អត្ថបទ សូរ្យសែង៖
ប្រធានាធិបតីស៊ីរី លោក បាសារ អាល់-អាសាដ (Bashar al-Assad) បានសន្ទនាតាមទូរស័ព្ទជាមួយលោកប្រធានា ធិបតីរុស្ស៊ី វ៉្លាឌីមៀរ ពូទីន (Vladimir Putin) មួយថ្ងៃក្រោយការវាយប្រហារ ដោយសម្តែងការពេញចិត្តចំពោះការលុក លុយរបស់រុស្ស៊ីលើអ៊ុយក្រែន ដែលបានចង្អុលបង្ហាញថា ជាការដោះស្រាយប្រវត្តិសាស្រ្ត និងស្តារតុល្យភាពនៃសណ្តាប់ធ្នាប់ពិភពលោក បន្ទាប់ពីការដួលរលំនៃសហភាពសូវៀត ។ ស្របពេលជាមួយគ្នានេះដែរ អ្នកនាំពាក្យរដ្ឋាភិបាលយោធា មីយ៉ាន់ម៉ាថ្លែងថា ក៏សូមគាំទ្រកងទ័ពរុស្ស៊ី គឺជាការត្រឹមត្រូវក្នុងការរក្សាអធិបតេយ្យភាពប្រកបដោយនិរន្តរភាព ។
រូបឯកសារ ប្រធានាធិបតីស៊ីរី បាសារ អាល់-អាសាដ ចាប់ដៃជាមួយលោកប្រធានាធិបតី ពូទីន (Getty Images)
លោក អាសាដ ក៏បានប្រាប់លោក ពូទីន ទៀតថា ស៊ីរីឈរជាមួយរុស្ស៊ី ស្ថិតលើមូលដ្ឋាននៃការជឿជាក់ជំហរត្រឹមត្រូវ ហើយដោយសារការប្រឈមមុខនឹងការពង្រីកអង្គការណាតូជាសិទ្ធិរបស់រុស្ស៊ី បស្ចិមប្រទេសក៏ទទួលខុសត្រូវចំពោះភាពចលាចល និងការបង្ហូរឈាមផងដែរ ដោយប្រើល្បិចកខ្វក់ដើម្បីគាំទ្រភេរវជននៅស៊ីរី និងពួកណាស៊ីនៅអ៊ុយក្រែន ។
មេដឹកនាំរុស្ស៊ីជាសម្ព័ន្ធមិត្តសំខាន់របស់លោក អាសាដ លោកបានសម្រេចចិត្តធ្វើអន្តរាគមន៍ក្នុងសង្គ្រាមស៊ីវិលស៊ីរីក្នុងឆ្នាំ ២០១៥ ដោយបើកការវាយប្រហារតាមអាកាស ដើម្បីគាំទ្រដល់កងទ័ពរបស់ អាសាដ និងបញ្ជូនទាហានជាង ៦៣.០០០ នាក់ទៅកាន់ប្រទេសស៊ីរី ។ ការអន្តរាគមន៍របស់រុស្ស៊ីគឺជាចំណុចរបត់ដ៏សំខាន់មួយនៅក្នុងសង្គ្រាមនេះ អនុញ្ញាតឱ្យកងទ័ពអាសាដដណ្តើមយកទឹកដីដែលបាត់បង់មកវិញ ។
រូបឯកសារឧត្តមសេនីយ័ជាន់ខ្ពស់ មីន អងឡាយ (ឆ្វេង) ចាប់ដៃជាមួយលោក សឺរហ្គេ សយគូ រដ្ឋមន្ត្រីការពាររុស្ស៊ី (Getty Images)
ចំណែកជំហររបស់រដ្ឋាភិបាលយោធាមីយ៉ាន់ម៉ា សេចក្តីថ្លែងការណ៍របស់អ្នកនាំពាក្យរដ្ឋាភិបាលលោក ហ្ស័រ មិន តុន (Zaw Min Tun) បាននិយាយកាលពីចុងសប្តាហ៍មិនថា កងទ័ពរុស្ស៊ីបានធ្វើអ្វីដែលខ្លួនមានហេតុផល ដើម្បីនិរន្តរភាពនៃអធិបតេយ្យភាពរុស្ស៊ី ហើយរុស្ស៊ីបានបង្ហាញពិភពលោកពីជំហរខ្លួនជាមហាអំណាចពិភពលោក ។
រុស្ស៊ីជាសម្ព័ន្ធមិត្តដ៏សំខាន់ និងជាអ្នកនាំចេញអាវុធដ៏សំខាន់មួយដល់មេទ័ពមីយ៉ាន់ម៉ា ហើយជារឿយៗការពារមីយ៉ាន់ម៉ានៅអង្គការសហប្រជាជាតិ ។ របាយការណ៍របស់អ្នកជំនាញឯករាជ្យប្រចាំអង្គការសហប្រជាជាតិចេញផ្សាយក្នុងសប្តាហ៍នេះបាននិយាយថា រុស្ស៊ីនិងចិនដែលជាសម្ព័ន្ធមិត្តសំខាន់មួយរបស់មីយ៉ាន់ម៉ា នៅតែផ្តល់អាវុធដល់រដ្ឋាភិបាលយោធានេះ រួមទាំងយន្តហោះចម្បាំង និងរថពាសដែកផង ៕