អត្ថបទ សូរ្យរិទ្ធ
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា រដ្ឋាភិបាលកំពុងផ្តល់ប្រាក់ឧបត្ថម្ភជាង ១០០ លានដុល្លារដល់អាជ្ញាធរអគ្គិសនីកម្ពុជា (EDC) ក្នុងឆ្នាំ ២០២២ ដើម្បីរក្សាអត្រាអគ្គិសនីឱ្យមានស្ថិរភាព ។
សម្តេចតេជោលើកឡើងថា ជម្លោះរវាងរុស្ស៊ី និងអ៊ុយក្រែន និងទណ្ឌកម្មដែលធ្វើឡើងដោយប្រទេសលោកខាងលិចមួយចំនួនប្រឆាំងនឹងរុស្ស៊ី បានជំរុញតម្លៃថាមពលពិភពលោកឡើងខ្លាំង ដែលប៉ះពាល់ដល់ប្រទេសទាំងអស់ជុំវិញពិភព លោក ។
«បើគ្មានការឧបត្ថម្ភពីរដ្ឋាភិបាល អត្រាអគ្គិសនីរបស់យើងឥឡូវនេះកើនឡើងទ្វេដង ។ ប្រទេសមួយចំនួនបានដំឡើងថ្លៃអគ្គិសនីរួចហើយ ប៉ុន្តែសម្រាប់កម្ពុជា យើងមិនទាន់ដំឡើងថ្លៃអគ្គិសនីនៅឡើយទេ» សម្តេចតេជោ មានប្រសាសន៍ ។
សម្តេចបានអំពាវនាវឲ្យប្រជាជនសន្សំសំចៃអគ្គិសនី និងគាំទ្រឲ្យប្រជាជនប្រើប្រាស់រថយន្តអគ្គិសនី ដើម្បីកាត់បន្ថយការប្រើប្រាស់ប្រេងឥន្ធនៈ និងកាត់បន្ថយការបំភាយឧស្ម័ន ។
សព្វថ្ងៃ តម្លៃប្រេងឥន្ធនៈកើនឡើង ២២% និង ៣៩% តាមលំដាប់ បើប្រៀបនឹងតម្លៃកាលពីពាក់កណ្តាលខែកុម្ភៈ ។ សម្តេចក៏បានសង្កត់ធ្ងន់លើសារសំខាន់នៃទំនប់វារីអគ្គីសនី និងរោងចក្រថាមពលពន្លឺព្រះអាទិត្យ ដើម្បីជួយរក្សាស្ថិរភាពផលិតកម្មអគ្គិសនី និងរក្សាអត្រាអគ្គិសនីចំពេលមានវិបត្តិថាមពលពិភពលោក ។
ប្រទេសចិនគឺជាអ្នកអភិវឌ្ឍន៍ទំនប់វារីអគ្គីសនីដ៏សំខាន់នៅក្នុងប្រទេស ។ អ្នកនាំពាក្យក្រសួងរ៉ែ និងថាមពលកម្ពុជាបានថ្លែងថា៖ គម្រោងដែលចិនបានវិនិយោគមានដូចជា ទំនប់វារីអគ្គិសនី រោងចក្រថាមពលដើរដោយធ្យូងថ្ម និងរោងចក្រថាមពលពន្លឺព្រះអាទិត្យមានចំនួន ៦៥,៧ ភាគរយនៃថាមពលសរុបដែលផលិតនៅក្នុងប្រទេស ។
«រោងចក្រថាមពលដែលវិនិយោគដោយប្រទេសចិន ដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ច និងសង្គមរបស់កម្ពុជា បានរួមចំណែកដល់ស្ថិរភាព និងភាពជឿជាក់នៃផលិតកម្មថាមពលក្នុងប្រទេស» អ្នកនាំពាក្យក្រសួងរ៉ែ និងថាមពល បាននិយាយ ៕