ប្រែសម្រួលពីវេបសាយ bbc\Thai
ដោយ សូរ្យរិទ្ធ៖
ប្រធានាធិបតីសហរដ្ឋអាមេរិក ចូ បៃដេន (Joe Biden) បានអំពាវនាវដល់ក្រុមហ៊ុន និងអង្គការនានានៅក្នុងសហរដ្ឋអាមេរិកឱ្យ «ចាក់សោទ្វារឌីជីថលរបស់ពួកគេឲ្យតឹងរ៉ឹង» ដោយសារការស៊ើបការណ៍សម្ងាត់ដែលបង្ហាញថា រុស្ស៊ីកំពុងរៀបចំផែនការវាយប្រហារតាមអ៊ីនធឺណិត (Cyber) ប្រឆាំងនឹងសហរដ្ឋអាមេរិក ។
រដ្ឋាភិបាលរបស់ចក្រភពអង់គ្លេស ក៏បានគាំទ្រការអំពាវនាវរបស់សេតវិមានផងដែរ ដែលបានផ្តល់សញ្ញា«ការបង្កើនការប្រុងប្រយ័ត្នសុវត្ថិភាពតាមអ៊ីនធឺណិត» ទោះបីជាវាមិនបានផ្តល់ភស្តុតាងថារុស្ស៊ីកំពុងរៀបចំផែនការវាយប្រហារក៏ដោយ ។
កន្លងមក រុស្សីបានសំដៅលើការចោទប្រកាន់ប្រភេទនេះថាជាលទ្ធផលនៃ «ការស្អប់ជនជាតិរុស្ស៊ី» ។ ទោះបីជាយ៉ាងណាក៏ដោយ ប្រទេសរុស្ស៊ីគឺជាមហាអំណាចអ៊ីនធឺណិត ដែលមានទាំងឧបករណ៍ និងពួក Hacker មានសមត្ថភាពរំខានការវាយប្រហារតាមអ៊ីនធឺណិត ហើយអាចបង្កការខូចខាតយ៉ាងធ្ងន់ផងដែរ ។
អ៊ុយក្រែន មិនទាន់ប្រឈមមុខនឹងបញ្ហាធ្ងន់ធ្ងរជាមួយការវាយប្រហារតាមអ៊ីនធឺណិតពីរុស្ស៊ីនៅឡើយទេ ប៉ុន្តែក្រុមអ្នកជំនាញបារម្ភថា រុស្ស៊ីអាចនឹងដាក់គោលដៅទៅសម្ព័ន្ធមិត្តរបស់អ៊ុយក្រែនជំនួសវិញ។
លោក ជេន អេលីស (Jane Ellis) មកពីក្រុមហ៊ុនសន្តិសុខ Cyber Rapid7 បាននិយាយថា «ការព្រមានរបស់លោក បៃដេន ហាក់ដូចជាសមហេតុផល ជាពិសេសនៅពេលដែលប្រទេសលោកខាងលិចបង្កើនការដាក់ទណ្ឌកម្មប្រឆាំងនឹងរុស្ស៊ី ។
ភ្នាក់ងារព័ត៌មាន BBC បានប្រមូលការវាយប្រហារតាមអ៊ីនធឺណិតចំនួនបីរបស់រុស្ស៊ី ដែលអ្នកជំនាញលោកខាងលិចខ្លាចបំផុត គឺៈ
អ៊ុយក្រែនច្រើនតែប្រៀបធៀបជាមួយ «សួនកុមារ» នៃពួក Hacker រុស្ស៊ី ដែលជារឿយៗធ្វើការវាយប្រហារ ដើម្បីសាកល្បងបច្ចេកទេស ឬឧបករណ៍ផ្សេងៗ។
នៅឆ្នាំ ២០១៥ បណ្តាញអគ្គិសនីរបស់ប្រទេសអ៊ុយក្រែនត្រូវបានរំខាន បន្ទាប់ពីការវាយប្រហារតាមអ៊ីនធឺណិតដោយប្រើមេរោគ មានឈ្មោះថា BlackEnergy បានធ្វើឱ្យអ្នកប្រើប្រាស់អគ្គិសនីប្រមាណ ៨០.០០០ នៅភាគខាងលិចអ៊ុយក្រែនគ្មានអគ្គិសនីប្រើបណ្តោះអាសន្ន ។
ជិតមួយឆ្នាំក្រោយមក ក៏មានការវាយប្រហារជាថ្មីមួយទៀតរបស់មេរោគ (Malware) ដែលមានឈ្មោះថា Industroyer បានបណ្តាលឱ្យដាច់ចរន្តអគ្គិសនីគ្របដណ្តប់មួយភាគប្រាំនៃទីក្រុងគៀវរយៈពេលប្រហែលមួយម៉ោង ។ សហរដ្ឋអាមេរិក និងសហភាពអឺរ៉ុប (EU) បាននិយាយថា ពួក Hacker យោធារុស្ស៊ីជាអ្នកនៅពីក្រោយឧប្បត្តិហេតុទាំងពីរនេះ ។
លោកស្រី ម៉ារីណា ក្រូតូហ្វីល អ្នកជំនាញខាងសន្តិសុខ Cyber របស់អ៊ុយក្រែន បានប្រាប់ថា «រុស្ស៊ីអាចព្យាយាមវាយប្រហារបែបលក្ខណៈដូចគ្នា ទៅលើប្រទេសលោកខាងលិច » ។
ទោះយ៉ាងណាក៏ដោយ លោកស្រីបង្ហាញថា កន្លងមក មិនមានការវាយប្រហារតាម Cyber ដែលបង្កការដាច់ចរន្តអគ្គិសនីនោះទេ ព្រោះការវាយប្រហារប្រព័ន្ធវិស្វកម្មវាពិបាកខ្លាំងណាស់ ហើយពេលខ្លះស្ទើរតែមិនអាចធ្វើទៅរួចក្នុងការខូចខាតធ្ងន់ធ្ងរក្នុងរយៈពេលយូរទៀតផង ដោយសារតែប្រព័ន្ធទាំងនេះមានប្រព័ន្ធការពារដែលភ្ជាប់មកជាមួយ ។
លោកស្រី ក្រូតូហ្វីល នៅបានឲ្យដឹងទៀតថា ការវាយប្រហារលក្ខណៈនេះ អាចបញ្ចូនផលប៉ះពាល់ប្រយោជន៍ចំពោះរុស្ស៊ីទៅវិញទេ ពីព្រោះធុរកិច្ចជាច្រើននៅក្នុងលោកខាងលិច មានពាក់ព័ន្ធជាមួយបណ្តាញរុស្ស៊ីដូចគ្នា ។
មេរោគ NotPetya ត្រូវបានគេជឿថា ជាការវាយប្រហារដែលធ្វើឲ្យមានតម្លៃថ្លៃបំផុតក្នុងប្រវត្តិសាស្ត្រ ដែលមន្ត្រីអាមេរិក ចក្រភពអង់គ្លេស និងសហភាពអឺរ៉ុបបានចង្អុលបង្ហាញថា វាជាស្នាដៃរបស់ក្រុម Hacker យោធារុស្ស៊ី ។
មេរោគនេះប្រភេទនេះ ត្រូវបានលាក់នៅក្នុងកម្មវិធី (Software) គណនេយ្យដែលប្រើនៅក្នុងប្រទេសអ៊ុយក្រែន ប៉ុន្តែបានរីករាលដាលពាសពេញពិភពលោក និងបំផ្លាញប្រព័ន្ធកុំព្យូទ័ររបស់ក្រុមហ៊ុនរាប់ពាន់កន្លែង បណ្ដាលឲ្យខូចខាតគិតជាទឹកប្រាក់ប្រហែល ១០ ពាន់លានដុល្លារ ។
មេរោគ WannaCry ក៏បានវាយប្រហារទៅលើទិន្នន័យរបស់កុំព្យូទ័រប្រហែល ៣០០.០០០ គ្រឿងក្នុង ១៥០ ប្រទេសជុំវិញពិភពលោក ។ ការិយាល័យសុខភាពជាតិរបស់ចក្រភពអង់គ្លេស ក៏ជាជនរងគ្រោះផងដែរ ដែលបណ្តាលឱ្យត្រូវលុបចោលការណាត់ជួបសេវាអ្នកជំងឺមានជាច្រើនសន្ធឹក ។
លោក ជេន អេលីស (Jane Ellis) សមាជិក Rapid7 បាននិយាយថា «ការវាយប្រហារបែបនេះមានសក្តានុពលនាំទៅរកការរំខានដ៏ធំមួយ អស្ថិរភាពសេដ្ឋកិច្ច ឬសូម្បីតែការបាត់បង់ជីវិត»។
ទោះយ៉ាងណាក៏ដោយ សាស្ត្រាចារ្យ អាឡាន់ វូដវើដ អ្នកវិទ្យាសាស្ត្រផ្នែកកុំព្យទ័រ ពីមហាវិទ្យាល័យ សឺរីយ៍ ក្នុងប្រទេសអង់គ្លេស បង្ហាញថា ការវាយប្រហារបែបនេះ ក៏បណ្តាលឲ្យគ្រោះថ្នាក់ដល់រុស្ស៊ីដូចគ្នា ។
«ការ Hack បែបនេះគឺដូចជាសង្គ្រាមជីវសាស្រ្ត ក្នុងន័យថា វាជាការលំបាកខ្លាំងណាស់ក្នុងការកំណត់គោលដៅប្រព័ន្ធហេដ្ឋារចនាសម្ព័ន្ធសំខាន់ៗនៅក្នុងទីតាំងជាក់លាក់, WannaCry និង NotPetya ក៏មានរងគ្រោះនៅក្នុងប្រទេសរុស្ស៊ីផងដែរ»។
នៅខែឧសភា ឆ្នាំ ២០២១ ស្ថានភាពអាសន្នត្រូវបានប្រកាសនៅក្នុងរដ្ឋមួយចំនួនរបស់សហរដ្ឋអាមេរិក បន្ទាប់ពីពួក Hacker មួយក្រុមបានវាយប្រហារជាមួយមេរោគ Ransomware បណ្តាលឱ្យការដឹកជញ្ជូនប្រេងតាមបំពង់ត្រូវបានផ្អាក ។
ក្រុមហ៊ុន Colonial Pipeline ជាអ្នកផ្គត់ផ្គង់ប្រេងឥន្ធនៈ ៤៥% ទៅភាគខាងកើតសហរដ្ឋអាមេរិក ការវាយប្រហារ ធ្វើឱ្យមានការភ័យស្លន់ស្លោ ខណៈមនុស្សសម្រុកទៅចាក់សាំង ព្រោះខ្លាចមានការខ្វះខាត ។ ការវាយប្រហារនេះមិនមែនដោយពួក Hacker រដ្ឋាភិបាលរុស្ស៊ីទេ វាគឺជាក្រុម Ransomware DarkSide ដែលគេជឿថា មានមូលដ្ឋាននៅក្នុងប្រទេសរុស្ស៊ី ។
ក្រុមហ៊ុន Colonial Pipeline បានសារភាពថា បានបង់ប្រាក់លោះដល់ឧក្រិដ្ឋជនក្រុមនេះ ចំនួន ៤,៤ លានដុល្លារ ប្តូរជាមួយ bitcoins វាពិបាកតាមដាន ជាថ្នូរនឹងការបម្រុងទុកទិន្នន័យ ហើយក៏ធ្វើឱ្យប្រព័ន្ធកុំព្យូទ័ររបស់ក្រុមហ៊ុនដំណើរការឡើងវិញ ។
ប៉ុន្មានសប្តាហ៍ក្រោយមក ក្រុមហ៊ុន JBS ដែលជាក្រុមហ៊ុនកែច្នៃសាច់គោដ៏ធំបំផុតរបស់ពិភពលោកក្នុងប្រទេសប្រេស៊ីល បានធ្លាក់ខ្លួនរងគ្រោះដោយសារមេរោគ Ransomware ដែរ ដោយក្រុមមួយដែលមានឈ្មោះថា REvil ធ្វើឲ្យប៉ះពាល់ដល់ការដឹកជញ្ជូនសាច់ទៅលក់។
កង្វល់ដ៏ធំបំផុតមួយដែលអ្នកជំនាញផ្តោតលើរុស្ស៊ី គឺរដ្ឋាភិបាលរុស្ស៊ីអាចដឹកនាំឧក្រិដ្ឋជនតាមអ៊ីនធឺណិត (Cyber) វាយប្រហារគោលដៅផ្សេងៗក្នុងសហរដ្ឋអាមេរិក ដើម្បីទទួលបានការខូចខាតជាអតិបរមា។
ប្រសិនប្រទេសសមាជិក ណាតូ ធ្លាក់ជាគោលដៅវាយប្រហារខាង Cyber ដែលបង្កឲ្យបាត់បង់ជីវិត ឬមហន្តរាយដ៏ធំ មិនអាចជួសជុលបាន នោះ ណាតូ ក៏នឹងប្រើមាត្រា ៥ ដែលចែងថា «វាយប្រហារលើសមាជិកនៃប្រជាជាតិណាមួយ នឹងត្រូវបានគេចាត់ទុកថាជាការវាយប្រហាររួមលើសមាជិកទាំងអស់»។
ប៉ុន្តែអ្នកជំនាញនិយាយថា នេះអាចអូសទាញ ណាតូ ចូលទៅក្នុងសង្រ្គាមដែលពួកគេមិនចង់បាន ហើយការសងសឹកទំនងជាអាមេរិក និងសម្ព័ន្ធមិត្តជិតស្និទ្ធជំនួសវិញ ។ លោក បៃដេន ធ្លាប់បាននិយាយថា «យើងត្រៀមខ្លួនរួចជាស្រេចដើម្បីសងសឹក» ប្រសិនបើរុស្ស៊ីបើកការវាយប្រហារដ៏ធំមួយលើសហរដ្ឋអាមេរិក ។
ទោះបីជាយ៉ាងណាក៏ដោយ ភាពខ្វល់ខ្វាយខាង Cyber ដែលមាននៅក្នុងប្រទេសអ៊ុយក្រែនជាប្រវត្តិសាស្ត្រក្នុងប៉ុន្មានសប្តាហ៍ថ្មីៗកន្លងទៅនេះ វាបង្ហាញថា ស្ថានការណ៍អាចកើនឡើងយ៉ាងងាយស្រួល ដូច្នេះរាល់សកម្មភាពត្រូវតែយកចិត្តទុកដាក់ ៕