អត្ថបទ សូរ្យរិទ្ធ៖
ទីភ្នាក់ងារព័ត)មាន AFP ផ្សាយឲ្យដឹងថា សហគមន៍អឺរ៉ុប(EU) និងធនាគារពិភពលោក (World Bank) បានប៉ាន់ប្រមាណកាលពីថ្ងៃទី ៩ កញ្ញា ២០២២ ថា ការស្តារប្រទេសអ៊ុយក្រែនឡើងវិញ អាចមានដល់ ៣៤៩.០០០ លានដុល្លារសហរដ្ឋអាមេរិក ។
តួលេខនេះសមាមាត្រ ១,៥ ដងនៃទំហំសេដ្ឋកិច្ចអ៊ុយក្រែន តែនេះវាគ្រាន់តែជាការវាយតម្លៃ «កម្រិតទាប» ហើយទំនងជា «បន្ត» បន្ថែមទៀត នៅពេលដែលសង្រ្គាមអូសបន្លាយជាច្រើនខែ ទំនងជាមិនបញ្ចប់។
របាយការណ៍បញ្ជាក់ថា ដោយឡែក ការខូចខាតខាង physical damage ប៉ុណ្ណោះ ចាប់តាំងពីសង្រ្គាមរុស្ស៊ីបានចាប់ផ្តើមនៅថ្ងៃទី ២៤ ខែកុម្ភៈ និងបន្តរហូតដល់ថ្ងៃទី ១ ខែមិថុនា វាបានឈានដល់ 97 ពាន់លានដុល្លារទៅហើយ ។
«សង្គ្រាមអ៊ុយក្រែនបង្កដោយរុស្ស៊ីបានធ្វើឲ្យខាតបង់យ៉ាងខ្លាំង ទាំងអ្នករងរបួស មនុស្សរាប់លាននាក់ត្រូវជម្លៀស រួមទាំងអគារ អាជីវកម្ម ស្ថាប័នសង្គម ហើយសកម្មភាពសេដ្ឋកិច្ចត្រូវបានបំផ្លាញ ។ Anna Bjerde អនុប្រធានធនាគារពិភពលោកសម្រាប់អឺរ៉ុប និងអាស៊ីកណ្តាល និយាយ ។
របាយការណ៍នេះប៉ាន់ប្រមាណថា អ៊ុយក្រែនត្រូវចំណាយ ១០៥ ពាន់លានដុល្លារក្នុងរយៈពេល ៣៦ ខែខាងមុខ ដើម្បីបំពេញតម្រូវការជាបន្ទាន់ ដូចជាការស្តារប្រព័ន្ធអប់រំឡើងវិញ ប្រព័ន្ធសុខភាពសាធារណៈ និងឧបករណ៍ប្រើប្រាស់ជាមូលដ្ឋាន រួមទាំងការរៀបចំសម្រាប់រដូវរងារដោយការជួសជុលប្រព័ន្ធចែកចាយអគ្គិសនី និងថាមពលកម្តៅសម្រាប់គ្រួសារ វិស័យកសិកម្ម និងធ្វើឱ្យផ្លូវដឹកជញ្ជូនសំខាន់ៗរស់ឡើងវិញ ។
«ដំណាក់កាលដំបូង នៃការស្តារជាបន្ទាន់ ត្រូវប្រើថវិកាប្រមាណ ១៧.០០០ លានដុល្លារសហរដ្ឋអាមេរិក ហើយអ៊ុយក្រែនខ្លួនឯង ចាំបាច់ត្រូវរកឲ្យបាន ៣.៤០០ លានដុល្លារក្នុងឆ្នាំនេះ» ពីព្រោះបណ្តាប្រទេសសម្ព័ន្ធមិត្តបានចាក់បញ្ចូលថវិកា និងជំនួយជាបណ្តើរៗដល់អ៊ុយក្រែន ជាពិសេស G7 និងសហភាពអឺរ៉ុប (EU) បានប្រកាសផ្តល់ជំនួយចំនួន 39 ពាន់លានដុល្លាររួចហើយ ។
ប្រធានគណៈកម្មការអឺរ៉ុប Ursula von der Leienne បាននិយាយថា EU បានគៀងគរជំនួយបានចំនួន ១០.០០០ លានអឺរ៉ូ ទាំងផ្នែកហិរញ្ញវត្ថុ ជំនួយមនុស្សធម៌ ដែលជាការឆ្លើយតបបន្ទាន់ និងជំនួយយោធាដល់អ៊ុយក្រែន ហើយត្រៀមដាក់បញ្ចូលប្រាក់ ៥.០០០ លានអឺរ៉ូទៀតក្នុងពេលឆាប់ៗនេះ» ៕