from: sanook
ដោយ សូរ្យសែង៖
ក្រុមហ៊ុនវ៉ាក់សាំងការពារកូវីដ-១៩ ឈ្មោះ ម៉ូដេណា (Moderna) បានប្តឹងក្រុមហ៊ុនវ៉ាក់សាំង Pfizer និង BioEnTech អំពីការធ្វើត្រាប់តាមបច្ចេកវិទ្យាវ៉ាក់សាំងរបស់ពួកគេ ។ នេះបើតាមរបាយការណ៍របស់ទីភ្នាក់ងារព័ត៌មាន AP ។
ម៉ូដេណា ឲ្យដឹងថា វ៉ាក់សាំង កូមីរណាធី (Comirnaty) របស់ Pfizer-BioEntech បានរំលោភលើអាជ្ញាប័ណ្ណ (License) នាប៉ុន្មានឆ្នាំមុន ។ អាជ្ញាប័ណ្ណនេះការពារបច្ចេកវិទ្យាដែលប្រើដើម្បីបង្កើតវ៉ាក់សាំង Spikevax របស់ ម៉ូដេណា ដែលក្រុមហ៊ុនបានដាក់ពាក្យនៅតុលាការសហព័ន្ធអាមេរិក និងតុលាការអាល្លឺម៉ង់ហើយ ។
អ្នកនាំពាក្យរបស់ Pfizer លោក ប៉ាំ អេសេល (Pam Eisel) បាននិយាយថា ក្រុមហ៊ុនមិនបានពិនិត្យលើបណ្តឹងដែលប្តឹងដោយ Moderna នៅក្នុងតុលាការនោះទេ ប៉ុន្តែ Pfizer មានការភ្ញាក់ផ្អើលចំពោះការដាក់ពាក្យបណ្តឹងនេះ ដោយ សារវ៉ាក់សាំងកូវីដរបស់ក្រុមហ៊ុន ប្រើបច្ចេកវិទ្យាដែលបង្កើតឡើងដោយ Pfizer និង BioEntech ។
ក្រុមហ៊ុន Moderna បញ្ជាក់ថា បានចាប់ផ្តើមអភិវឌ្ឍបច្ចេកវិទ្យា mRNA ពីឆ្នាំ ២០១០ ជួយក្រុមហ៊ុននានាក្នុងការប្រយុទ្ធប្រឆាំងនឹងមេរោគបានយ៉ាងឆាប់រហ័ស ហើយបន្ទាប់មកពីការផ្ទុះឡើងនៃមេរោគឆ្លងកូវីដ-១៩នៅដើមឆ្នាំ ២០២០ ។ កាលពីចុងឆ្នាំនោះ សហរដ្ឋអាមេរិកបានអនុម័តវ៉ាក់សាំងទាំង Pfizer និង Moderna ថាមានប្រសិទ្ធភាពខ្ពស់ដូចគ្នា ។
លោក ស្ទីហ្វេន បានសេល នាយកប្រតិបត្តិ (CEO) របស់ Moderna និយាយថា អ្នកអភិវឌ្ឍបច្ចេកវិទ្យានេះ បានចំណាយទុនជាច្រើនពាន់លានដុល្លារ ដើម្បីផលិតវ៉ាក់សាំងនេះ ។ Moderna និយាយទៀតថា ក្រុមហ៊ុនជឿជាក់ថា វ៉ាក់សាំងរបស់ Pfizer និង BioEntech ល្មើសកម្មសិទ្ធិ ដែល Moderna បានប្តឹងតាំងពីចន្លោះឆ្នាំ ២០១០-២០១៦ ។
Moderna បញ្ជាក់ថា ការចោទប្រកាន់ Pfizer និង BioEntech គឺការធ្វើត្រាប់តាមបច្ចេកវិទ្យាសំខាន់ៗមួយចំនួន រួមទាំង «ការកែច្នៃគីមីចំពោះ mRNA ស្រដៀងនឹងការកែច្នៃដែលអ្នកវិទ្យាសាស្ត្រ Moderna បានចាប់ផ្តើមអភិវឌ្ឍជាច្រើនឆ្នាំកន្លងមក» ដោយប្រើបច្ចេកវិទ្យាដូចដែលបានរៀបរាប់នៅក្នុងការផលិតវ៉ាក់សាំង Spikewax ។
ទោះយ៉ាងណា វ៉ាក់សាំងដ៏ល្បីទាំងពីរយីហោ សុទ្ធតែមានគុណសម្បត្តិធំធេង ដែលបានជួយការពារជីវិតមនុស្សនៅលើពិភពលោកយើងនេះ ៕
រូប HAZEM BADER / AFP