អត្ថបទ សូរ្យសែង៖
លោក ហ្វាង យី (Wang Yi) រដ្ឋមន្ត្រីក្រសួងការបរទេសចិន បានបញ្ជាក់កាលពីថ្ងៃទី ៧ ខែមីនាថា ទំនាក់ទំនងជិតស្និទ្ធរវាងចិន និងរុស្ស៊ី នៅដដែល ទោះបីរុស្ស៊ីបានប្រឈមមុខនឹងការថ្កោលទោសអន្តរជាតិចំពោះការលុកលុយរបស់អ៊ុយក្រែនក៏ដោយ ប៉ុន្តែលោកថា ចិននៅតែត្រៀមខ្លួនជួយសម្រុះសម្រួលក្នុងការចរចាសន្តិភាព ។
លោក ហ្វាង បានបញ្ជាក់ដូច្នេះថា មិត្តភាពរវាងប្រជាជាតិទាំងពីរគឺរឹងមាំដូចថ្ម ខណៈពេលដែលអនាគតនៃកិច្ចសហប្រតិបត្តិការរវាងប្រជាជាតិទាំងពីរមានភាពទូលំទូលាយ ប៉ុន្តែប្រទេសចិនចង់ធ្វើការជាមួយសហគមន៍អន្តរជាតិដើម្បីសម្រេចបាននូវការសម្របសម្រួលនៅពេលណាដែលចាំបាច់ ។
ការលើកឡើងរបស់លោក ហ្វាង កើតឡើងបន្ទាប់ពីប្រទេសចិនបានអនុវត្តគោលនយោបាយការទូតអភិរក្សបំផុតរបស់ខ្លួន ចំពេលមានវិបត្តិ ចិនក៏ធ្លាប់បានប្រកាសដែរថា ប្រទេសទាំងពីរជាសម្ព័ន្ធមិត្តយុទ្ធសាស្ត្រ ខណៈពេលដែលប្រទេសចិនបានជៀសវាងការថ្កោលទោសដោយផ្ទាល់ចំពោះសង្គ្រាមរបស់រុស្ស៊ី ។
ការលើកឡើងរបស់ចិនបានធ្វើឡើងបន្ទាប់ពីតំណាងជាន់ខ្ពស់ទទួលបន្ទុកកិច្ចការបរទេស និងគោលនយោបាយសន្តិសុខរបស់សហភាពអឺរ៉ុប លោក ចូសេប បូរ៉ែល (Josep Borrell) បានជំរុញឱ្យចិនធ្វើជាអ្នកសម្រុះសម្រួលក្នុងកិច្ចចរចាសន្តិភាពរវាងរុស្ស៊ី និងអ៊ុយក្រែន ដោយសារតែមហាអំណាចលោកខាងលិចមិនអាចមានតួនាទីនេះបាន ។
យ៉ាងណាក៏ដោយ ចិនបាននិយាយអំពីតម្រូវការក្នុងការដើរតួនាទីសំខាន់ក្នុងការអំពាវនាវឲ្យមានការសន្ទនាដើម្បីដោះស្រាយវិបត្តិ ប៉ុន្តែចិនមិនដែលប្តេជ្ញាចិត្តយ៉ាងម៉ឺងម៉ាត់ក្នុងការចូលរួម ឬធ្វើជាម្ចាស់ផ្ទះកិច្ចចរចាសន្តិភាពណាមួយឡើយ ។
ឥរិយាបថរបស់ចិនបានកើតឡើងក្នុងថ្ងៃតែមួយ ដែលនាយករដ្ឋមន្ត្រីអូស្ត្រាលី ស្កុត ម៉ូរីសុន (Scott Morrison) ចេញមកអំពាវនាវឲ្យចិនបង្ហាញពិភពលោកថា ចិនឲ្យតម្លៃសន្តិភាពពិភពលោក និងគោលការណ៍អធិបតេយ្យភាពរដ្ឋ និងបានពិពណ៌នាអំពីវិបត្តិនៅអ៊ុយក្រែនថាជា «ពេលវេលានៃជម្រើសសម្រាប់ប្រទេសចិន» ៕