ដោយ សូរ្យសែងៈ
វេបសាយរបស់ថៃ mgronline បានចេញផ្សាយនៅពេលថ្មីៗនេះថា អង្គការការពារសត្វ Four Paws ក្នុងប្រទេសកម្ពុជា បានចេញផ្សាយការសិក្សាមួយដែលបង្ហាញថា សត្វសុនខ(ឆ្កែ) យ៉ាងហោចណាស់ពី ២ ទៅ ៣ លានក្បាល ត្រូវបានគេសម្លាប់ជារៀងរាល់ឆ្នាំដើម្បីយកសាច់ទៅលក់ ដោយអ្នកបរិភោគភាគច្រើន គឺនៅខេត្តសៀមរាប ហើយអ្នកផ្គត់ផ្គង់សាច់សុនខសំខាន់នៅទូទាំងប្រទេសទាំងមូល ក៏មកពីខេត្តសៀមរាបដែរ ។
ទោះយ៉ាងណាក៏ដោយ តំណាងអង្គការខាងលើនិយាយថា អាជ្ញាធរប្រចាំខេត្ត ដោយឡែកមន្ត្រីមកពីការិយាល័យកសិកម្ម បានរៀបចំវិធានការយ៉ាងតឹងរឹង ដើម្បីបញ្ឈប់ការបរិភោគសាច់សុនខនៅទូទាំងប្រទេស ។ មន្ត្រីឲ្យដឹងទៀតថា មានការជូនដំណឹងដល់ប្រជាជនឲ្យបញ្ឈប់ការសម្លាប់ និងលក់សាច់សុនខ ហើយប្រសិនបើរកឃើញជនណាដែលនៅតែប្រព្រឹត្តបែបនេះនឹងត្រូវមានទោស ។
មន្ត្រីខាងលើបាននិយាយថា នរណាក៏ដោយ បើរកឃើញថា ទិញ លក់ ឬសម្លាប់សត្វឆ្កែ ត្រូវប្រឈមនឹងការពិន័យជាប្រាក់រហូតដល់ ៧ លានរៀល (ស្មើ ១.៧០០ ដុល្លារ) ក្រោមច្បាប់សុខភាព និងផលិតផលសាច់សត្វ ហើយប្រសិនបើមានកំហុសជាលើកទី ២ នឹងត្រូវបានផ្តន្ទាទោសពីបទល្មើស និងប្រឈមមុខមានទោស និងពិន័យជាប្រាក់ពី ១០ ទៅ ១៥ លានរៀល ហើយប្រសិននៅតែបន្តល្មើសច្បាប់លើសពីពីរដងទៀត ជននោះនឹងត្រូវប្រឈមមុខផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ១០-៥០ លានរៀល ។
ស្ថាបនិក និងជានាយកអង្គការ Animal Rescue Cambodia បាននិយាយថា សាច់សុនខនៅក្នុងភោជនីយដ្ឋាន មានមកពីខេត្តសៀមរាប ហើយត្រូវបានដឹកជញ្ជូនមកភ្នំពេញដើម្បីបរិភោគផងដែរ ។
អស់ជាច្រើនទស្សវត្សរ៍មកហើយ ដែលសត្វសុនខនៅកម្ពុជាបានដើរតួនាទីយ៉ាងសំខាន់ក្នុងការស្វែងរកគ្រាប់មីន ឬគ្រាប់មិនទាន់ផ្ទុះ រក្សាសន្តិសុខជាតិ និងជាដៃគូដ៏ស្មោះត្រង់របស់មនុស្ស ប៉ុន្តែទោះបីជាមានទំនាក់ទំនងពិសេសរវាងមនុស្ស និងសត្វឆ្កែក៏ដោយ ប៉ុន្តែសត្វឆ្កែរាប់លានក្បាលនៅក្នុងប្រទេសនៅតែត្រូវបានគេលួច ចាប់យកទៅលក់ និងសម្លាប់យកសាច់ទៅបរិភោគ ។
ថ្មីៗនេះ សមត្ថកិច្ចបានបង្ក្រាបក្រុមចាប់-ទាក់សុនខ បាន ៩ នាក់ ដែលធ្វើសកម្មភាពជាជំនួញ ច្រើនទាក់ និងដាក់ថ្នាំបំពុលសុនខពេលយប់ ដែលកន្លងមក ប្រជាជនជាម្ចាស់ខំចិញ្ចឹមដើម្បីចាំការពារេផ្ទះ បាត់សុនខរបស់ខ្លួនមិនតិចទេ ៕