ដោយ សូរ្យរិទ្ធ៖
វីដេអូដែល BBC បានបង្ហាញឲ្យឃើញការិយាល័យយោធាក្នុងទីក្រុងប៉ុតប៉ូរ៉ាស៊ី នៃប្រទេសរុស្ស៊ី ដែលនៅឆ្ងាយពីទីក្រុងម៉ូស្គូចម្ងាយជាង ៨០០ គីឡូម៉ែត្រ កំពុងកេណ្ឌមនុស្សចូលធ្វើទាហាន ដើម្បីទៅប្រយុទ្ធជាមួយអ៊ុយក្រែន។
មីខាអ៊ីល បុរសរស់នៅទីក្រុងខាងលើបានបដិសេធថា ៖ «...ប្រសិនបើប្រទេសដទៃព្យាយាម មកដណ្តើមប្រទេសកំណើតរបស់យើង ឬចូលទន្រ្ទានរុស្ស៊ី ខ្ញុំមិនបង្អែរបង្អង់ឡើយ នឹងស្ម័គ្រចូលរូមប្រយុទ្ធភ្លាម ដោយមិនចាំបាច់កេណ្ឌទាហានឡើយ តែក្នុងករណីនេះ ខ្ញុំជឿថា គ្មានគ្រោះថ្នាក់ចំពោះផែនដីកំណើតរបស់ខ្ញុំទេ!» ។
មន្ត្រីម្នាក់និយាយថា ៖ «ប៉ុន្តែមាតុភូមិរបស់យើងកំពុងធ្លាក់ក្នុងគ្រោះថ្នាក់» ។ លោក មីខាអ៊ីល តបវិញ៖ «មាតុភូមិរបស់ខ្ញុំមិនបានគ្រោះថ្នាក់មុនថ្ងៃទី ២៤ កុម្ភៈ ឆ្នាំ ២០២២ ឡើយ» ។
មីខាអ៊ីល អាយុ ៣៤ ឆ្នាំ ជាជាងមេកានិក សូម្បីតែក្នុងពេលកន្លងមក រុស្ស៊ីកាន់តែផ្តាច់ការ ដែលសិទ្ធិស៊ីវិល និងសកម្មជនសិទ្ធិមនុស្សត្រូវបានគាបសង្កត់យ៉ាងទូលំទូលាយក៏ដោយ ប៉ុន្តែលោកបាននិយាយថា រដ្ឋធម្មនុញ្ញរុស្ស៊ីបានផ្តល់ ឱ្យគាត់នូវសិទ្ធិក្នុងការជំទាស់នឹងការបម្រើយោធា ហើយគាត់បានបដិសេធមិនកាន់អាវុធទៅប្រយុទ្ធនៅអ៊ុយក្រែនឡើយ ។ «ពេលដែលខ្ញុំឈរនៅទីនោះ និងការនិយាយអ្វីៗ ខ្ញុំពោរពេញទៅដោយភាពភ័យខ្លាច»។
ប្រធានាធិបតី វ្ល៉ាឌីមៀ ពូទីន បាននិយាយថា កងទ័ពចំនួន 220,000 ត្រូវបានហៅចូល ចាប់តាំងពីលោកបានធ្វើសេចក្តីប្រកាស «ការចល័តដោយផ្នែក» កាលពីខែកញ្ញាឆ្នាំមុន ដែលទោះបីជាលោក ពូទីន បានថ្លែងបែបនេះក៏ដោយ ការចល័តនេះនឹងបញ្ចប់ក្នុងពេលឆាប់ៗនេះ ប៉ុន្តែរដ្ឋាភិបាលរុស្ស៊ីបានបដិសេធមិនបញ្ជាក់កាលបរិច្ឆេទជាក់លាក់ទេ ។
ក្នុងរយៈពេលប៉ុន្មានថ្ងៃកន្លងមកនេះ ទូរទស្សន៍រដ្ឋរុស្ស៊ីបានចេញផ្សាយវីដេអូនៃក្រុមទាហានថ្មីដែលកំពុងហ្វឹកហាត់នៅក្នុងប្រទេសរុស្ស៊ី រួមជាមួយនឹងការសម្ភាសន៍ស្នេហាជាតិរបស់ពួកគេ ។ ក្នុងសប្តាហ៍នេះ រូបភាពរបស់លោកប្រធានាធិបតី ពូទីន ត្រូវបានបង្ហាញទៅកាន់ក្រុមទាហានថ្មីនៅឯកន្លែងហ្វឹកហាត់ក្នុងខេត្តរីសាន ក្នុងក្តីសង្ឃឹមនៃការអំពាវនាវឱ្យមានការគាំទ្រសម្រាប់ការចុះបញ្ជីយោធាដើម្បីប្រយុទ្ធនៅក្នុងប្រទេសអ៊ុយក្រែន ។
លោក ពូទីន ធ្លាប់បានប្រកាសថានឹងមិនមានការចល័តទ័ពទេ ដោយការសន្យាថា «ប្រើទាហានអាជីពនៅក្នុង ប្រតិបត្តិការយោធាពិសេស» តែប៉ុណ្ណោះ ។
ប៉ុន្តែស្ថានការណ៍បានផ្លាស់ប្តូរ ហើយបានធ្វើឱ្យមេដឹកនាំរុស្ស៊ីប្រកាស «ការចល័តដោយផ្នែក» ។
នេះបានធ្វើឱ្យសង្រ្គាមអ៊ុយក្រែនប៉ះពាល់ដល់ជនជាតិរុស្ស៊ីច្រើនជាងការរំពឹងទុក ដោយសារតែប្តី ឪពុក និងកូនប្រុសរបស់ពួកគេត្រូវបានត្រៀមកេណ្ឌឱ្យចូលក្នុងជួរយោធាភ្លាមៗ ហើយបន្ទាប់មកបញ្ជូនទៅតំបន់ប្រយុទ្ធ ។ អ្នកខ្លះត្រូវបានបញ្ជូនដោយមិនបានហ្វឹកហាត់ ឬដោយមានឧបករណ៍ចាំបាច់ ជាលទ្ធផលក្នុងរយៈពេលជាច្រើនសប្តាហ៍កន្លងមក ទាហានរុស្ស៊ីបានបង្ហោះឃ្លីបនៅលើបណ្តាញសង្គមដើម្បីរៀបរាប់ពីទុក្ខលំបាក និងកង្វះខាតសម្ភារៈចាំបាច់ដែលពួកគេប្រឈមមុខ ។
លោក មីខាអ៊ីល បានប្រាប់ BBC ថា៖ «មនុស្សនៅជុំវិញមានការភ័យខ្លាចចំពោះការត្រូវបានគេកេណ្ឌជាយោធា ដោយសារឥឡូវវាប៉ះពាល់ដល់អ្នករាល់គ្នាហើយ» ។
បន្ទាប់ពីបដិសេធមិនចូលរួមយោធា មីខាអ៊ីល ត្រូវបានគេជេរប្រមាថតាមបណ្តាញសង្គម "គាត់មានភ្នែកស អ្នកអត្ថាធិប្បាយម្នាក់បាននិយាយថា ដូចជាកណ្តុររត់ចេញពីទូក»។ ម្នាក់ទៀត Comment ថា៖ "មនុស្សដែលធ្វើបែបនេះ កុំហៅខ្លួនឯងថាជាបុរស» ។
ប៉ុន្តែមិនយូរប៉ុន្មាន មីខាអ៊ីល ត្រូវបានបណ្តាញកោតសរសើរ និងគាំទ្រដ៏លើសលប់សម្រាប់ភាពក្លាហានក្នុងការក្រោកឈរឡើងសម្រាប់ខ្លួនអ្នក និងអ្នកដទៃ ។ អ្នកខ្លះសរសើរថា៖ «បុរសល្អអ្នកមិនបានរត់ទៅណាទេ អ្នកកំពុងសួរសំណួរដែលត្រឹមត្រូវ៖ តើអ្នកណាគ្រោងនឹងវាយប្រហារយើងមុនថ្ងៃទី 24 ខែកុម្ភៈ ឆ្នាំ ២០២២ ?
«ខ្ញុំបានសម្រេចចិត្ត និងយល់ព្រមជាមួយគ្រួសាររបស់ខ្ញុំថា ប្រសិនបើរឿងនេះកើតឡើងពិតប្រាកដ ខ្ញុំនឹងបដិសេធជាដាច់ខាតក្នុងការចុះបញ្ជីយោធា ទោះគេបញ្ជូនខ្ញុំទៅដាក់គុកក៏ដោយ ជម្រើសរបស់ខ្ញុំគឺដើរចូលគុក ចៀសជាងកេណ្ឌឲ្យចូលទាហានទៅប្រយុទ្ធនៅអ៊ុយក្រែន !
“រដ្ឋអាចចាត់ទុកខ្ញុំជាឧក្រិដ្ឋជន ប្រសិនបើខ្ញុំមិនទៅធ្វើសង្គ្រាម។ ប៉ុន្តែខ្ញុំមិនមែនជាឧក្រិដ្ឋជនតាមទស្សនៈមនុស្សធម៌ទេ!» ៕
ពី BBC/Thai