ដោយ សាវុឌ្ឍ៖
មជ្ឈមណ្ឌលស្ថិតិជាតិរបស់ប្រទេសលាវផ្សាយឲ្យដឹងថា អត្រាអតិផរណាកាលពីខែកក្កដា ឆ្នាំ ២០២២ ឡើងខ្ពស់ដល់ 25.6% បើធៀបនឹងរយៈពេលដូចគ្នាកាលពីឆ្នាំមុន និងកើនឡើងពីខែមិថុនា 23.6% ។
តួលេខនេះគឺជាអត្រាអតិផរណាខ្ពស់បំផុតចាប់តាំងពីកំណត់ត្រាបានចាប់ផ្តើមក្នុងឆ្នាំ 2000 ហើយជះឥទ្ធិពលយ៉ាងខ្លាំងទៅលើអ្នកដែលមានចំណូលទាប ។
ក្នុងរយៈពេលប៉ុន្មានខែកន្លងមកនេះ តម្លៃអាហារ ឱសថ ថ្លៃធ្វើដំណើរ និងទំនិញប្រើប្រាស់ក្នុងប្រទេសលាវ បានហក់ឡើងយ៉ាងខ្លាំង ជាពិសេសតម្លៃប្រេងឥន្ធនៈបានកើនឡើង ១០៦.៥% បើធៀបនឹងរយៈពេលដូចគ្នានៃឆ្នាំមុន និងប្រាក់គីបធ្លាក់ថ្លៃ វាជាកត្តាសំខាន់មួយទៀតដែលជំរុញឱ្យអតិផរណាកើនឡើង ។
នេះធ្វើឲ្យប្រទេសលាវក្លាយជាប្រទេសដែលមានអតិផរណាខ្ពស់បំផុតនៅអាស៊ីអាគ្នេយ៍ ។ ពីមុនលាវ ជាប្រទេសដែលនាំចូលផលិតផលច្រើនជាងការនាំចេញ ហើយឥឡូវនេះ តម្រូវការរូបិយប័ណ្ណបរទេសក្នុងប្រទេសកំពុងកើនឡើងសម្រាប់ការនាំចូលទំនិញ និងការសងបំណុល ជាលទ្ធផលប្រាក់គីបបានធ្លាក់ថ្លៃបន្ថែមទៀត ។
មិនត្រឹមតែប៉ុណ្ណោះ នៅរដូវវស្សានេះត្រូវបានគេរំពឹងទុកថា ផលិតផលកសិកម្មនឹងទទួលបានតិចជាងធម្មតា បណ្តាល ឱ្យមានការថយចុះនៃបរិមាណទិន្នផលដែលត្រូវបានផ្គត់ផ្គង់ដល់ទីផ្សារ តម្លៃនៃផលិតផលទាំងនេះក៏នឹងខ្ពស់ផងដែរ ៕