ពូជសត្វថ្មី ២២៤ ប្រភេទរកឃើញនៅក្នុងអនុតំបន់ទន្លេមេគង្គ

ព័ត៌មានសង្គមថ្ងៃព្រហស្បត្តិ៍ ទី27 ខែមករា ឆ្នាំ2022 ម៉ោង 7:08 នាទី ល្ងាច

អត្ថបទ ម៉ារ៉ា ៖

អង្គការអភិរក្សធម្មជាតិ «មូលនិធិសត្វព្រៃពិភពលោក» បាននិយាយនៅក្នុងរបាយការណ៍មួយកាលពីថ្ងៃពុធ ទី ២៦ មករាថា ប្រភេទសត្វថ្មីចំនួន ២២៤ ត្រូវបានគេរកឃើញនៅក្នុងអនុតំបន់មេគង្គក្នុងឆ្នាំ ២០២១ ទោះបីជាមានការគំរាមកំហែងយ៉ាងធ្ងន់ធ្ងរដល់ទីជម្រកក៏ដោយ ។

នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៦ ខែមករា ឆ្នាំ២០២២ នេះថា មូលនិធិសត្វព្រៃពិភពលោក (WWF) បានចេញផ្សាយរបាយការណ៍នៅថ្ងៃដដែលនោះ កាលពីឆ្នាំមុន ប្រភេទសត្វថ្មីចំនួន ២២៤ ត្រូវបានគេរកឃើញនៅក្នុងអនុតំបន់មេគង្គ ដែលគ្របដណ្តប់ប្រទេសថៃ មីយ៉ាន់ម៉ា កម្ពុជា លាវ និងវៀតណាម ដោយសត្វដែលទើបរកឃើញថ្មីៗដូចជា ពូជជីងចក់ដៃវែងនៅប្រទេសថៃ ដើមម្រុំថ្មីនៅវៀតណាម, សត្វស្វាដែលដាក់ឈ្មោះតាមភ្នំភ្លើង, ពូជប្ញស្សីថ្មីសម្រាប់ដុះនៅតំបន់ស្ងួត និងកង្កែបក្បាលធំនៅប្រទេសកម្ពុជា និងវៀតណាម ដែលប្រឈមមុខនឹងហានិភ័យនៃការកាប់បំផ្លាញព្រៃឈើលិចទឹក ។

W.W.F. បាននិយាយថា ការរកឃើញប្រភេទពូជសត្វថ្មីទាំងនេះបង្ហាញពីជីវចម្រុះដ៏សម្បូរបែបនៃអនុតំបន់ទន្លេមេគង្គ ហើយវាគឺជាសក្ខីភាពនៃភាពធន់របស់ធម្មជាតិចំពោះការរស់រានមានជីវិតនៅក្នុងជម្រកធម្មជាតិដែលបាតខ្ចាត់ខ្ចាយ និងរិចរិល។

លោក ខេ. យ៉ូកាណាន (K. Yokanan) ប្រធានតំបន់អាងទឹកទន្លេមេគង្គនៃអង្គការ WWF ក្នុងវិស័យសត្វព្រៃ និងឧក្រិដ្ឋកម្មសត្វព្រៃ បាននិយាយថា ប្រភេទសត្វនេះគឺជាផលិតផលតែមួយគត់ និងស្រស់ស្អាតនៃការវិវត្តន៍រាប់លានឆ្នាំ ប៉ុន្តែស្ថិតនៅក្រោមការគំរាមកំហែងយ៉ាងធ្ងន់ធ្ងរ ដោយប្រភេទសត្វជាច្រើនបានផុតពូជតាំងពីមុនដែលប្រភេទនោះនឹងត្រូវបានចាត់លំដាប់ថ្នាក់ ។

របាយការណ៍របស់អង្គការសហប្រជាជាតិកាលពីឆ្នាំមុនបាននិយាយថា ការលួចជួញដូរសត្វព្រៃនៅអាស៊ីអាគ្នេយ៍កំពុងកើនឡើង បន្ទាប់ពីផ្អាកបណ្ដោះអាសន្នដោយសារបទប្បញ្ញត្តិគ្រប់គ្រងកូវីដ-១៩ នោះបានធ្វើឲ្យប្រទេសជាច្រើនបិទព្រំដែនរបស់ខ្លួន និងមានការត្រួតពិនិត្យកាន់តែតឹងរ៉ឹង ៕