ប្រភព naewna

ដោយ ម៉ារ៉ា

ក្រសួងការពារជាតិអាមេរិក បានផ្សាយថា ក្រសួងការបរទេសអាមេរិកបានអនុម័តការលក់ឧបករណ៍ ការបណ្តុះបណ្តាល និងសម្ភារៈផ្សេងៗទៀត ដើម្បីគាំទ្រប្រព័ន្ធការពារដែនអាកាស «Patriot» នៅក្នុងកិច្ចព្រមព្រៀងដែលមានតម្លៃរហូតដល់ ៩៥ លានដុល្លារ ។

ក្រសួងការពារជាតិអាមេរិក ឬមន្ទីរប៉ង់តាហ្គន បានជូនដំណឹងដល់សភាអាមេរិកថា ក្រសួងការបរទេសសហរដ្ឋ​អាមេរិក បានយល់ព្រមលក់ឧបករណ៍បណ្តុះបណ្តាល និងរបស់របរផ្សេងៗទៀត ដើម្បីគាំទ្រដល់ប្រព័ន្ធការពារដែនអាកាស Patriot នៅក្នុងកិច្ចព្រមព្រៀងដែលមានតម្លៃរហូតដល់ ៩៥ លានដុល្លារ ឬប្រមាណ ៣៨៥.៩០៤.៩៧៨.៧៥៩ រៀលប្រាក់ខ្មែរ ។

កិច្ចព្រមព្រៀងនេះគ្របដណ្តប់លើការហ្វឹកហ្វឺន ការធ្វើផែនការ ការហ្វឹកហ្វឺនលើទីលាន កាតព្វកិច្ចសកម្ម ថែទាំ និងប្រតិបត្តិការប្រព័ន្ធការពារដែនអាកាស Patriot និងឧបករណ៍ពាក់ព័ន្ធ ហើយ​ថា ការ​ផ្តល់​សម្ភារៈ​យោធា​លើក​នេះ នឹងជួយរក្សាផលប្រយោជន៍របស់សហរដ្ឋអាមេរិកខាង សេដ្ឋកិច្ច និងសន្តិសុខ នឹងអនុញ្ញាតឱ្យអ្នកទិញបន្តកិច្ចខិតខំប្រឹងប្រែងដើម្បីធ្វើទំនើបកម្មកងកម្លាំងប្រដាប់អាវុធ និងបង្កើនសមត្ថភាពការពារខ្លួនរបស់ពួកគេ ។

នេះបើតាមវិមានប្រធានាធិបតីតៃវ៉ាន់និយាយថា នេះជាកិច្ចព្រមព្រៀងលក់សព្វាវុធជុំទី ៣ ចាប់តាំងពីប្រធានាធិបតីអាមេរិក ចូ បៃដេន ចូលកាន់តំណែង និងបង្ហាញពីទំនាក់ទំនងដ៏រឹងមាំរវាងភាគីទាំងពីរ ។ ទោះបីជាក្រសួងការបរទេសបានអនុម័តរួចហើយក្តី ប៉ុន្តែ​នោះ​មិន​មាន​ន័យ​ថា ​កិច្ច​ព្រម​ព្រៀង​ត្រូវ​បាន​ចុះ​ហត្ថលេខា ​ឬ​ការ​ចរចា​ត្រូវ​បាន​បញ្ចប់​នោះ​ទេ ប៉ុន្តែក្រុមហ៊ុន Raytheon Technology ត្រូវបានគេរំពឹងថានឹងក្លាយជាដៃគូដែលលក់សម្ភារៈយោធាទៅឱ្យតៃវ៉ាន់នៅពេលនេះ ក្រសួងការពារជាតិរបស់តៃវ៉ាន់បាននិយាយថា ខ្លួនរំពឹងថាកិច្ចព្រមព្រៀងនេះនឹងត្រូវបញ្ចប់នៅខែនេះ ៕