ក្រសួងការពារជាតិរុស្ស៊ីប្រកាសថា មានបញ្ជាឲ្យដកទ័ពចេញខ្លះពីព្រំដែនប្រទេសអ៊ុយក្រែន ក្រោយពីបានបញ្ចប់ការសមយុទ្ធខាងយោធារួចមក ។
ទីភ្នាក់ងារ Inter-Fax របស់រុស្ស៊ីរាយការណ៍ថា ក្រោយពីបានបញ្ចប់ការធ្វើសមយុទ្ធយោធាដ៏ធំនៅភាគខាងត្បូង និងខាងលិចមក កម្លាំងបានដកត្រឡប់ទៅមូលដ្ឋានវិញហើយ ។
ចំណែកសារព័ត៌មាន RIA របស់រុស្ស៊ីបានផ្សាយរូបភាពវីដេអូ សម្តែងឲ្យឃើញការចល័តរថក្រោះ និងរថពាសដែក បើកឡើងរថភ្លើង ក្រៅពីនេះក៏មានរថយន្តផ្ទុកយុទ្ធភណ្ឌធុនធ្ងន់ និងកងកម្លាំងរុស្ស៊ីត្រឡប់ទៅមូលដ្ឋានទ័ពរបស់ខ្លួនវិញ ។
តែព័ត៌មានចារកម្មសហរដ្ឋអាមេរិក និងអង់គ្លេស បាននិយាយដូច្នេះថា រុស្ស៊ីកំពុងត្រៀមជាស្រេចដើម្បីចូលឈ្លានពានអ៊ុយក្រែនគ្រប់ពេល ហើយអះអាងថា ការវាយចូលរបសយោធារុស្ស៊ី អាចកើតឡើងនៅថ្ងៃទី ១៦ កុម្ភៈស្អែកនេះ ។
ក្រោយការប្រកាសដកទ័ពរបស់រុស្ស៊ី បានធ្វើឲ្យប្រាក់រូប្លិ៍ឡើងថ្លៃ ១,៥% ស្របពេលដែលប្រាក់អឺរ៉ូក៏ឡើងថ្លៃដូចគ្នា បើធៀបនឹងប្រាក់ដុល្លារសហរដ្ឋាអាមេរិកឡើងថ្លៃ ០,៤% មកនៅ ១,១៣៤៦ ដុល្លារ ឯទីផ្សារអចលនទ្រព្យទិញ-លក់ក៏ឡើងដូចគ្នា ៕