណាចនៅប្រទេសអាស៊ី-ប៉ាស៊ីហ្វិក ។
ថ្មីៗនេះ សហរដ្ឋអាមេរិកគ្រាន់តែប្រទះឃើញកប៉ាល់បូមខ្សាច់ពីរគ្រឿងកំពុងប្រតិបត្តិការបូមខ្សាច់នៅតំបន់មូលដ្ឋានកងទ័ពជើងទឹករាម ចោទថាសម្រាប់ការចូលចតនៃកប៉ាល់យោធាធំៗ! ប៉ុន្តែមន្រ្តីជាន់ខ្ពស់ក្រសួងការពារជាតិកម្ពុជា នៅថ្ងៃចន្ទ ទី ២៤ មក ឆ្នាំ ២០២២ បានបញ្ជាក់ប្រាប់វិទ្យុបារាំងអន្តរជាតិថា ការអភិវឌ្ឍមូលដ្ឋានកងទ័ពជើងទឹករាមនាពេលបច្ចុប្បន្ន គឺជាការធ្វើទំនើបកម្មវិស័យកងទ័ពកម្ពុជាសុទ្ធសាធ ។
សម្តេចតេជោ នាយករដ្ឋមន្ត្រី ក៏ធ្លាប់បានបញ្ជាក់ច្រើនដងហើយថា កម្ពុជាមិនអនុញ្ញាតឲ្យយោធាបរទេសណាមួយ មានវត្តមាននៅលើទឹកដីកម្ពុជាឡើយ ៕