ប្រទេសស្វីស បង្កកទ្រព្យសម្បត្តិរបស់ជនជាតិរុស្ស៊ីប្រមាណជាង ៦ ពាន់លានដុល្លារ

ព័ត៌មានអន្តរជាតិថ្ងៃសុក្រ ទី25 ខែមិីនា ឆ្នាំ2022 ម៉ោង 7:41 នាទី ល្ងាច

រដ្ឋាភិបាលប្រទេសស្វីស បានបង្កកទ្រព្យសម្បត្តិក្នុងទម្រង់ផ្សេងៗគ្នារបស់ជនជាតិរុស្ស៊ី ហើយម្ចាស់ត្រូវបានចុះក្នុងបញ្ជីខ្មៅដែលត្រូវបានដាក់ទណ្ឌកម្ម តម្លៃសរុបជាង ៦.១៧០ លានដុល្លារអាមេរិករួចហើយ ។

ទីភ្នាក់ងារព័ត៌មាន Reuters រាយការណ៍ពីទីក្រុងហ្សុយរិច (Zurich) ប្រទេសស្វីស នៅថ្ងៃទី២៤ ខែមីនា ថា លោក អ៊ាវីន បាល្លីនហ្គើរ (Erwin Ballinger) មន្ត្រីជាន់ខ្ពស់នៃលេខាធិការដ្ឋានកិច្ចការសេដ្ឋកិច្ច ប្រទេសស្វីស ឬ SECO (State Secretariat for Economic Affairs) ដែលជាទីភ្នាក់ងារមានកាតព្វកិច្ចប្រតិបត្តិការ បានបង្ហាញជាសាធារណៈនូវចំនួននៃការបង្កកចុងក្រោយបំផុត គឺប្រហែល ៥.៧៥០ លានហ្វ្រង់ស្វីស ស្មើនឹង ៦.១៧០ លានដុល្លារ ។

រហូតមកដល់ពេលនេះ SECO បានបដិសេធក្នុងការវាយតម្លៃ វិសាលភាពនៃការបង្កក រួមទាំងទ្រព្យសម្បត្តិដែលត្រូវភ្ជាប់បន្ថែម ចាប់តាំងពីប្រទេសស្វីស ប្រទេសដែលប្រកាន់ខ្ជាប់នូវគោលនយោបាយអព្យាក្រឹត យល់ព្រមចូលរួមក្នុងការដាក់ទណ្ឌកម្មប្រឆាំងនឹងរុស្ស៊ី និងជាមួយសហភាពអឺរ៉ុប ជាការឆ្លើយតបទៅនឹងប្រតិបត្តិការយោធារុស្ស៊ីនៅអ៊ុយក្រែន ។

ពីការវាយតម្លៃរបស់អ្នកជំនាញ បច្ចុប្បន្ននេះធនាគារផ្សេងៗ នៅប្រទេសស្វីស ការទទួលយកប្រាក់បញ្ញើ និងទ្រព្យសម្បត្តិ របស់ជនជាតិរុស្ស៊ី តម្លៃសរុប គឺប្រហែល ២១៣ ពាន់លាន ៕