អត្ថបទ សាវុឌ្ឍ៖
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា បានអនុញ្ញាតឲ្យលោកឧត្តមសេនីយ៍ឯក ប្រាវិត វង្សសុវណ្ណ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមប្រជុំរដ្ឋមន្ត្រីការពារជាតិអាស៊ាន (ADMM) លើកទី ១៦ នៅរាជធានីភ្នំពេញ ព្រះរាជាណាចក្រកម្ពុជា នាថ្ងៃទី ២១ ខែមិថុនា ឆ្នាំ ២០២២ ។
ភាគីទាំងពីរបានពិភាក្សា ក្នុងការគាំទ្រដល់សន្តិសុខ និងសុវត្ថិភាពរបស់ប្រជាជននៃប្រទេសទាំងពីរ រួមទាំងការពង្រឹងឯកភាព សាមគ្គីភាពតែមួយរបស់អាស៊ាន ដើម្បីសន្តិភាព និងសន្តិសុខក្នុងតំបន់ ។
លោកឧត្តមសេនីយ៍ ប្រាវិត បានសម្តែងការដឹងគុណចំពោះប្រទេសកម្ពុជា ក្នុងការជួយគាំទ្រការបង្រ្កាបបទល្មើសផ្សេងៗ និងដោះស្រាយបញ្ហាឧក្រិដ្ឋកម្មឆ្លងដែននាពេលកន្លងមក រួមទាំងការជួយថែរក្សាប្រជាជនថៃនៅកម្ពុជា និងសន្តិភាពតាមព្រំដែនផងដែរ ។ ប្រទេសថៃបានត្រៀមខ្លួនរួចជាស្រេចក្នុងការគាំទ្រកិច្ចសហប្រតិបត្តិការខាងយោធា និងសហប្រតិបត្តិការស្ថាបនាលើគ្រប់វិស័យ ដើម្បីសុវត្ថិភាព និងសន្តិភាពរបស់ប្រជាជននៃប្រទេសទាំងពីរ ។
សម្តេចពិជ័យសេនា ទៀ បាញ់ ក៏បានថ្លែងអំណរគុណថៃ ចំពោះការគាំទ្រកម្ពុជាក្នុងការធ្វើជាម្ចាស់ផ្ទះនៃកិច្ចប្រជុំ ADMM លើកទី១៦ ក៏ដូចជាគាំទ្រចលនារួមគ្នានៃយន្តការសន្តិសុខនៅគ្រប់កម្រិត ។ ជាលទ្ធផល កិច្ចខិតខំប្រឹងប្រែងសន្តិសុខរួមគ្នានៃប្រទេសទាំងពីរមានលក្ខណៈស្ថាបនា ដោយសង្កត់ធ្ងន់ថា យើងត្រូវធ្វើការយ៉ាងជិតស្និទ្ធជាមួយគ្នា ដើម្បីពង្រឹងតំបន់ក្នុងស្ថានការណ៍ និងពិភពលោក ជាមួយនឹងភាពស្មុគស្មាញ ដោយកម្ពុជាត្រៀមខ្លួនជាស្រេចក្នុងការគាំទ្រ និងសហការជាមួយប្រទេសថៃ ៕