ដោយ សាវុឌ្ឍ៖
សហប្រជាជាតិ (UN) បានអំពាវនាវរកថវិកាដើម្បីជួយផ្នែកមនុស្សធម៌ចំនួន ៨២៦ លានដុល្លារសហរដ្ឋអាមេរិក ចំពោះប្រជាជនមីយ៉ាន់ម៉ាប្រមាណ ៦,២លាននាក់នៅក្នុងឆ្នាំ ២០២២នេះ ដែលធ្លាក់ក្នុងស្ថានភាពធ្ងន់ធ្ងរមិនធ្លាប់មានពីមុន។
UN និយាយថា ក្រោយការដណ្តើមអំណាចរដ្ឋប្រហារបាន ១ ឆ្នាំ ការបារម្ភខាងសេដ្ឋកិច្ចធ្វើឲ្យមនុស្សជាច្រើននៅក្នុងប្រទេសមីយ៉ាន់ម៉ា មិនអាចផ្គត់ផ្គង់គ្រួសាររបស់ពួកគេបាន ។ អង្គការសហប្រជាជាតិបានប៉ាន់ប្រមាណថា ប្រជាជនចំនួន ២៤ លាននាក់ក្នុងចំណោមប្រជាជន ៥៤ លាននាក់ ស្ថិតក្នុងភាពក្រីក្រ ហើយ ១៤,៤ លាននាក់កំពុងត្រូវការជំនួយមនុស្សធម៌ ក្នុងនោះរួមមានកុមារ ៥ លាននាក់ ។
អង្គការសហប្រជាជាតិសង្ឃឹមថា អាចផ្តល់ជំនួយមនុស្សធម៌ដល់ប្រជាជន ៦,២ លាននាក់នៅក្នុងភាពក្រីក្រយ៉ាងខ្លាំង ដោយប្រកាសពីផែនការស្នើសុំជំនួយច្រើនជាងពីរដងធៀបនឹងឆ្នាំមុន គឺខ្ពស់បំផុតក្នុងប្រវត្តិសាស្ត្ររបស់មីយ៉ាន់ម៉ា ។
លោក ចេន ឡឺកា (Jens Lerka) អ្នកនាំពាក្យទីភ្នាក់ងារមនុស្សធម៌របស់អង្គការសហប្រជាជាតិ បាននិយាយថា ភាពចលាចលផ្នែកសេដ្ឋកិច្ច និងនយោបាយក្នុងឆ្នាំ ២០២១ គួបផ្សំជាមួយនឹងផលប៉ះពាល់ដ៏ធ្ងន់ធ្ងរនៃជំងឺរាតត្បាតមេរោគកូវីដ១៩ ផង ជំរុញឲ្យប្រជាជនមីយ៉ាន់ម៉ាពាក់កណ្តាលធ្លាក់ក្នុងភាពក្រីក្រ ។ មនុស្សជាច្រើនមិនអាចផ្គត់ផ្គង់គ្រួសាររបស់ពួកគេបានទៀតទេ ដោយសារភាពអត់ការងារធ្វើ និងបាត់បង់ប្រាក់ចំណូល ខណៈពេលដែលតម្លៃអាហារកំពុងកើនឡើងខ្ពស់ ។
ការិយាល័យសិទ្ធិមនុស្សរបស់អង្គការសហប្រជាជាតិបានបញ្ជាក់ដូច្នេះថា ចាប់តាំងពីរដ្ឋប្រហារមួយឆ្នាំមក យ៉ាងហោចណាស់មានជនជាតិមីយ៉ាន់ម៉ាចំនួន ១.៥០០ នាក់ត្រូវបានសម្លាប់ដោយកងទ័ពក្រោមការបង្រ្កាបយ៉ាងឃោរឃៅ មនុស្សរាប់ពាន់នាក់ទៀតត្រូវបានសម្លាប់ក្នុងការប្រយុទ្ធគ្នាយ៉ាងរោលរាល និងអំពើហិង្សា ជាមួយនឹងមនុស្សជាង ៤០០.០០០ នាក់ត្រូវបានផ្លាស់ទីលំនៅ ។
ក្នុងរឿងជួយផ្នែកមនុស្សធម៌ទៅមីយ៉ាន់ម៉ា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានប្តូរវេនអាស៊ានឆ្នាំនេះ ក៏បានលើកឡើងពីវារៈដំបូង នូវការយកចិត្តទុកដាក់ទៅលើជំនួយមនុស្សធម៌សម្រាប់ប្រទេសមីយ៉ាន់ម៉ាផងដែរ ៕