រុស្ស៊ីព្រមាន អាមេរិក និង ណាតូ ទៀតហើយ! «ផលអាក្រក់ដែលនឹកស្មានមិនដល់» ប្រសិននៅតែបញ្ជូនសព្វាវុធទៅឲ្យអ៊ុយក្រែនទៀត

ព័ត៌មានអន្តរជាតិថ្ងៃអាទិត្យ ទី17 ខែមេសា ឆ្នាំ2022 ម៉ោង 5:24 នាទី ល្ងាច

ប្រភពពី bbc\thai

ដោយ សូរ្យរសេង៖

តើការព្រមានរបស់រុស្ស៊ីនេះ វាមានន័យថា គេចង់ប្រើអាវុធគីមី ឬអាវុធនុយក្លេអ៊ែរកម្រិតតូច ត្រឹមបំផ្លាញទឹកដីរបស់អ៊ុក្រែន ?

រដ្ឋាភិបាលរុស្ស៊ីបានបញ្ជូនសារព្រមានជាផ្លូវការ ទៅកាន់ក្រសួងការបរទេសអាមេរិក ក្នុងទម្រង់ជាកំណត់ទូត តាមរយៈស្ថានទូតរុស្ស៊ី នៅទីក្រុងវ៉ាស៊ីនតោន ឯកសារពីរទំព័រចែងថា សហរដ្ឋអាមេរិក និងសមាជិករបស់អង្គការសន្ធិសញ្ញាអាត្លង់ទិកខាងជើង ឬ NATO បើនៅតែផ្គត់ផ្គង់អាវុធដល់អ៊ុយក្រែនតទៅទៀត គឺដូចទៅនឹងការ «បញ្ឆេះ» ជម្លោះ ហើយវាអាចឈានដល់អ្វីដែលអ្នកការទូតរុស្ស៊ីហៅថា «ផលវិបាករបស់ពួកគេគឺមិនអាចទាយទុកជាមុនបាន»។

ការព្រមាននេះត្រូវបានចេញនៅថ្ងៃអង្គារ ទី១២ ខែមេសា មុនពេលអាមេរិក ប្រកាសជំនួយយោធាថ្មីដល់អ៊ុយក្រែន មានតម្លៃ ៨០០ លានដុល្លារ ជំនួយនេះរួមមានការបញ្ជូនអាវុធកាំភ្លើងធំរយៈចម្ងាយឆ្ងាយជាច្រើនប្រភេទ ដូចជា howitzer ត្រូវបានផ្គត់ផ្គង់ដំបូងដោយសហរដ្ឋអាមេរិកដល់អ៊ុយក្រែន ដើម្បីបង្កើនសមត្ថភាពប្រយុទ្ធរបស់កងទ័ពអ៊ុយក្រែនឱ្យស្មើនឹងកងទ័ពរុស្ស៊ី។

គ្រឿងសព្វាវុធរបស់សហរដ្ឋអាមេរិក ដែលត្រូវបានដឹកជញ្ជូនជាលើកដំបូង នឹងធ្វើដំណើរទៅអ៊ុយក្រែននៅប៉ុន្មានថ្ងៃនេះ ស្របពេលដែលកងកម្លាំងរុស្ស៊ីបង្កើនការវាយប្រហាររបស់ខ្លួនលើតំបន់ Donbass ភាគខាងកើត និងម៉ារីយូប៉ូល ។

មេដឹកនាំអ៊ុយក្រែនព្រមានពិភពលោក ឲ្យត្រៀមគ្រោះភ័យនុយក្លេអ៊ែររបស់រុស្ស៊ី

ប្រធានាធិបតីអ៊ុយក្រែន វ៉ូឡូឌីមៀរ សេលេនស្គី បានព្រមានពិភពលោកឱ្យត្រៀមខ្លួនឲ្យហើយទៅ ដើម្បីទប់ទល់នឹងលទ្ធភាពដែលរុស្ស៊ីអាចប្រើអាវុធនុយក្លេអ៊ែរវាយប្រហារអ៊ុយក្រែន ។

នៅក្នុងបទសម្ភាសន៍ជាមួយ CNN លោក សេលេនស្គី បាននិយាយថា គាត់មានការព្រួយបារម្ភដោយការព្រមានពីនាយកទីភ្នាក់ងារស៊ើបការណ៍សម្ងាត់កណ្តាល (CIA) របស់សហរដ្ឋអាមេរិក ដែលថារុស្ស៊ីអាចប្រើប្រាស់អាវុធនុយក្លេអ៊ែរយុទ្ធសាស្ត្រ (tactical nuclear weapon) ឬអាវុធនុយក្លេអ៊ែរខ្នាតតូច ដែលបង្កការខូចខាតក្នុងកម្រិតលើអ៊ុយក្រែន។

នៅពេលសំណួរសួរលោក សេលេនស្គី ថាតើសង្គ្រាមនឹងបន្តដល់ពេលណា? មេដឹកនាំអ៊ុយក្រែនបាននិយាយថា នេះអាស្រ័យលើកត្តាសំខាន់ពីរ រួមទាំងសមិទ្ធិផលយោធារបស់កងទ័ពអ៊ុយក្រែននៅក្នុងសមរភូមិ និងទណ្ឌកម្មលើរុស្ស៊ី ពីសហគមន៍អន្តរជាតិ ។ បច្ចុប្បន្នទាំងពីរនេះកំពុងដំណើរការល្អ ប៉ុន្តែនៅមិនទាន់គ្រប់គ្រាន់ដើម្បីបញ្ឈប់រុស្ស៊ីបានទាំងស្រុងនៅឡើយ ។

«អ្នកខ្លះនិយាយថា សង្គ្រាមអាចអូសបន្លាយច្រើនឆ្នាំ ប៉ុន្តែយើងអាចបញ្ចប់វាក្នុងរយៈពេលដ៏ខ្លី យើងទទួលបានអាវុធកាន់តែច្រើន និងកាន់តែលឿន យើងនឹងកាន់តែរឹងមាំ ហើយសន្តិភាពនឹងមកដល់ឆាប់ៗ» លោក សេលេនស្គីនិយាយ ៕

ហាមធ្វើការចម្លងអត្ថបទ ដោយមិនមានការអនុញ្ញាត្តិ។

ភ្ជាប់ទំនាក់ទំនងជាមួយយើងឥឡូវនេះ

អត្ថបទប្រហាក់ប្រហែល