បេក្ខជន-បេក្ខនារី ក្រុមប្រឹក្សាសង្កាត់ផ្សារដើមគរ
អត្ថបទ សូរ្យសែង៖
នៅសង្កាត់ផ្សារដើមគរ ខណ្ឌទួលគោក រាជធានីភ្នំពេញ លោក ទិត្យ សាមឿន បច្ចុប្បន្នជាចៅសង្កាត់ផ្សារដើមគរ និងជាបេក្ខជនក្រុមប្រឹក្សាសង្កាត់ ក្នុងចំណោម បេក្ខជន-បេក្ខនារី ៣៤ រូប ខាងគណបក្សប្រជាជនកម្ពុជា មានអាជីពជាអ្នកនយោបាយជើងចាស់មួយរូប និងជាអ្នកប្រឡូកផ្ទាល់រួមសុខទុក្ខជាមួយប្រជាជនក្នុងមូលដ្ឋានទាំងថ្ងៃ យប់ បានថ្ពក់យកបេះដូងប្រជាពលរដ្ឋ ដោយសារអំពើល្អរបស់គាត់ ។
រូបរាងធាត់បន្តិច សម្បុរខ្មៅ សក់ស្កូវ សម្តីមួយៗ តែម៉ឺងម៉ាត់នឹងកិច្ចការងារ ក្នុងនាមជាអាណាព្យាបាលសង្កាត់ផ្សារដើមគរ ការងារមើលថែទាំ និងយកចិត្តទុកដាក់បម្រើពលរដ្ឋក្នុងមូលដ្ឋាន មិនគិតថ្ងៃយប់ ទាំងសន្តិសុខ អនាម័យ សណ្តាប់ធ្នាប់ ពិសេសក្នុងបរិបទកូវីដ-១៩ ដែលក្រោមវិធានការរបស់រាជរដ្ឋាភិបាល និងក្រសួងសុខាភិបាល លោក សាមឿន រួមទាំងក្រុមប្រឹក្សាសង្កាត់ទាំងអស់ បានរវាសរវៃជាមួយនឹងជីវភាពរបស់ប្រជាពលរដ្ឋដែលជួបការលំបាក ខ្វះខាត ដែលរាតត្បាតដោយជំងឺកូវីដ-១៩ ។
ល្បាតពេលរាត្រី ជាមួយឯកឧត្តម ជា ពិសី អភិបាលខណ្ឌទួលគោក
ពលរដ្ឋជាច្រើនតែងនិយាយចេញមកដោយបេះដូងបរិសុទ្ធថា «ខ្ញុំធ្លាប់បានស្គាល់គាត់យូរឆ្នាំមកហើយ ខ្ញុំស្គាល់គាត់ច្បាស់ ហើយគាត់ជាអ្នកដែលយកចិត្តទុកដាក់ប្រជាជន និងមានប្រជាប្រិយខាងនិយាយពីរោះក្បោះក្បាយ» គាត់ស្គាល់ប្រជាជនច្បាស់ ប្រជាជនក៏ស្គាល់គាត់ច្បាស់ដូចគ្នា ។
ឥឡូវនេះ លោក ទិត្យ សាមឿន ចាស់ព្រឹទ្ធក្នុងមូលដ្ឋានសង្កាត់ផ្សារដើមគរ ដែលមានវ័យ ៦២ ឆ្នាំរូបនេះ ដែលរូបលោកត្រូវបានប្រជាពលរដ្ឋមានទំនុកចិត្តបោះឆ្នោត បានមកឈរឈ្មោះជាបេក្ខជនក្រុមប្រឹក្សារសង្កាត់នៅថ្ងៃទី ៥ ខែមិថុនា ឆ្នាំ ២០២២ ជិតមកដល់នេះ ។ បញ្ជាក់ពីជំនឿលើរូបលោក ពលរដ្ឋនឹងក្រឡេកមើលបេក្ខជនរបស់គាត់ ជាបុគ្គលដ៏ល្អសម្រាប់ប្រជាជនខ្មែរក្នុងមូលដ្ឋានរបស់ខ្លួន»។
ក្នុងពិធីចែកអំណោយជាមួយលោក ឯក ឃុនឌឿន អតីតអភិបាលខណ្ឌទួលគោក
ក្នុងនាមលោក សាមឿន បានពោលក្នុងទឹកមុខញញឹមថា ៖ «ជាអាណាព្យាបាលក្នុងមូលដ្ឋាន បម្រើពលរដ្ឋតែងមានការខ្វះចន្លោះ នឹងថ្នាំងថ្នាក់ខ្លះៗ ប៉ុន្តែលោកថា អ្នកធ្វើតែងមានខុស លើកលែងតែអ្នកមិនធ្វើ ទើបមិនខុស...»។
លោក សាមឿន បានអំពាវនាវឲ្យពលរដ្ឋទៅបោះឆ្នោត បោះឆ្នោតជូនក្រុមប្រឹក្សាសង្កាត់ គឺបោះឆ្នោតជូនគណបក្សប្រជាជន... បោះឆ្នោតជូនគណបក្សប្រជាជន យើងបានរស់ទាំងអស់គ្នា រស់ក្នុងសន្តិភាព រស់ជាមួយការអភិវឌ្ឍន៍ប្រទេស រស់បង្កើនសេដ្ឋកិច្ច ក្រោមស្នាដៃមាសរបស់សម្តេចតេជោ ហ៊ុន សែន ជានាយករដ្ឋមន្ត្រី ៕