ដោយ សូរ្យរិទ្ធ៖
បើទោះជាមានទណ្ឌកម្មសេដ្ឋកិច្ច និងពាណិជ្ជកម្មពីប្រទេសលោកខាងលិចធ្ងន់ធ្ងរយ៉ាងណាក៏ដោយ រយៈពេលត្រឹមតែ ១០០ ថ្ងៃ រុស្ស៊ីរកចំណូលបាន ៩៣.០០០ លានអឺរ៉ូបញ្ចូលរតនាគាររបស់ខ្លួន ពីការនាំចេញប្រេងឥន្ធនៈ ដែលភាគច្រើននាំទៅអឺរ៉ុប ។ ចំពេលមានការអំពាវនាវឱ្យដាក់ទណ្ឌកម្មធ្ងន់ធ្ងរលើប្រទេសរុស្ស៊ីតាមគ្រប់មធ្យោបាយបន្ថែមទៀតដែលអាចធ្វើទៅបាន ។
មជ្ឈមណ្ឌលស្រាវជ្រាវថាមពល និងខ្យល់ស្អាត (CREA) ដែលជាអង្គការឯករាជ្យហ្វាំងឡង់ និងជាអ្នកបង្ហាញទិន្នន័យ បានបន្ថែមក្នុងរបាយការណ៍ថា សហភាពអឺរ៉ុបគឺជាអតិថិជនដ៏ធំបំផុតនៃប្រេងឥន្ធនៈពីប្រទេសរុស្ស៊ីក្នុងអំឡុងពេល ១០០ ថ្ងៃដំបូងនៃសង្រ្គាមអ៊ុយក្រែន ដែលមានចំនួន ៦១% ឬប្រហែល ៥៧.០០០ លានអឺរ៉ូ បន្ទាប់មកប្រទេសចិនមានចំនួន ១២.៦០០ លានអឺរ៉ូ និងអាល្លឺម៉ង់ ១២.១០០ លានអឺរ៉ូ និង អ៊ីតាលី ៧.៨០០ លានអឺរ៉ូ ។
ខណៈពេលដែលរុស្ស៊ីខ្លួនឯង រកចំណូលបានខ្ពស់បំផុតពីការនាំចេញប្រេងឥន្ធនៈក្នុងទម្រង់ជាប្រេងឆៅចំនួន ៤៦.០០០ លានអឺរ៉ូ បន្ទាប់មកឧស្ម័នបំពង់បង្ហូរប្រេង ផលិតផលប្រេង ឧស្ម័នធម្មជាតិរាវ (LNG) និងធ្យូងថ្ម ជាដើម ។
ទោះបីជាការនាំចេញរបស់រុស្ស៊ីបានធ្លាក់ចុះនៅក្នុងខែឧសភាក៏ដោយ ដោយសារប្រទេស និងក្រុមហ៊ុនផ្សេងៗនាំគ្នា ចៀសធ្វើពាណិជ្ជកម្មជាមួយរុស្ស៊ី ដោយសារការឈ្លានពានអ៊ុយក្រែន បណ្តាលឲ្យ ប្រេងតម្លៃឥន្ធនៈបានកើនឡើងជុំវិញពិភពលោក ។ ប៉ុន្តែមានឯណា រុស្ស៊ីនៅតែរកចំណូលចូលក្នុងឃ្លាំងប្រាក់របស់ខ្លួនបានសន្ធឹកដដែល ហើយចំណូលនេះឡើងដល់កម្រិតកំណត់ត្រា ដែលបច្ចុប្បន្ន ការនាំចេញប្រេងឥន្ធនៈមានចំនួនខ្ពស់ជាងឆ្នាំមុនប្រមាណ ៦០% ។
មជ្ឈមណ្ឌលស្រាវជ្រាវថាមពល និងខ្យល់ស្អាត (CREA) ក៏ផ្តល់ព័ត៌មានផងដែរថា រុស្ស៊ីទំនងជាទទួលបានទ្រព្យសម្បត្តិកាន់តែច្រើន បន្ទាប់ពីប្រទេសមួយចំនួនបានបង្កើនការទិញថាមពលរបស់ពួកគេ ដូចជាប្រទេសចិន ឥណ្ឌា អារ៉ាប់រួមអេមីរ៉ាត ឬសូម្បីតែប្រទេសបារាំងក៏ដោយ ។
អ្នកវិភាគ Lori Milliveta របស់ CREA បាននិយាយថា «ខណៈដែលសហភាពអឺរ៉ុបកំពុងពិចារណាលើការដាក់ទណ្ឌកម្មកាន់តែរឹងត្អឹងលើប្រទេសរុស្ស៊ី បារាំងបានបង្កើនការនាំចូលពីរុស្ស៊ី ក្នុងនាមជាប្រទេសទិញឧស្ម័នធម្មជាតិរាវ (LNG) ធំជាងគេរបស់ពិភពលោក ទោះបីជាកិច្ចសន្យាទិញលក់រយៈពេលខ្លីក៏ដោយ» ។
ចំណែកអ៊ុយក្រែននៅតែបន្តស្រែកឲ្យដាក់ទណ្ឌកម្មអន្តរជាតិកាន់តែធ្ងន់ធ្ងរថែមទៀតទៅលើរុស្ស៊ីតាមគ្រប់មធ្យោបាយ ដើម្បីកុំឲ្យរុស្ស៊ីមានទុនបន្តសង្គ្រាមតទៅទៀត ៕