អត្ថបទ សូរ្យរិទ្ធ៖
សង្គ្រាមដើរមកដល់ចំណុចនេះ ទើបឃើញក្រឡាអុករបស់លោក ពូទីន ច្បាស់ថា តើចង់បានអ្វី នោះគឺ លក្ខខណ្ឌទាំង ៤ ខាងក្រោមនេះហើយ ក្នុងនេះចំណុចថ្មី គឺចង់ឲ្យអ៊ុយក្រែនទទួលស្គាល់រដ្ឋឯករាជ្យ ដូណេស និង លូនហានស៍ រួមទាំងទឹកដីគ្រីមៀរផង ។ គេសួរសួរថា ម៉េចមិននិយាយគ្នាពីមុនមកឲ្យហើយទៅ ចាំព្រម ឬ មិនព្រម ចាំវាយគ្នា តែនេះរុស្ស៊ីចេញក្រឡាសា «កំញើញក្រុមអឺរ៉ុប ប្រទេសលោកខាងលិច រួមទាំងអាមេរិក ថា «អញ គឺអញ, ពូទីន គឺពូទីន ម៉ាត់ណា ម៉ាត់នឹង! » ។
ពីភ្នាក់ងារព័ត៌មាន REUTERS រាយការណ៍ថា រុស្ស៊ីបានជូនដំណឹងទៅអ៊ុយក្រែនថា ខ្លួនសុខចិត្តបញ្ឍប់វាយប្រហារភ្លាម ប្រសិនអ៊ុយក្រែនប្រតិបត្តិតាមលក្ខខណ្ឌ ៤ ចំណុច ។
១. បញ្ឈប់ប្រតិបត្តិការយោធា
២. អ៊ុយក្រែនត្រូវធ្វើវិសោធនកម្មរដ្ឋធម្មនុញ្ញ ដើម្បីធ្វើឱ្យមានអព្យាក្រឹតជាងមុន
៣. អ៊ុយក្រែនត្រូវទទួលស្គាល់គ្រីមេជារបស់រុស្ស៊ី
៤. អ៊ុយក្រែនត្រូវតែទទួលស្គាល់ស្ថានភាពនៃរដ្ឋឯករាជ្យនៃដែនដី ដូណេស(Donetsk) និង លូហានស៍ (Luhansk) ។
លើបញ្ហាទាក់ទងនឹងការធ្វើវិសោធនកម្មរដ្ឋធម្មនុញ្ញឲ្យមានភាពអព្យាក្រឹត អ្នកនាំពាក្យរុស្ស៊ី ប៉េស្កូវ (Peskov) ពន្យល់ ថា អ៊ុយក្រែនក៏ត្រូវបញ្ជាក់ថាខ្លួនបដិសេធមិនចូលរួមស្ថាប័នសហប្រតិបត្តិការលោកខាងលិចណាមួយដែរ ។ អ៊ុយក្រែនមិនទាន់មានប្រតិកម្មណាមួយពីរដ្ឋាភិបាលក្រុងគៀវទេ ។
ការផ្តល់ជូននេះគឺជាសេចក្តីថ្លែងការណ៍ដ៏តឹងតែងបំផុតដែលរុស្ស៊ីបានធ្វើចំពោះអ៊ុយក្រែន ចាប់តាំងពីកងទ័ពរុស្ស៊ីបានឈ្លានពានអ៊ុយក្រែនកាលពី ១២ ថ្ងៃមក ។
ការចរចាជុំទីបីមិនមានដំណើរការទេ
ជាមួយគ្នានេះ ទីភ្នាក់ងារសារព័ត៌មាន AP បានរាយការណ៍មកថា មិនមានការរីកចម្រើនច្រើនទេក្នុងការចរចាជុំទីបីរវាងអ៊ុយក្រែននិងរុស្ស៊ី ។ មន្ត្រីអ៊ុយក្រែនបាននិយាយថា មានការរីកចម្រើនតិចតួចក្នុងការរៀបចំ «ច្រករបៀងមនុស្សធម៌» ដើម្បីអនុញ្ញាតឱ្យប្រជាជនជម្លៀសចេញពីតំបន់សង្រ្គាម ។ អ្នកចរចារុស្ស៊ីបាននិយាយថា៖ ចង់ឱ្យច្រកនោះកើតឡើងនៅថ្ងៃអង្គារ ទី ៨ មីនានេះ ។
វិបត្តិមនុស្សធម៌នៅអ៊ុយក្រែនកាន់ធ្ងន់ធ្ងរខ្លាំងឡើងកាលពីថ្ងៃ ចន្ទ ទី ៧ មីនា ខណៈដែលកងទ័ពរុស្ស៊ីបន្តបើកការវាយប្រហារលើទីក្រុងនានានៅភាគខាងជើង និងខាងត្បូងអ៊ុយក្រែន ដោយសារតែប្រជាពលរដ្ឋក្នុងទីក្រុងទាំងនោះកំពុងប្រឈមនឹងការខ្វះខាតស្បៀងអាហារ ទឹក ភ្លើង និងថ្នាំពេទ្យ ។
រូបភាពរបស់ Dimitar DILKOFF / AFP