អត្ថបទ សូរ្យរិទ្ធ៖
យូ ស៊ី គុន ប្រធានសភាតៃវ៉ាន់ បាននិយាយថា តៃវ៉ាន់មានមីស៊ីលចម្ងាយឆ្ងាយ ល្បឿនលឿនជាងសម្លេង ផលិតដោយខ្លួនឯង អាចបាញ់ដល់ទីក្រុងប៉េកាំង និង កណ្តាលនៃប្រទេសចិនដីគោក ហើយថា តៃវ៉ាន់មិនចង់ប្រឈមមុខជាមួយចិនទេ ប៉ុន្តែវាជាសក្ដានុពលក្នុងការវាយបកដោយកម្លាំងវិញ ។ ក្នុងករណីមានជម្លោះ តៃវ៉ាន់នឹងមិនមែនជាអ្នកវាយប្រហារចិនមុននោះទេ ប៉ុន្តែមុននឹងចិនគិតចង់វាយប្រហារតៃវ៉ាន់ត្រូវគិតជាមុនសិន! តៃវ៉ាន់ក៏មានសមត្ថភាពវាយប្រហារផងដែរ ។
តៃវ៉ាន់បានចំណាយថវិកាជាង 400 លានដុល្លារក្នុងឆ្នាំ 2018 ដើម្បីបង្កើនសមត្ថភាពនៃកាំជ្រួច Cruise របស់ខ្លួនឈ្មោះ Yung Feng ដោយពង្រីករយៈចម្ងាយអតិបរមារបស់ខ្លួនដល់ទៅ 1,200 ម៉ាយ ដែលអាចបាញ់បានឆ្ងាយដល់ទីក្រុងប៉េកាំង។
ចំណែកខាងចិន និយាយវាយបកទៅតៃវ៉ាន់វិញថា ការវាយប្រហារបែបណារបស់តៃវ៉ាន់ នឹងហុចផលដ៏អាក្រក់ចំពោះខ្លួនឯងទៅវិញទេ ។ បើតៃវ៉ាន់ហ៊ានយកពងមាន់ ជល់នឹងថ្ម វានឹងបង្កើនល្បឿនគ្រោះថ្នាក់ដល់ខ្លួនឯងដល់ទីបញ្ចប់កាន់តែលឿន ។
ការលើកឡើងរបស់តៃវ៉ាន់បែបនេះ បានកើតឡើងបន្ទាប់ពីសប្តាហ៍នេះ ប្រទេសចិនទើបតែដាក់ឱ្យដំណើរការនាវាផ្ទុកយន្តហោះទី៣ របស់ខ្លួន ជាលើកដំបូងដែលអភិវឌ្ឍទាំងស្រុងដោយចិនខ្លួនឯង វាមានឈ្មោះថា «ហ្វូជៀន(Fujian )» ឬ«ហុកកៀន» ហើយត្រូវបានគេចាត់ទុកថាជានាវាចម្បាំងទំនើបបំផុតមួយរបស់យោធាចិន ។ អ្នកជំនាញនិយាយថា Fujian អាចប្រៀបបាននឹងនាវា USS Gerald R Ford ដែលជានាវាផ្ទុកយន្តហោះថ្មីបំផុតរបស់អាមេរិក ភាពខុសគ្នាត្រង់ថា Fujian មិនប្រើថាមពលនុយក្លេអ៊ែរដូចនាវាអាមេរិក ៕
នាវាផ្ទុកយន្តហោះរបស់ចិន ហ្វូជៀន
នាវាផ្ទុកយន្តហោះរបស់សហរដ្ឋអាមេរិក USS Gerald R Ford