អត្ថបទ សាវុឌ្ឍ៖
តារាម៉ូដែលសិចស៊ីល្បីឈ្មោះមួយរូបរបស់ប្រទេសភូមា ទិន សាវិនចរ ដែលស្លៀកឯកសណ្ឋានទាហានរដ្ឋ Shan ភាគខាងជើងទៅចូលរួមពិធីមង្គលការនៅបានហៃ ត្រូវទាហានភូមាចាប់ខ្លួន ពេលធ្វើដំណើរទៅព្រលានយន្តហោះ ឡាស៊ីអូ (Lashio) ដើម្បីឡើងយន្តហោះត្រឡប់ទៅទីក្រុងយ៉ាងហ្គុន (Yangon) ឥឡូវនេះមិនទាន់ដឹងជោគវាសនាយ៉ាងណានៅឡើយ ។
នាង សាវិនចរ ធ្វើដំណើរជាមួយមិត្តប្រុសនៅលើផ្លូវមួយក្នុងខេត្តដយឡេម ឆ្ពោះទៅខេត្តឡាសៀវ ភាគខាងជើងរដ្ឋសាន តែត្រូវទាហានភូមាមួយក្រុមចាប់ឃាត់ខ្លួនជាមួយមិត្តប្រុស នាំទៅសាកសួរ ។
រឿងវាមានដូចតទៅ ៖ កាលនៅពីថ្ងៃទី ៣ ខែកក្កដា ឆ្នាំ ២០២២ នាង ទិន សាវិនចរ បានស្លៀកពាក់ឯកសណ្ឋានយោធា នៃកងទ័ពគណបក្សវឌ្ឍនភាពរដ្ឋសាន ដើម្បីចូលរួមក្នុងពិធីមង្គលការកូនស្រីរបស់ឧត្តមសេនីយ៍ ចាយស៊ូ អ្នកនាំពាក្យយោធារដ្ឋសានខាងជើង ទោះបីជាគេបានចេញការព្រមានខ្លះរួចមកហើយក្តី ថានាងមិនគួរស្លៀកពាក់ «ឯកសណ្ឋានយោធា» ទៅចូលរួមមង្គលការនោះទេ ប៉ុន្តែនាងនៅតែរឹងទទឹង ។
មុនពេលទៅចូលរួមពិធីមង្គលការ នាង សាវិនចរ ទើបតែបញ្ចប់ការថតភាពយន្តឯកសារមួយ ។ ឧត្តមសេនីយ៍ ចាយស៊ូ បានសម្ភាសក្នុងទូរទស្សន៍ Tai TV Online កាលពីថ្ងៃទី ៤ កក្កដាថា កងទ័ពបក្សវឌ្ឍនភាពរដ្ឋសានបានអញ្ជើញនាង សាវិនចរ ជួយថតភាពយន្តឯកសារ ដើម្បីផ្សព្វផ្សាយការងាររបស់គណបក្ស ដែលបានអភិវឌ្ឍលើទិដ្ឋភាពជាច្រើននៃតំបន់បានហៃ និងជាច្រើនផ្សេងទៀតនៅស្រុកកេសី ដែលស្ថិតក្រោមការគ្រប់គ្រងរបស់កងទ័ពគណបក្សវឌ្ឍនភាពរដ្ឋសាន ក្នុងវិស័យអប់រំ សុខភាពសាធារណៈ ការកសាងផ្លូវ ។ល។
ក្នុងការថតរឿង នាង សាវិនចរ បានពាក់ឯកសណ្ឋានយោធារបស់កងទ័ពនៃគណបក្សវឌ្ឍនភាពរដ្ឋសាន ដោយនាងជាពិធីករបរិយាយខ្លឹមសារផ្សេងៗ ហើយក្នុងអំឡុងពេលនៃការថតនោះ គឺស្របនឹងថ្ងៃរៀបការរបស់កូនស្រីលោក ចាយស៊ូ នាងក៏បានចូលរួមក្នុងពិធីមង្គលការ ក្នុងស្លៀកពាក់ទាហានរដ្ឋសានភាគខាងជើង ។
រហូតមកដល់ពេលនេះ មិនទាន់មានសេចក្តីប្រកាសព័ត៌មានផ្លូវការណាមួយពីយោធាមីយ៉ាន់ម៉ា ទាក់ទងនឹងការចាប់ខ្លួន នាង សាវិនចរ និងមិត្តប្រុសរបស់នាងនោះទេ ហើយក៏មិនមាននរណាម្នាក់ដឹងថានាង និងមិត្តប្រុសរបស់នាងត្រូវបានឃុំខ្លួននៅឯណាដែរ ហើយជោគវាសនាយ៉ាងណា?