អត្ថបទ សូរ្យសែង៖
កាសែតរ៉ឺទ័រ (REUTER) ផ្សាយថា លោកប្រធានាធិបតីសហរដ្ឋអាមេរិក ចូ បៃដេន នឹងធ្វើម្ចាស់ផ្ទះកិច្ចប្រជុំកំពូលពិសេសជាមួយមេដឹកនាំអាស៊ាននៅថ្ងៃទី ២៨-២៩ ខែមីនា ឆ្នាំ ២០២២ នៅរដ្ឋធានីវ័រស៊ីងតុន សហរដ្ឋអាមេរិក ស្របពេលដែលមន្ត្រីអាមេរិកនិយាយថា ពួកគេនឹងត្រូវដោះស្រាយជាមួយក្រុម «ជួរមុខ» ទាំងសងខាង គឺអឺរ៉ុប និងអាស៊ី ។
កិច្ចប្រជុំកំពូលនេះគឺជាផ្នែកមួយនៃកិច្ចខិតខំប្រឹងប្រែងរបស់សហរដ្ឋអាមេរិក ក្នុងការពង្រឹងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ ដែលមានសារសំខាន់ចំពោះកិច្ចខិតខំប្រឹងប្រែង ដើម្បីទប់ទល់នឹងអំណាចដែលកំពុងកើនឡើងរបស់ចិន ។ កិច្ចប្រជុំនេះត្រូវបានគ្រោងទុកកាលពីដើមឆ្នាំនេះ ប៉ុន្តែកាលវិភាគត្រូវបានពន្យារពេលដោយសារក្តីបារម្ភអំពីជំងឺកូវីដ-១៩។
រូបភាពឯកសារកិច្ចប្រជុំមេដឹកនាំកំពូលអាស៊ាន កាលពីឆ្នាំ ២០១៨
អ្នកនាំពាក្យសេតវិមាន ជេន សាគី (Jane Saki) បាននិយាយថា កិច្ចប្រជុំកំពូលសមាគមមេដឹកនាំអាស៊ីអាគ្នេយ៍ (អាស៊ាន) ចំខួបលើកទី ៤៥ នៃទំនាក់ទំនងអាមេរិក-អាស៊ានផងដែរ ដោយបានគូសបញ្ជាក់ពីសារសំខាន់របស់សហរដ្ឋអាមេរិកក្នុងការដើរតួជាដៃគូដ៏រឹងមាំ និងគួរឱ្យទុកចិត្ត ដើម្បីពង្រឹងអាស៊ានដ៏មានឥទ្ធិពល និងឯកភាព ដើម្បីដោះស្រាយបញ្ហាប្រឈមផ្សេងៗ ។
នាថ្ងៃដដែល លោក ឃើត ខេមបែល (Kurt Campbell) អ្នកសម្របសម្រួលតំបន់ឥណ្ឌូ-ប៉ាស៊ីហ្វិករបស់សេតវិមាន បានប្រាប់រ៉ឺទ័រថា ឥឡូវនេះវាកំពុងឈានចូលដល់ពេលដែលសហរដ្ឋអាមេរិកត្រូវតែរក្សាការចូលរួមយ៉ាងស៊ីជម្រៅ ជាមួយ«មហោស្រព» ពីរ (ឥណ្ឌូ-ឥណ្ឌូប៉ាសីហ្វិក) ក្នុងពេលតែមួយ ។ ក្នុងប៉ុន្មានខែខាងមុខ សហរដ្ឋអាមេរិកនឹងខិតខំរក្សាការចូលរួមកម្រិតខ្ពស់ជាមួយតំបន់ឥណ្ឌូ-ប៉ាស៊ីហ្វិក ដោយប្រធានាធិបតីអាមេរិកនឹងធ្វើដំណើរទៅចូលរួមក្នុងការប្រមូលផ្តុំស្ថាប័នសំខាន់ៗទាក់ទងនឹងអាស៊ាននៅឆ្នាំនេះ ។
ក្នុងដំណើរទស្សនកិច្ចរបស់លោក អេនថូនី ប្លីនខេន (Anthony Blinken) កាលពីខែធ្នូ ឆ្នាំ ២០២១ នៅម៉ាឡេស៊ី រដ្ឋមន្ត្រីការបរទេសអាមេរិកបាននិយាយថា ប្រទេសសមាជិកអាស៊ានទាំង១០ មានសារសំខាន់ខ្លាំងណាស់ចំពោះតំបន់ឥណ្ឌូ-ប៉ាស៊ីហ្វិក» ។
លោកបាននិយាយថា កិច្ចប្រជុំកំពូលនេះត្រូវបានគេរំពឹងថា នឹងពិភាក្សាអំពីវិបត្តិរដ្ឋប្រហារយោធានៅប្រទេសមីយ៉ាន់ម៉ាកាលពីឆ្នាំមុន និងបញ្ហាស្តារខ្លួនពីជំងឺរាតត្បាតកូវីដ-១៩, បម្រែបម្រួលអាកាសធាតុ, ការវិនិយោគ និងហេដ្ឋារចនាសម្ព័ន្ធ ។
មានការលើកឡើងខ្លះថា កិច្ចសហប្រតិបត្តិការរបស់សហរដ្ឋអាមេរិកនៅអាស៊ី មានការខ្វះខាតចាប់តាំងពីរដ្ឋាភិបាលលោក ដូណាល់ ត្រាំ (Donald Trump) បានលាលែងពីកិច្ចព្រមព្រៀងពាណិជ្ជកម្មក្នុងតំបន់ ។
ទោះជាយ៉ាងណាក៏ដោយ រដ្ឋាភិបាល បៃដេន បានប្រកាសពីយុទ្ធសាស្ត្រ ១២ ទំព័រសម្រាប់ឥណ្ឌូ-ប៉ាស៊ីហ្វិកនៅដើមខែកុម្ភៈនេះ ដោយសន្យាផ្តល់ធនធានការទូត និងសន្តិសុខបន្ថែមទៀតនៅក្នុងតំបន់ ជាការឆ្លើយតបទៅនឹងកិច្ចខិតខំប្រឹងប្រែងរបស់ចិនក្នុងការកសាងឥទ្ធិពលនៅក្នុងតំបន់ ៕