អត្ថបទ សូរ្យរិទ្ធ៖
នៅថ្ងៃទី ២៩ កក្កដា DailyNews របស់ថៃបានផ្សាយថា សមត្ថកិច្ចប៉ូលិសថៃ សហការជាមួយសមត្ថកិច្ចប៉ូលិសកម្ពុជា បានតាមដានអំពើឧក្រិដ្ឋឆបោករាប់ខែ និងបានស៊ើបអង្កេតរួមគ្នារហូតទទួលបានភស្តុតាង ទើបអាចទទួលបានដីកាចាប់ខ្លួន នៅទីតាំង ៤ កន្លែងក្នុងប្រទេសកម្ពុជា ហើយបានរៀបផែនការប្រតិបត្តិការរួមគ្នា ចុះបង្ក្រាបបាននៅខេត្តព្រះសីហនុ និងក្រុងប៉ោយប៉ែតតែម្តង ។
ទាក់ទិននឹងបញ្ហានេះ កាលពីថ្ងៃទី២៦ ខែកក្កដា កន្លងទៅ ខាងប៉ូលិសថៃ បានចាត់ឲ្យលោកឧត្តមសេនីយ៍ទោ Phanthana Nuchanart ប្រធានក្រុមប្រតិបត្តិការ PCT ឈុតទី១, ប្រធានក្រុមប្រតិបត្តិការ PCT ឈុតទី៥ លោកឧត្តមសេនីយ៍ទោ Thanit Thaiwatcharamas មេបញ្ជាការអន្តោប្រវេសន៍ បានមកទទួលជនជាតិថៃចំនួន ៩៤នាក់ ពីកម្ពុជាវិញ ក្នុងនេះដីកាចាប់ខ្លួនចំនួន ៧៩នាក់ ដែលប្រព្រឹត្តបទល្មើសផ្សេងៗ ។
ទីតាំងទីមួយ៖ នៅសណ្ឋាគារជិងឈឹង ផ្លូវ ២ធ្នូ ខេត្តព្រះសីហនុ ឃាត់ខ្លួនជនសង្ស័យចំនួន ២១នាក់ តាមដីកាចាប់ខ្លួន ដោយមានផែនការបោកបញ្ឆោត និងបោកឲ្យលង់ស្នេហ៍តាម app Tinder Line ដោយក្លែងបន្លំអត្តសញ្ញាណតាមរយៈបណ្តាញសង្គមអនឡាញ បន្ទាប់មកចាប់ផ្តើមបោកប្រាស់ឲ្យដាក់ទុនវិនិយោគនៅក្នុង MetaTrader 5 (Forex) ដោយប្រាប់ឱ្យធ្វើពាណិជ្ជកម្ម ការវិភាគបច្ចេកទេស និងការណែនាំការវិនិយោគ 1.MKNDY.Ltd, 2.Big Uncle ដែលជាឈ្មួញកណ្តាលក្លែងក្លាយ និងបោកប្រាស់ប្រាក់ជនរងគ្រោះ ។
ទីតាំងទីពីរ ៖ អគារ ៥ ជាន់ ផ្លូវ ១០៤ ក្រុងព្រះសីហនុ ឃាត់ខ្លួនជនសង្ស័យតាមដីកាចំនួន ១៨ នាក់ ជាក្រុមប្រព័ន្ធ IT ដែលមានឈ្មោះថា «ក្រោយផ្ទះ» ដោយប្រើប្រាស់ប្រព័ន្ធកុំព្យូទ័រស្វ័យប្រវត្តិ (AI) ជាលេខដើមនៃការហៅទូរស័ព្ទតាមរយៈប្រព័ន្ធ VOIP ទៅកាន់ជនរងគ្រោះនៅថៃ ប្រសិនបើការហៅទូរស័ព្ទត្រូវបានទទួល វានឹងដំណើរការដោយស្វ័យប្រវត្តិ ដោយឲ្យចុចលេខ “៩” ដើម្បីទាក់ទងទៅកាន់បុគ្គលិក ។ បន្ទាប់មកទូរស័ព្ទនឹងបង្វែរទៅជនរងគ្រោះដើម្បីនិយាយជាមួយក្រុមល្មើស ហៅទូរស័ព្ទលេខមួយខ្សែទៀត ដោយខ្សែទី១ នឹងបោកប្រាស់ ជាបុគ្គលិកប្រៃសណីយ៍ ដោយបោកថាឆែកឆេររកឃើញទំនិញខុសច្បាប់ ។ មុខងារសំខាន់នៃខ្សែទី ១ គឺមិនត្រឹមតែចាប់ផ្តើមបញ្ឆោតជនរងគ្រោះនោះទេ ប៉ុន្តែនឹងបញ្ឆោតទិន្នន័យពីជនរងគ្រោះ បន្ទាប់មកនៅពេលដែលជនរងគ្រោះជឿលើការបោកប្រាស់ពីខ្សែទី ១ ទូរស័ព្ទនឹងផ្ទេរទៅជនរងគ្រោះនិយាយទៅកាន់ខ្សែទី ២ បន្តទៀត ដែលក្លែងខ្លួនជាមន្រ្តីប៉ូលីសមកពីប្រទេសថៃ «តំបន់លេមឆាបាំង» រួចនិយាយគំរាមបង្ខំឲ្យធ្វើរឿងក្តីនេះបង្កការភ័យខ្លាចដល់ជនរងគ្រោះ ។ ការបោកបញ្ឆោតជនរងគ្រោះឱ្យបង្ហាញភាពគ្មានកំហុស រួចឲ្យផ្ទេរប្រាក់ ប៉ុន្តែប្រសិនបើជនរងគ្រោះមិនបានផ្ទេរប្រាក់ទេ នឹងបញ្ជូនទៅខ្សែទូរស័ព្ទទី៣ បន្តទៀត ដែលកន្លែងជាមន្ត្រីនគរបាលជាន់ខ្ពស់ម្នាក់ជា«អធិការនគរបាលស្រុកលេមឆាបាំង» ដើម្បីគំរាមកំហែងសំណុំរឿង និងចោទប្រកាន់ ដើម្បីធ្វើឱ្យជនរងគ្រោះកាន់តែភ័យខ្លាច ។
ទូរស័ព្ទខ្សែទី ២ និងខ្សែទី ៣ នឹងផ្តោតលើការបោកបញ្ឆោតជនរងគ្រោះឱ្យផ្ទេរប្រាក់ តាមរយៈការសន្ទនាជាមួយបុគ្គលិកនៅខ្សែទី ១, ២, ៣ ប្រសិនបើជនរងគ្រោះណាមួយចាប់ផ្តើមចាញ់បោក ក្រុម«ក្រោយផ្ទះ» នឹងផ្តល់ព័ត៌មានដល់បុគ្គលិកនៅខ្សែទី ១, ២ ថាតើព័ត៌មានរបស់អ្នកជនរងគ្រោះត្រឹមត្រូវឬអត់ ហើយប្រសិនបើជនរងគ្រោះបាត់បង់ព័ត៌មានច្រើនពេកនៅលើបន្ទាត់ទី ១, ២, ៣ នោះក្រុមការងារខាងក្រោយនឹងអាច «ទាញុកប្រាក់» ចេញពីគណនីរបស់ជនរងគ្រោះបាន ។ តាមរយៈការជញ្ជក់លុយ គឺយកព័ត៌មានផ្ទាល់ខ្លួនរបស់ជនរងគ្រោះ ដែលបានប្រគល់ឱ្យបុគ្គលិក ប៉ុស្តិ៍លេខ១, ២,៣ ដើម្បីផ្ទេរប្រាក់ដោយជនរងគ្រោះមិនដឹងខ្លួន ។
ទីតាំងទីបី៖ អគារ ៨ ជាន់ ផ្លូវ ៧០២ ទីក្រុងព្រះសីហនុដដែល ត្រូវចាប់ឃាត់ខ្លួន ១០ នាក់ ជាមួយនឹងផែនការប្រើឈ្មោះ «ក្រុមហ៊ុនគ្រប់គ្រងទ្រព្យសម្បត្តិ ហ្វូស៊ីស ចាំកាត់» ឱ្យខ្ចីប្រាក់ ប៉ុន្តែបោកប្រាស់ យកថ្លៃសេវា ពីជនរងគ្រោះដែលខ្ចីលុយ ។ ឧក្រិដ្ឋជនមួយក្រុមនេះបាននិងកំពុងស្វែងរកជនរងគ្រោះពីការផ្សាយពាណិជ្ជកម្មកម្ចី ឬប្រាក់កម្ចីតាមអ៊ីនធឺណិត ដោយលើកឡើងពីក្រុមហ៊ុននៅប្រទេសថៃដែលអាចទុកចិត្តបាន ដើម្បីធានាដល់ជនរងគ្រោះនៅលើប្រព័ន្ធផ្សព្វផ្សាយសង្គម Facebook ឬ google ផ្តល់ភាពងាយស្រួលដល់សាធារណជនទូទៅក្នុងការទទួលបានព័ត៌មានមិនពិតនេះ តាមប្រព័ន្ធបោកប្រាស់ ខ្សែទី ១ ដើរតួជានិយោជិតដើម្បីបញ្ឆោតជនរងគ្រោះនៃការស្នើសុំប្រាក់កម្ចីតាមអ៊ីនធឺណិត ។ ខ្សែទី ២ ប្រាប់ជនរងគ្រោះថាពួកគេត្រូវបង់ថ្លៃធានារ៉ាប់រងលើប្រាក់កម្ចី ថ្លៃសេវា និងការចំណាយផ្សេងៗទៀត ទើបអាចខ្ចីលុយពីក្រុមហ៊ុនបាន ហើយនៅពេលជនរងគ្រោះផ្ទេរប្រាក់មក គឺគ្មានការខ្ចីអ្វីទាំងអស់ ។
ទីតាំងទីបួន ៖ អគារ ៣ ជាន់ ជិតព្រំដែន ថៃ-កម្ពុជា ក្នុងទីក្រុងប៉ោងប៉ែត ឃាត់ខ្លួន ២៥ នាក់ ក្លែងជាបុគ្គលិកក្រុមដឹកជញ្ជូន DHL ។
ការចាប់ខ្លួនទាំងប៉ុន្មាន បានឈានទៅស្វែងរកជនល្មើសទាំងអស់ ៩៤ នាក់ ដែលក្នុងនេះមាន«បងធំជនជាតិតៃវ៉ាន់» ជាប្រធានផង ។
បច្ចុប្បន្ន «ក្រុមខលសេនធើ» កំពុងមានសកម្មភាពខ្លាំងនៅប្រទេសថៃ ពួកនេះមានកលល្បិចបោកបញ្ឆោត ក្រុមហ៊ុន សហគ្រាសឯកជន រួមទាំងប្រជាជនថៃយ៉ាងសម្បើមដៃ ដូច្នេះហើយទើបសមត្ថកិច្ចថៃ បានស៊ើបអង្កេតស្រាវជ្រាវជាច្រើនខែ ទើបដឹងអត្តសញ្ញាណ បានសហការជាមួយសមត្ថកិច្ចខ្មែរ ឈានទៅចាប់ឃាត់ខ្លួន ៕