អត្ថបទ ចាន់ធឿន៖
ប្រទេសអាស៊ានមួយនេះ ជាប្រទេសមិនធ្លាប់មានបាតុកម្ម ឬកុប្បកម្ម ហើយក៏ជាប្រទេសមានច្បាប់តឹងរឹងផងដែរ តែនៅថ្ងៃទី ៣ មេសា មានមនុស្សប្រមាណ ៤០០ នាក់ បានប្រឆាំងតវ៉ា ក្រោយមាននិន្នាការបង្កើតច្បាប់ប្រហារជីវិតអ្នកទោស ដោយព្យួរ.ក ។
ការតវ៉ាបានកើតឡើងនៅ «Speakers Corner» ដែលជាកន្លែងធ្វើបាតុកម្មតែមួយគត់ក្នុងប្រទេសសិង្ហបុរី ដោយមិនចាំបាច់មានការអនុញ្ញាតពីប៉ូលីស ។ ក្រុមអ្នកតវ៉ាបានកាន់បដាបង្ហាញថា «ទោសប្រហារជីវិតមិនធ្វើឱ្យយើងមានសុវត្ថិភាពទេ» និង «កុំសម្លាប់ក្នុងនាមពួកយើង» ក្នុងនោះ ក៏មានសម្រែកស្រែកខ្លាំងៗប្រឆាំងនឹងទោសប្រហារជីវិតផងដែរ ។
បាតុកម្មនៅសិង្ហបុរីគេកម្រឃើញណាស់ ទន្ទឹមនឹងនោះ សិង្ហបុរីតែងតែប្រឈមមុខនឹងការរិះគន់ចំពោះការគ្រប់គ្រងរបស់ខ្លួនលើសេរីភាពស៊ីវិល ។ ក្រៅតែពី «Speakers Corner» ការប្រមូលផ្តុំសាធារណៈក្នុងប្រទេសសិង្ហបុរីដោយគ្មានការអនុញ្ញាតពីប៉ូលីស ទោះបីជាវាគ្រាន់តែជាការបញ្ចេញមតិក៏ដោយ វាត្រូវបានចាត់ទុកថាជាការបំពានច្បាប់ផងដែរ ។
ការតវ៉ានេះកើតឡើងបន្ទាប់ពីលោក អាប់ឌុល ខាហា អតមេន (Abdul Khahar Orthman) ជនជាតិសិង្ហបុរី អាយុ ៦៨ ឆ្នាំ ត្រូវបានប្រហារជីវិតដោយការព្យួរកកាលពីថ្ងៃទី ៣០ ខែមីនា ឆ្នាំ ២០២២ ពីបទជួញដូរគ្រឿងញៀន ទោះបីជាមានការប្រឆាំងពីអង្គការសហប្រជាជាតិ និងក្រុមសិទ្ធិមនុស្សជាច្រើនក៏ដោយ ៕