តុលាការកំពូលថៃ ចេញដីកាចាប់ខ្លួនលោកស្រី យីង ឡាក់

ព័ត៌មានអន្តរជាតិថ្ងៃពុធ ទី20 ខែមេសា ឆ្នាំ2022 ម៉ោង 12:30 នាទី ល្ងាច

នាយកដ្ឋានឧក្រិដ្ឋកម្មសម្រាប់អ្នកនយោបាយ របស់តុលាការកំពូល បានចេញដីកាចាប់ខ្លួនលោកស្រី យីងឡាក់ ក្នុងសំណុំរឿង «ផ្លូវបង្ហាញប្រទេសថៃ (Roadshow Thailand)»។

តុលាការកំពូលសម្រាប់អ្នកកាន់មុខតំណែងនយោបាយ បានកំណត់ពេលសវនាការដំបូង (ត្រួតពិនិត្យសក្ខីកម្ម) ក្នុងសំណុំរឿងដែលប្តឹងដោយគណៈកម្មាធិការការពារ និងប្រឆាំងអំពើពុករលួយជាតិថៃ ឬ (NACC) ទៅលើលោកស្រី យីងឡាក់ ស៊ីណាវ៉ាត្រា អតីតនាយករដ្ឋមន្ត្រីថៃ និងគូកន ៥ រូបទៀត លើការចោទប្រកាន់ពីការប្រព្រឹត្តខុស ឬការមិនបំពេញកាតព្វកិច្ច និង ពុករលួយដោយប្រើអំណាចក្នុងមុខតំណែង ។

ជនជាប់ចោទទាំង ៥ នាក់បានមកដល់តុលាការ លើកលែងតែលោកស្រី យីងឡាក់ ស៊ីណាវ៉ាត្រា ចុងចោទទី១ ដោយជនជាប់ចោទទី១ មានឯកសារតែងតាំងលោក ណុបផាដុន ឡៅថង ជាមេធាវី ដែលតុលាការអនុញ្ញាត។

តុលាការបានអាន និងពន្យល់ដីកាសម្រេចឲ្យជនជាប់ចោទទាំង ៦ នាក់ស្តាប់ ដោយមេធាវីខាងជាប់ចោទទាំងអស់បដិសេធការចោទប្រកាន់ និងបានធ្វើលិខិតស្នើសុំពន្យារពេលផ្តល់សក្ខីកម្ម ។ តុលាការបានផ្តល់ការអនុញ្ញាត និងបានបើកសវនាការលើភ័ស្តុតាងនៅថ្ងៃទី ១២ ខែកញ្ញា ឆ្នាំ ២០២២ វេលាម៉ោង ៩ និង ៣០ នាទីព្រឹក ។

ត្រៀមចេញដីកាចាប់ខ្លួន លោកស្រី យីងឡាក់ ដែលមិនមកតុលាការដោយគ្មានការជូនដំណឹង ដោយឃើញថាមានចរិតរត់គេចហើយទុកឱ្យ «NACC» ចាត់ការតាមដានឲ្យមកទទួលការចោទប្រកាន់ ៕