អត្ថបទ សូរ្យរិទ្ធ៖
ជាង ៣ សប្តាហ៍កន្លងទៅហើយ ដែលទីក្រុងម៉ារីអ៊ុយប៉ូល (Mariupol) នៅភាគខាងជើងប្រទេសអ៊ុយក្រែន ត្រូវកងកម្លាំងរុស្ស៊ីឡោមព័ទ្ធ និង វាយប្រហារយ៉ាងសន្ធាប់ រហូតអគារ ផ្ទះជិត 90% ត្រូវបានបំផ្លាញ ដែលធ្វើឱ្យទីក្រុងនេះ មិនខុសពីទីក្រុងអាលេបប៉ូ (Aleppo) ក្នុងប្រទេសស៊ីរីនោះទេ ដែលត្រូវបានវាយប្រហារយ៉ាងខ្លាំងដោយរុស្ស៊ី ជាមួយនឹងការប្រើប្រាស់អាវុធប្រល័យលោកជាច្រើនប្រភេទ ដើម្បីដាក់សម្ពាធឱ្យអ៊ុយក្រែនចុះចាញ់ ។
ប្រិយមិត្តមានឆ្ងល់ទេ! ហេតុអ្វីបានជារុស្ស៊ីចង់បានទីក្រុងម៉ារីអ៊ុយប៉ូលខ្លាំងម៉្លេះ? គឺមានហេតុផល ៤ ដែលនៅពីក្រោយចំណុចយុទ្ធសាស្ត្រសំខាន់នេះ ។
ទោះជាទីក្រុងម៉ារីអ៊ុយប៉ូលមានទំហំតូចក៏ពិតមែន ប៉ុន្តែប៉ុន្តែតាមភូមិសាស្ត្រ ទីតាំងនៃទីក្រុងនេះរារាំងច្រកចូលទៅក្នុងទឹកដីអ៊ុយក្រែន ប្រសិនបើរុស្ស៊ីមានគម្រោងផ្លាស់ទីពីតំបន់គ្រីមៀ ហើយសាងសង់ផ្លូវដីតភ្ជាប់ទៅតំបន់ ដុនបាស ភាគឦសាន ដែលជាឥទ្ធិពលរបស់ក្រុមឧទ្ទាមបំបែកខ្លួនដែលមាននិន្នាការគាំទ្ររុស្ស៊ីកន្លងមក ដូច្នេះនឹងត្រូវចាប់យកទីក្រុងម៉ារីអ៊ុយប៉ូលជាមុនសិន ដើម្បីបង្កើត «ស្ពានដែនដី (land bridge)» ភ្ជាប់ផ្លូវដីគោកនៃទឹកដីរបស់រុស្ស៊ី ។
ប្រសិនបើរុស្ស៊ីបានកាន់កាប់ទីក្រុងនេះដោយជោគជ័យ នោះមានន័យថា គេអាចគ្រប់គ្រងបានជាង 80% នៃឆ្នេរសមុទ្រខ្មៅរបស់អ៊ុយក្រែន ធ្វើឱ្យអ៊ុយក្រែនមិនអាចធ្វើពាណិជ្ជកម្ម និងការដឹកជញ្ជូនតាមសមុទ្របានឡើយ នេះពិតជានឹងនាំឱ្យមានមហន្តរាយសេដ្ឋកិច្ច ។
ទោះជាយ៉ាងណា ការការពារដ៏ខ្លាំងរបស់ទីក្រុងដោយកងកម្លាំងអ៊ុយក្រែន បានរារាំងកម្លាំងរុស្ស៊ីពីការទម្លុះទីក្រុងជាច្រើនសប្តាហ៍មកហើយ រហូតដល់ពឹងផ្អែកជាចម្បងលើការទម្លាក់គ្រាប់បែក និងការបាញ់ប្រហារពីចម្ងាយ ។ រុស្ស៊ីក៏បានផ្លាស់ប្តូរយុទ្ធសាស្ត្រឡោមព័ទ្ធបែបបុរាណនៃយុគកណ្តាល គឺកាត់ផ្តាច់ការដឹកជញ្ជូន ដែលជាបច្ច័យបួនចាំបាច់សម្រាប់ជីវភាពរស់នៅរបស់ប្រជាពលរដ្ឋទីក្រុងទាំងអស់ ដើម្បីបង្កភាពអត់ឃ្លាន រហូតមិនអាចទ្រាំទ្របាន ហើយត្រូវចុះចាញ់នៅទីបញ្ចប់ ។
ប៉ុន្តែរហូតមកដល់ពេលនេះ កងកម្លាំងទីក្រុងម៉ារីអ៊ុយប៉ូលនៅតែមិនព្រមចាញ់ ហើយបានប្រកាសថា នឹងនៅតែឈរតស៊ូបន្តទៀត ទោះនៅសល់ទាហានតិចប៉ុនណាក៏ដោយ ។
ចុងក្រោយទាហានរុស្ស៊ីខ្លះ បានវាយលុកចូលដល់កណ្តាលក្រុងហើយ ហើយប្រសិនរុស្ស៊ីជាភាគីឈ្នះ នឹងអាចចល័តកម្លាំង ៦.០០០ នាក់ និងកងវរសេនាតូចយុទ្ធវិធីប្រហែល ១.០០០ នាក់ ដែលប្រយុទ្ធនៅសមរភូមិម៉ារីអ៊ុយប៉ូលជាយូរមកហើយ ដើម្បីពង្រឹងរណសិរ្សវាយកន្លែងផ្សេងទៀត អាចជាស្រុកអូដេស្សា (Odessa) ជិតទីក្រុងម៉ារីអ៊ុយប៉ូល, ទីក្រុងនីប្រូ (Nypro) នៅកណ្តាលអ៊ុយក្រែន ឬនៅតំបន់ដុនបាស (Donbas) ។
២. ជាមជ្ឈមណ្ឌលកណ្តាលនាំចេញ បម្រើសេដ្ឋកិច្ចរបស់អ៊ុយក្រែន
ទីក្រុងម៉ារីអ៊ុយប៉ូល គឺជាទីក្រុងកំពង់ផែធំបំផុត និងសំខាន់បំផុតនៅលើឆ្នេរសមុទ្រនៃសមុទ្រ អាហ្សូវ (Azov) ដែលជាផ្នែកមួយនៃសមុទ្រខ្មៅ ជាប្រភពនៃការផលិត និងនាំចេញដែក រួមទាំងជាកន្លែងនាំចេញធ្យូងថ្ម និងពោត ដែលជាផលិតផលចម្បងរបស់អ៊ុយក្រែនទៅកាន់មជ្ឈិមបូព៌ា និងប្រទេសផ្សេងទៀតជុំវិញពិភពលោក ។
រយៈពេល ៨ ឆ្នាំមកហើយ ចាប់តាំងពីប្រទេសរុស្ស៊ីបានបញ្ចូលគ្រីមៀនៅក្រោមការគ្រប់គ្រងរបស់ខ្លួន ធ្វើឱ្យទីក្រុងកំពង់ផែម៉ារីអ៊ុយប៉ូល ស្ថិតក្នុងស្ថានភាពលំបាក ព្រោះវាជាប់តំបន់ឥទ្ធិពលរបស់រុស្ស៊ី ទាំងខាងលិច និងខាងកើត ។ ប្រសិនបើអ៊ុយក្រែនចាញ់សមរភូមិម៉ារីអ៊ុយប៉ូល នោះមានន័យថា ការខូចខាតសេដ្ឋកិច្ចដ៏ធំសម្បើម មិនធ្លាប់មាន ។
៣. ឱកាសមាសសម្រាប់ការឃោសនា
ទីក្រុងម៉ារីអ៊ុយប៉ូល ក៏ជាមូលដ្ឋានរបស់ «កងវរសេនាតូច Azov» ជាកងកម្លាំងស្តាំនិយមនៅអ៊ុយក្រែន ដែលអ្នកជំនាញនិយាយថា អាចមានពួក នីអូណាស៊ី (neo-Nazis ឬ «Nazis ថ្មី») ។ កាលពីមុនកងវរសេនាតូច Azov គឺជាកម្លាំងសំខាន់ដែលបានប្រយុទ្ធការការពារទីក្រុងម៉ារីអ៊ុយប៉ូល រួមជាមួយកងទ័ពអ៊ុយក្រែន។
ទោះបីជាកងវរសេនាតូចនេះមិនមានកងទ័ពច្រើនក៏ដោយ ជាចំណែកមួយភាគតូចនៃកងទ័ពអ៊ុយក្រែនទាំងមូល ប៉ុន្តែជារឿយៗរុស្ស៊ីបានប្រើកងវរសេនាតូច Azov នេះ ជាហេតុផលសម្រាប់ការឈ្លានពានអ៊ុយក្រែន ដោយបង្ហាញថា កងទ័ពរុស្ស៊ីកំពុងប្រយុទ្ធ «រំដោះប្រទេសជិតខាងពីពួកណាស៊ីថ្មី» ។
ប្រសិនបើកងកម្លាំងរុស្ស៊ីអាចចាប់យកទាហាននៃកងវរសេនាតូច Azov បាន សេចក្តីប្រកាសព័ត៌មានរបស់រដ្ឋាភិបាលរុស្ស៊ីត្រូវបានរំពឹងទុកយ៉ាងប្រាកដ ដើម្បីបន្ថយភាពជឿជាក់របស់រដ្ឋាភិបាលអ៊ុយក្រែន ដែលរុស្ស៊ីតែងតែចោទប្រកាន់ថាជាអ្នកណាហ្ស៊ី ។
ប្រសិនបើរុស្ស៊ីអាចចាប់យកទីក្រុងម៉ារីអ៊ុយប៉ូលបាន ជ័យជម្នះលើកនេះនឹងជះឥទ្ធិពលផ្លូវចិត្តយ៉ាងខ្លាំងដល់ភាគីសង្គ្រាមទាំងសងខាង ដែលសម្រាប់ជនជាតិអ៊ុយក្រែន នេះនឹងជាការបាត់បង់ទីក្រុងធំដំបូងគេដែលមានសារសំខាន់ជាយុទ្ធសាស្ត្រខ្ពស់ បន្ទាប់ពីការបាត់បង់ទីក្រុងឃើរសុន (Kherson) ដែលមិនសូវសំខាន់ពីមុនមក
ប៉ុន្តែសម្រាប់កងកម្លាំងប្រដាប់អាវុធរុស្ស៊ី នឹងជាឱកាសមួយដើម្បីបង្ហាញស្នាដៃដ៏អស្ចារ្យដល់ប្រជាជនរុស្ស៊ី ក៏ដូចជាការជំរុញស្មារតី និងកម្លាំងចិត្តដល់យោធា ដែលទទួលរងនូវការជាប់គាំង និងមិនអាចឈានទៅមុខស្ទើរតែគ្រប់សមរភូមិ ។
សម្រាប់ប្រធានាធិបតីរុស្ស៊ី វ្ល៉ាឌីមៀ ពូទីន ការយកទីក្រុងម៉ារីអ៊ុយប៉ូលមកគ្រប់គ្រង ដូចជាការបំពេញក្តីស្រមៃរបស់គាត់ក្នុងការកសាងចក្រភពរុស្ស៊ីថ្មី (Novorossiya) យ៉ាដូច្នេះដែរ ដែលគ្រប់គ្រងឆ្នេរសមុទ្រខ្មៅទាំងមូល ដូចដែលបានធ្វើក្នុងសតវត្សទី ១៨ ឲ្យឈានមួយជំហានកាន់តែខិតទៅជិតការពិត ។ ជ័យជម្នះលើម៉ារីអ៊ុយប៉ូល ក៏អាចព្រមាន និងបង្ក្រាប ដូចទីក្រុងសំខាន់ៗផ្សេងទៀតរបស់អ៊ុយក្រែន ដែលនៅតែទប់ទល់ជាមួយកងទ័ពរុស្ស៊ី នៅទីបញ្ចប់គេនឹងមិនអាចយកឈ្នះរុស្ស៊ីបានទេ ហើយនឹងរងការខាតបង់យ៉ាងខ្លាំងប្រសិនបើពួកគេនៅតែមានចិត្តរឹងរូស ៕